– «تۋعان جەرگە تاعزىم» اكتسياسىمەن ماڭعىستاۋ اۋدانى شايىر مەكتەبىنىڭ تۇلەگى, كاسىپكەر سامات مۇساباەۆ مۇعالىمدەر كۇنى مەرەكەسى قارساڭىندا 6 زەينەتكەرگە 50 مىڭ تەڭگەدەن, بۇكىل مەكتەپ ۇجىمىنداعى 100 ادامعا 25 مىڭ تەڭگەدەن سىياقى تاعايىندادى جانە تۇراقتى تۇردە مەكتەپتىڭ رەسپۋبليكالىق سايىس جۇلدەگەرىنە 1 ملن, وبلىستىق دەڭگەيگە 500 مىڭ, اۋداندىق دەڭگەيگە 200 مىڭ تەڭگەدەن سىياقى تاعايىنداپ كەلەدى. Cونىمەن قاتار سامات مۇساباەۆ باستاعان وبلىس كاسىپكەرلەرى ماڭعىستاۋ اۋدانىنداعى «وتپان تاۋ» تاريحي-مادەني كەشەنىنە 80 ميلليون تەڭگەگە قازاقتىڭ ءۇش ءبيىنىڭ ەسكەرتكىشىن ورناتتى. اۋىل ازاماتتارى تۇپقاراعان اۋدانى باۋتين اۋىلىندا ء«بايدىلدا اتا» قورىمى جانىنا 10 ميلليون تەڭگەگە تۇنەۋحانا مەن سىرتقى قورشاۋىن سالسا, جاڭاوزەن قالاسى, تۇپقاراعان, بەينەۋ, ماڭعىستاۋ, قاراقيا اۋداندارىندا جالپى سوماسى 293 ميلليون تەڭگەگە دەمالىس الاڭدارى مەن ساياباقتاردى تارتۋ ەتتى, – دەيدى «رۋحاني جاڭعىرۋ» وڭىرلىك جوبالىق وفيس باسشىسى گ. ازان.
تۋعان جەرگە, التىن بەسىگىنە قولعابىس جاساۋدان جاس بۋىن دا قالىس قالار ەمەس. بەينەۋ اۋدانى تۇرىش اۋىلىنىڭ مەكتەپ تۇلەكتەرى تۋعان اۋىلىنا قۇنى 2 ملن تەڭگە تۇراتىن «دەمالىس پاركىن» تارتۋ ەتسە, اۋدان ورتالىعىندا كاسىپكەرلەر قارجىسىنا «جۇبايلار باعى» سالىندى. ال تۇپقاراعان اۋدانى تاۋشىق اۋىلى شاحتا ورتا مەكتەبىنىڭ 1997 جىلعى تۇلەكتەرى اۋىلدان 1 ملن تەڭگەگە شاعىن ساياباق سالىپ قۋانتسا, ماڭعىستاۋ اۋدانىندا ادان تۇرعىندارىنىڭ ۇيىمداستىرۋىمەن جاستار ساياباعى تۇرعىزىلدى.
ماڭعىستاۋ وبلىسىنداعى قالالار مەن اۋداندارداعى 50 ورتا مەكتەپ 208,6 ملن تەڭگەگە جانە 4 ارنايى تۇزەتۋ مەكتەبى 27 ملن تەڭگەگە قاجەتتى ينۆەنتارلارمەن جابدىقتالدى. اقتاۋ قالاسىندا, ماڭعىستاۋ, بەينەۋ, مۇنايلى, تۇپقاراعان اۋداندارىندا جالپى 902 ملن 600 مىڭ تەڭگەگە سپورتتىق كەشەندەر مەن الاڭدار سالىندى.
− جوقتان بار جاساۋدا, اۋىلدى دامىتۋدا حالىقتىڭ بەلسەندىلىگى جوعارى. ولارعا كاسىپكەرلەر قولداۋ كورسەتىپ, اۋىزبىرشىلىكتىڭ ارقاسىندا ءبىراز جۇمىستار جولعا قويىلدى. وڭىردەگى ءىرى كومپانيالاردىڭ دا ۇلەسى زور. «تەنگيز شەۆرويل» جشس 46 ملن تەڭگەگە بەينەۋ اۋدانىنىڭ بورانقۇل اۋىلىندا 200 ورىندىق سپورت الاڭىن سالىپ بەرسە, جەكە كاسىپكەر م.جاۋپەروۆ 1ملن تەڭگەگە مەكتەپكە سپورتتىق جابدىقتار الىپ بەردى. سونداي-اق كاسىپكەر سۇڭعات مۇڭالباەۆ 220 ملن تەڭگەگە ماڭعىستاۋ اۋدانىنىڭ شەتپە اۋىلىندا «ازامات» سپورت كەشەنىن, ساۋىقتىرۋ, ءجۇزۋ باسسەينىن تۇرعىزىپ, حالىق يگىلىگىنە ۇسىندى. «سامۇرىق قازىنا تراست» الەۋمەتتىك جوبالاردى دامىتۋ قورىنىڭ قولداۋىمەن 170 ملن تەڭگەگە اقتاۋ قالاسىندا فۋتبول, ۆوركاۋت, باسكەتبول الاڭدارى مەن كوشە ترەناجەرلارى ورناتىلدى جانە ي.بيسەنعاليەۆتىڭ قولداۋىمەن 350 ملن تەڭگەگە «باتىر» سپورت كەشەنى تۇرعىزىلدى, − دەيدى «رۋحاني جاڭعىرۋ» وڭىرلىك جوبالىق وفيس باسشىسى گۇلايىم باقىتقىزى.
