قازاقستانداعى بارلىق ءىرى كومپانيالار مەن ترانسۇلتتىق كورپوراتسيالار تاراپىنان «كاسحيم» اق-تىڭ ونىمدەرىنە سۇرانىس جوعارى. مۇنى سەرىكتەستىكتىڭ كوممەرتسيالىق ديرەكتورى راۆيل سافيۋلين دە راستايدى. «ەل نارىعىندا پوليپروپيلەن مەن پوليەتيلەننەن جۇمساق قاپتاما جاساۋ بويىنشا جەتەكشى كاسىپورىنعا اينالۋ – بىرلەسكەن ەڭبەكتىڭ جەمىسى. جۇمىسىمىزدىڭ العا باسۋىنا مەملەكەت تاراپىنان كورسەتىلگەن قولداۋدىڭ, جەڭىلدەتىلگەن نەسيەنىڭ كومەگى كوپ بولدى. ءبىز شىعارعان تەحنيكالىق شپاگات پەن پوليەتيلەن قاپتاردىڭ شەتەلدىك ونىمدەردەن ەش كەمى جوق», دەيدى ول.
قازىر مەكەمەدە 200-گە جۋىق مامان ەڭبەك ەتەدى. ولاردىڭ كوپشىلىگى ارنايى وقىتۋلاردان وتكەن, زاماناۋي تەحنولوگيامەن جۇمىس ىستەۋگە داعدىلانعان. ءونىمنىڭ جارتىسىنا جۋىعى سىرتقى نارىققا شىعىپ وتىر. ءبىر اتاپ وتەرلىگى, كاسىپورىن قالدىقسىز جۇمىس ىستەۋگە باعىتتالعان. ءبىرىنشى ونىمنەن شىققان قالدىقتار ارنايى قوندىرعىدا قايتا وڭدەلىپ, ەكىنشى سۇرىپتى ءونىم جاسالادى.
«كاسحيم» اق-تىڭ اعا مەنەدجەرى اننا ماكاروۆا بيىل «التىن ساپا» سىيلىعى مەن «قازاقستاننىڭ ۇزدىك تاۋارى» بايقاۋىنا ءوتىنىم بەرگەندەرىن ايتادى. ەندىگى كەزەكتە قوسىمشا ءوندىرىس عيماراتتارىن سالىپ, ءونىم تۇرلەرىن كوبەيتۋ جوسپاردا بار. بۇل ءوز كەزەگىندە جۇمىسسىزدىق ماسەلەسىنىڭ شەشىمىن تابۋىنا وڭ ىقپال ەتەرى انىق.
باقىتگۇل باباش,
«ەگەمەن قازاقستان»
