جالپى, بايقاۋعا قاتىسۋعا نيەت بىلدىرگەن وتباسىلاردان ءوتىنىم وسى جىلدىڭ ءساۋىر ايىنان باستاپ قابىلدانعان بولاتىن. ال ىرىكتەۋ كەزەڭىندە ساتباەۆ قالاسى, قارقارالى, اباي جانە جاڭاارقا اۋداندارى اتىنان قاتىسقان وتباسىلاردىڭ ءومىر تاريحى مەن ونەرى قازىلار القاسىنىڭ كوڭىلىنەن شىقتى.
سونىمەن, بيىلعى «مەرەيلى وتباسى-2018» بايقاۋىنىڭ وبلىستاعى جەڭىمپازى بولىپ قارقارالى اۋدانىندا تۇراتىن ىلىمباەۆتار وتباسى تانىلدى. ۇزدىك شىققان اۋلەتتىڭ ۇيىتقىسى رىمتاي اجە 19 بالا, 47 نەمەرە, 13 شوبەرەنىڭ ارداقتى اناسى.
– ءبىزدىڭ وتباسىمىزدا 11 قىز جانە 8 ۇل بار. شىنىن ايتقاندا, ءبىز بۇل بايقاۋدا جەڭەمىز دەپ ويلاماعان ەدىك. البەتتە, وتە قۋانىشتىمىز. بۇل بايقاۋعا قاتىسۋ تۋرالى وي كىشى سىڭلىمنەن شىقتى. قۇدايعا شۇكىر, وتباسىمىز ۇلكەن جانە وتە تاتۋمىز. اۋلەتتە توي بولا قالسا, ءوزىمىز عانا ءبىر مەيرامحانانى تولتىرىپ جىبەرەمىز. وتباسىمىزبەن ءجيى باس قوسامىز. مەرەكەلەردى, اسىرەسە, تويلار مەن شىلدەحانالاردى ۇناتامىز. ناۋرىز تويى ءبىز ءۇشىن ەڭ ۇلىق مەرەكە, – دەيدى باستاۋىش سىنىپ مۇعالىمى اسەم ىلىمباەۆا.
ساتباەۆ قالاسىنان كەلگەن اۋەزوۆتەر وتباسى ەكىنشى ورىن السا, نۇرا اۋدانى اتىنان قاتىسقان نۇرعاليەۆتەر وتباسى ءۇشىنشى ورىندى مىسە تۇتتى.
بايقاۋدى ۇيىمداستىرۋشىلار جەڭىمپاز وتباسىنا شيپاجايعا جولداما تارتۋ ەتسە, ەكىنشى جانە ءۇشىنشى ورىنعا تابان تىرەگەن وتباسىلار گراموتالار مەن شەتەلدىك قىمبات تەلەديدارلارعا يە بولدى.
ەندى وبلىستا ۇزدىك شىققان ىلىمباەۆتار وتباسى «مەرەيلى وتباسى-2018» بايقاۋىنىڭ رەسپۋبليكالىق كەزەڭىندە قاراعاندى ءوڭىرىنىڭ نامىسىن قورعايتىن بولادى.
قايرات ءابىلدا,
«ەگەمەن قازاقستان»
قاراعاندى