سالاماتتى ءومىر سالتىن نەگىزگى ۇستانىمعا اينالدىرىپ, بۇقارالىق سپورتتى دامىتۋدى باستى ورىنعا قويعان مەملەكەتىمىزدىڭ ساياساتىنا ساي ماڭعىستاۋ وڭىرىندە تۇرعىنداردىڭ سپورتقا قىزىعۋشىلىعى جوعارى. ول وڭىردە سپورتتىق كەشەندەردىڭ كوپتەپ بوي كوتەرۋىنەن دە اڭعارىلادى. بۇل باعىتتا مۇنايلى اۋدانىندا كاسىپكەر ز.يساەۆانىڭ قولداۋىمەن قۇنى 100 ملن تەڭگەلىك «يسا» سپورت كەشەنى سالىنسا, تۇپقاراعان اۋدانى تاۋشىق اۋىلىندا نكوك جشس-ءنىڭ دەمەۋىمەن امبەباپ سپورت الاڭى پايدالانۋعا بەرىلدى, اتالمىش الاڭنىڭ قۇنى 15 ملن تەڭگەگە باعالانعان. اقتاۋ قالاسىندا ۇرپاقتارىنىڭ ۇيىمداستىرۋىمەن 5 ملن تەڭگەگە حالىق باتىرلارى شوتان نازار ۇلى مەن شوعى مۇڭال ۇلىنا ارنالعان حالىقارالىق سپورتتىق تۋرنيرلەر وتكىزىلدى.
تۋعان جەردى تۇلەتۋ, ونىڭ دامۋىنا, كوركەيۋىنە ازاماتتىق, پەرزەنتتىك ۇلەس قوسۋ سپورت قانا ەمەس, بارلىق سالادا كورىنىس تابۋدا. اقتاۋ قالاسىندا, قاراقيا اۋدانىندا 8 ملرد 923 ملن تەڭگەگە جاستار جاتاقحاناسى, اقتاۋ قالاسىندا 6 ملرد 148 ملن 261 مىڭ تەڭگەگە «دوستىق ءۇيى» تۇرعىزىلدى. كەشە عانا بەسىنشى كاسپي ءسامميتى ءوتىپ, بەس مەملەكەتتىڭ پرەزيدەنتىن تورىنە جيعان بۇل كورىكتى وردا – «دوستىق ءۇيىن» دە حالىق كادەسىنە ۇسىنعان – نكوك جشس.
مەملەكەت باسشىسىنىڭ تاپسىرماسىمەن تۇرعىنداردى باسپانامەن قامتاماسىز ەتۋ, مۇمكىندىگىنە قاراي قىزمەتكەرلەردى, جاستاردى جاتاقحانامەن قامتۋ جۇمىستارى قارقىندى قولعا الىندى. اقتاۋ قالاسىندا 562 ملن تەڭگەگە 100 ورىندىق جاستار ءۇيى, نكوك جشس قولداۋىمەن 1 ملرد 313 ملن تەڭگەگە 500 ورىندىق جاستار ءۇيى سالىنىپ, ءوز تۇرعىندارىن قۋانىشقا بولەدى. سونداي-اق نكوك جشس دەمەۋشىلىگىمەن قاراقيا اۋدانىندا 500 ورىندىق جاس ماماندار مەن جۇمىسشىلارعا ارنالعان جاتاقحانا قۇرىلىسىنا 900 ملن تەڭگە جۇمسالدى.
