جۋىردا الەۋمەتتىك جەلىلەردە قازاقستان-وزبەكستان شەكارا بەكەتىنەن ءوتۋ ءۇشىن جۇك اۆتوكولىكتەرىنىڭ ساعاتتاپ كەزەكتە تۇراتىنى تۋرالى اقپارات تارادى. الايدا تۇركىستان وبلىستىق مەملەكەتتىك كىرىستەر دەپارتامەنتى الەۋمەتتىك جەلىلەردە تاراعان اقپاراتتى جوققا شىعاردى. دەپارتامەنت وكىلدەرىنىڭ ايتۋىنشا, «قاپلانبەك» شەكارا بەكەتىنەن وتۋگە ەش كەدەرگى جوق.
وبلىستاعى قازاق-وزبەك شەكارا بەكەتتەرىندە ازاماتتاردى وتكىزۋ توقتاتىلماعان. ال قارجى مينيسترلىگىنىڭ مەملەكەتتىك كىرىستەر كوميتەتى: «وزبەكستاننىڭ جاقىن جانە الىس شەت ەلدەرمەن سىرتقى ساۋدانى دامىتۋىنا بايلانىستى قازاقستان اۋماعى ارقىلى وزبەكستانعا قاراي تاۋارلار اعىنى ەداۋىر ۇلعايدى. وسىعان بايلانىستى 2018 جىلدىڭ ناۋرىز ايىنان بەرى «ب.قونىسباەۆ» وتكىزۋ بەكەتى الدىندا قازاقستان جاعىنان 50-دەن 100-گە جۋىق جۇك كولىكتەرىنىڭ جينالىپ قالۋى بايقالا باستادى», دەپ حابارلادى.
كوميتەت مالىمەتى بويىنشا, «ب.قونىسباەۆ» بەكەتى سوتكەسىنە 150 اۆتوكولىكتى وتكىزە الادى. دەگەنمەن بۇگىندە «ب.قونىسباەۆ» كەدەن بەكەتى كۇشەيتىلگەن رەجيمدە جۇمىس ىستەپ, سوتكەسىنە 250-گە دەيىن اۆتوكولىك وتكىزۋدە ەكەن. «1 تامىز بەن 7 تامىز ارالىعىندا قازاقستان جاعىنان وزبەكستانعا كولىكتەردىڭ جينالىپ قالۋى 200-دەن 315-كە دەيىن كوبەيدى. بۇل كەزەڭدە وزبەك جاعى تەحنيكالىق سەبەپتەرگە بايلانىستى وتكىزۋدى سوتكەسىنە 100 بىرلىككە دەيىن (بۇرىن سوتكەسىنە 130-140 وتكىزەتىن) دەيىن تومەندەتتى», دەپ ءتۇسىندىردى مينيسترلىك.
سونداي-اق, «كولىكتەردى وتكىزۋدى جەدەلدەتۋ بويىنشا ەكى كەدەن بەكەتتەرى باسشىلارىنىڭ كەزدەسۋى كۇن سايىن وتكىزىلەتىنىن» حابارلادى. ازەربايجان, بەلورۋسسيا, رەسەي جانە قىرعىزستاننىڭ كەدەن قىزمەتتەرىنە جۇك اعىنىن, وزبەكستانعا «قازىعۇرت», «قاپلانبەك» جانە «اتامەكەن» وتكىزۋ بەكەتتەرى بويىنشا قايتاۇلەستىرۋ جونىندە حات جولدانعان.
سونىمەن بىرگە شەتەلدىك اۆتوكولىك قۇرالدارىنىڭ وزبەكستان اۋماعى ارقىلى ترانزيتتىك ءوتۋى تۇركىستان وبلىسىنداعى «ياللاما (وزبەكستان) – «ب.قونىسباەۆ» (قازاقستان) جانە ماڭعىستاۋ وبلىسىنداعى «قاراقالپاق (وزبەكستان) – «تاجەن» (قازاقستان) وتكىزۋ بەكەتتەرى ارقىلى رۇقسات ەتىلەتىنى تۇسىندىرىلگەن. «سوڭعى اپتادا وزبەك جاعى اۆتوكولىكتەردى وتكىزۋدى سوتكەسىنە 150-گە دەيىن ۇلعايتتى.
مەملەكەتتىك كىرىستەر كوميتەتى 16 تامىزدا قازاقستاننان وزبەكستانعا اۆتوكولىكتەردىڭ جينالىپ قالۋى 190-عا دەيىن تومەندەگەنىن بەلگىلەدى. سونداي-اق, بۇل ماسەلەنى شەشۋ ءۇشىن «ب.قونىسباەۆ» وتكىزۋ بەكەتىن كەڭەيتۋ جولىمەن قايتا قۇرۋ جوسپارلانعان. قايتا قۇرۋدان سوڭ اۆتوكولىكتەردى وتكىزۋ قابىلەتى سوتكەسىنە ءبىر مىڭعا جەتەتىن بولادى. قۇرىلىس مەرزىمى 19 اي», دەلىنگەن مينيسترلىك حابارلاماسىندا.
عالىمجان ەلشىباي,
«ەگەمەن قازاقستان»
تۇركىستان وبلىسى
