اڭگىمەلەسۋ بارىسىندا تاراپتار ستراتەگيالىق ارىپتەستىك دەڭگەيىنە شىققان, ەكى ەل اراسىنداعى تۇراقتى جانە ىلگەرىلەمەلى سەرپىن, سونداي-اق قازاقستان مەن گەرمانيا اراسىنداعى دوستىق جانە سەنىمدى, ونىڭ ىشىندە جوعارىداعى دەڭگەيدەگى ديالوگتى دە اتاپ ءوتتى.
تاراپتار قازاقستان مەن گەرمانيا اراسىنداعى ىنتىماقتاستىقتىڭ بارلىق ماسەلەلەرىن ودان ءارى دامىتۋدى جانە 2017 جىلعى شىلدەدە استانادا وتكەن قازاقستان پرەزيدەنتى نۇرسۇلتان نازارباەۆ پەن گەرمانيا فەدەرالدىق پرەزيدەنتى فرانك-ۆالتەر شتاينمايەردىڭ كەلىسسوزدەرىنىڭ نەگىزىندە قول جەتكىزىلگەن ۋاعدالاستىقتاردىڭ ورىندالۋىن ەگجەي-تەگجەيلى تالقىلادى.
وتكەن جىلعى گەرمانيا باسشىسىنىڭ ساپارى بارىسىندا 1 ميللياردتان استام اقش دوللارى كولەمىندەگى 21 جوباعا قول قويىلعان ەكونوميكالىق جانە ينۆەستيتسيالىق كەلىسىمدەردىڭ ماڭىزدى پاكەتى العاشقى جەمىستەردى اكەلىپ وتىر. بىرلەسكەن كۇش-جىگەردىڭ ارقاسىندا 2017 جىلى ساۋدا كولەمى 5 ملرد. ەۋروعا جەتىپ, نەمىس ينۆەستيتسيالارىنىڭ 90%-دان استامى ءبىزدىڭ ەكونوميكامىزدىڭ «شيكىزاتتىق ەمەس» سەكتورىنا باعىتتالعان.
ح. مااستىڭ ايتۋىنشا, قازاقستان ماڭىزدى سەرىكتەس بولىپ تابىلادى جانە گەرمانيا ىنتىماقتاستىقتى ودان ءارى تەرەڭدەتۋگە دايىن. ول اقتاۋ قالاسىندا وتكەن بەسىنشى كاسپي ءسامميتىنىڭ جانە كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلۋىنىڭ ماڭىزدىلىعىن جوعارى باعالادى. ونىڭ قابىلدانۋى ەكونوميكالىق ىنتىماقتاستىقتى كەڭەيتۋدىڭ جاڭا پەرسپەكتيۆالارىن اشادى.
تاراپتار ەكونوميكانى جاڭعىرتۋ جانە يندۋستريالاندىرۋعا باعىتتالعان بىرلەسكەن جوبالاردى جۇزەگە اسىرۋعا ءوزارا مۇددەلىلىك ءبىلدىردى. وسىعان بايلانىستى ق. ءابدىراحمانوۆ گەرمانيا تاراپىن «استانا» حالىقارالىق قارجى ورتالىعى, IT-ستارتاپ پاركى, سونداي-اق جاسىل تەحنولوگيالار جانە يۆەستيتسيالىق جوبالار حالىقارالىق ورتالىعىنىڭ ىسكە قوسۋ اياسىندا اشىلىپ جاتقان مۇمكىندىكتەردى بەلسەندى تۇردە يگەرۋگە شاقىردى. تاراپتار بيزنەس-قاۋىمداستىق ءۇشىن قولايلى ينۆەستيتسيالىق احۋالدىڭ قامتاماسىز ەتىلۋىنىڭ ماڭىزدىلىعى تۋرالى ۋاعدالاستى.
گەرمانياداعى ميلليون قازاقستاندىق نەمىستەردىڭ جانە قازاقستانداعى ەكى ءجۇز مىڭ ەتنيكالىق نەمىستەردىڭ ماڭىزدى بايلانىستىرۋشى بولىپ كەلەتىن ءرولى ەكى ەل اراسىنداعى دوستىقتىڭ «جاندى كوپىرى» رەتىندە ارەكەت ەتەتىنى ەرەكشە اتاپ ءوتىلدى.
قازاقستان سىرتقى ساياسات ۆەدومستۆوسىنىڭ باسشىسى ەۋروپالىق وداق پەن ورتا ازيا ايماعى ەلدەرىنىڭ اراسىنداعى ىنتىماقتاستىقتىڭ نەگىزىن قالاعان 2007 جىلعى ەۋروپالىق وداقتىڭ ورتالىق ازياعا قاتىستى ستراتەگياسىن ازىرلەۋگە جانە جۇزەگە اسىرۋعا گەرمانيانىڭ ماڭىزدى ۇلەسىن اتاپ ءوتتى. قازاقستان كەلەسى جىلى ەۋرووداق تاراپىنان قابىلدايتىن جاڭا ستراتەگيانى ءتيىمدى جۇزەگە اسىرۋ ءۇشىن بار كۇش-جىگەرىن جۇمسايتىندىعىن اتاپ ءوتتى. وسىعان وراي, ديپلومات نەمىس ارىپتەسىن اتالعان قۇجاتتىڭ مازمۇنىنا ەنگىزۋ ءۇشىن قازاقستاننىڭ ۇسىنىستارى ەۋروپالىق وداقتىڭ ءتيىستى قۇرىلىمدارىنا جىبەرىلگەنى تۋرالى حاباردار ەتتى.
مينيسترلەر حالىقارالىق كۇن تارتىبىندەگى وزەكتى ماسەلەلەر بويىنشا, سونىڭ ىشىندە استانا پروتسەسىنىڭ شەڭبەرىندە سيريا ماسەلەسىن رەتتەۋ جانە يراننىڭ يادرولىق باعدارلاماسى جونىندەگى بىرلەسكەن كەشەندى ءىس-قيمىل جوسپارىن ىسكە اسىرۋ تۋرالى پىكىر الماستى.
سۇحباتتاستار قازاقستان مەن گەرمانيانىڭ حالىقارالىق ارەنادا كوپجاقتى فورماتتاعى ءوزارا ءىس-قيمىلىنىڭ جاڭا ساپالى سيپاتىن اتاپ ءوتتى. ق. ءابدىراحمانوۆ, ءوزىنىڭ ارىپتەسىن گەرمانيانىڭ بۇۇ قاۋىپسىزدىك كەڭەسىنە سايلانۋىمەن قۇتتىقتاپ, قازاقستان سوڭعى ەكى جىل بۇۇ قاۋىپسىزدىك كەڭەسىنىڭ جۇمىسىنا بەلسەنە قاتىسىپ وتىرعان مەملەكەت رەتىندە, حالىقارالىق كۇن تارتىبىندەگى بارلىق ماڭىزدى ماسەلەلەر بويىنشا الەمدىك ساياساتتىڭ وسى ماڭىزدى ورگانىنىڭ جاڭا مۇشەلەرىمەن تىعىز ىنتىماقتاستىقتى جالعاستىرۋ مۇددەلىگىن ءبىلدىردى.
قورىتىندىسىندا سىرتقى ىستەر مينيسترلەرى الداعى ءتۇرلى دەڭگەيدەگى ەكىجاقتى بايلانىستاردىڭ كەستەسىن تالقىلادى. ق. ءابدىراحمانوۆ ح. مااستى قازاقستانعا ساپارمەن كەلىپ قايتۋعا شاقىردى.