تۋعان جەردى كوركەيتۋ باعىتىنداعى جۇمىستاردان دەنساۋلىق ساقتاۋ سالاسى دا تىس قالىپ جاتقان جوق. دەمەۋشىلەر تاراپىنان وبلىستىق ەمحانالارعا جالپى سوماسى 235 ملن تەڭگەگە قاجەتتى قۇرال-جابدىقتار جانە مەديتسينالىق اپپاراتتار ساتىپ اپەرىلدى, جاڭاوزەن قالاسىندا «وزەنمۇنايگاز» اق-نىڭ دەمەۋشىلىگىمەن دەنساۋلىق قىزمەتكەرلەرىنە 86,2 ملن تەڭگەگە جاڭا اۆتوكولىكتەر تابىستالدى. حالىق كوپ شوعىرلانعان مۇنايلى اۋدانىندا ت.ايتۋعانوۆتىڭ كومەگىمەن 130 ملن تەڭگەگە «مۇحامبەت» مەديتسينالىق ورتالىعى تۇرعىزىلسا, نكوك جشس اقتاۋ قالاسىنداعى ماڭعىستاۋ وبلىستىق اۋرۋحاناسىنا 20 ملن تەڭگەگە ەلەكتروكارديوگراف, جوعارى جيىلىكتى ەلەكتروكواگۋلياتوردى, تۇپقاراعان اۋدانى فورت-شەۆچەنكو قالاسىنداعى اۋداندىق ەمحاناعا باعاسى 16,7 ملن تەڭگە قۇرايتىن ۋلترادىبىستىق دياگنوستيكالىق سكانەردى تابىستادى.
قايىرىمدىلىق باعىتىنداعى جۇمىستار مۇنىمەن شەكتەلىپ قالمايدى. «ENKA İnşaat ve Sanayi A.Ş» مەكەمەسى تۇپقاراعان اۋدانى باۋتين اۋىلىندا جالعىزىلىكتى تىل ارداگەرى ب.تەلباەۆقا 15 ملن تەڭگەگە ءۇي سالىپ بەرسە, ا.ادجيباەۆ باستاعان اۋدان تۇرعىندارى سايىن اۋىلىنداعى ۇوس ارداگەرى س.مۇرجىقوۆتىڭ دەنساۋلىعىن تۇزەۋگە 1 ملن تەڭگە ءبولدى, «سك باۋتينو» كومپانياسى فورت-شەۆچەنكو قالاسىندا 16 پاتەرلىك تۇرعىن ءۇيدىڭ شاتىرىن جابۋدى موينىنا السا, اۋىل تۇرعىندارىنىڭ كومەگىمەن ماڭعىستاۋ اۋدانى وتەس اۋىلىندا ورتالىق كوشەلەر جارىقتاندىرىلدى. اۋىل تۇرعىندارى بەينەۋ اۋدانى بورانقۇل اۋىلىندا 2 پاتەرلى تۇرعىن ءۇي سالىپ, الەۋمەتتىك جاعدايى تومەن ءۇش وتباسى ۇيلەرىنىڭ قۇرىلىسىن اياقتاۋعا, جىلۋ تارتۋعا كومەك ۇيىمداستىردى. قاراقيا اۋدانىندا كاسىپتىك كوللەدج ستۋدەنتتەرى ءوز قولىمەن بۇيىمدار مەن قۇرالدار جاساپ, ءوز اۋىلدارىنا تارتۋ ەتتى.
قۇزىرلى ورىنداردىڭ مالىمەتىنە سايكەس, وبلىستىڭ قالا-اۋداندارىندا مۇقتاج جاندارعا, بالالاردىڭ جازعى دەمالىسىن ءتيىمدى وتكىزۋگە باعىتتالعان قايىرىمدىلىق اكتسيالارى ۇيىمداستىرىلىپ, 61 ملن تەڭگەگە كومەك كورسەتىلدى. جىل اياعىندا ءوڭىردىڭ دامۋىنا قوماقتى كومەك كورسەتكەن ازاماتتاردى ەلگە تانىستىرۋعا, العىس ايتۋعا باعىتتالعان وبلىستىق مەتسەناتتار فورۋمى ۇيىمداستىرىلدى.
وڭىرلىك جوبالىق وفيس باسشىسى ءبىر جارىم جىلعى اتقارىلعان جۇمىستاردىڭ بۇلارمەن شەكتەلمەيتىنىن, اعىمداعى جىلعا دا ءوڭىر دەمەۋشىلەرى 17 ملرد 386 ملن 851 مىڭ تەڭگە قارجى ءبولىپ, 86 ءىس-شارا جوسپارلاپ وتىرعانىن جانە ونىڭ جىل سوڭىنا دەيىن تولىقتىرىلا بەرەتىنىن ايتتى. سونىمەن قاتار تاريحي سانانى جانە پاتريوتتىقتى دامىتۋ, تابيعي جانە مادەني مۇرالاردى قورعاۋ, حالىققا تانىتۋ ماقساتىنداعى «رۋحاني قازىنا», «تاربيە جانە ءبىلىم» كىشى باعدارلامالارى بويىنشا جوسپارلانعان ءىرى جوبالاردىڭ قارجى قاجەتتىلىگىنە بايلانىستى كىدىرىپ تۇرعانىن دا مالىمدەپ, مەتسەناتتار مەن مەكەمەلەردىڭ رۋحاني باعىتتاعى جۇمىستارعا نازار اۋدارۋىن سۇرايدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
