وبلىستا مەكتەپ جاسىنا تولعان بالالاردىڭ قاتارى جىل ساناپ ءوسىپ كەلەدى. اسىرەسە الماتى قالاسى ماڭىنداعى اۋدانداردا مەكتەپ تاپشىلىعى سەزىلەتىنى جاسىرىن ەمەس. ىشكى ميگراتسيانىڭ ەسەبىنەن تالعار, قاراساي, ىلە اۋدانى اۋماعىندا حالىق تىعىز قونىستانۋدا. وتباسىنداعى وقۋشى بالالار سانىنىڭ كوپ بولۋى بۇرىننان قولدانىستا بولىپ كەلگەن مەكتەپتەردە ورىن تاپشىلىعىن تۋدىرۋدا. سالىستىرۋ ءۇشىن ايتالىق, قازىرگى كۇنى قۇرىلىسى اياقتالۋعا جاقىن بىرنەشە مەكتەپ ىلە اۋدانىندا اشىلماقشى.
مەگاپوليستىڭ شەكاراسىنا سۇعىنىپ جاتقان اۋماق تۇرعىندار ۇلەسى جونىنەن وبلىستاعى ءتورتىنشى اۋدان بولعانىمەن, ءوڭىردى ناقتى مەكەن ەتۋشىلەردىڭ سانى ەسەپتەگىدەن الدەقانداي كوپ ەكەنى انىق. ياعني الماتىعا باعىتتالعان ىشكى ميگراتسيا سالماعى وسى ىلە اۋدانىنا ءتۇسىپ وتىر. اۋداندا 155 مىڭ ادام رەسمي تىركەلگەن بولسا, قۇجاتى راسىمدەلمەگەن ۇيلەردىڭ تۇرعىندارى بۇدان الدەقايدا كوپ بولۋى مۇمكىن. ءارى سوڭعى 5 جىل ىشىندە ىلە اۋدانىنىڭ اۋماعىندا جاڭادان بوي كوتەرگەن ەلدى مەكەندەر سانى كوبەيىپ, اۋماقتاعى بىلىممەن قامتۋ عانا ەمەس, تۇتاس ينفراقۇرىلىم: جول, جارىق, اۋىزسۋ ماسەلەسى دە قيىنداپ تۇرعانى جاسىرىن ەمەس.
دەگەنمەن دە وبلىس بيلىگى ىلە اۋدانىنداعى مەكتەپ جەتىسپەۋشىلىگى مەن اپات جاعدايىندا جۇمىس ىستەپ تۇرعان وقۋ نىساندارىن جاڭارتۋعا دا, جاڭعىرتۋعا دا كۇش سالىپ جاتىر. ماسەلەن, وسى اۋداننىڭ ىنتىماق اۋىلىنىڭ وقۋشىلارى جاڭا وقۋ جىلىن كەڭ سارايداي جاڭا مەكتەپتە قارسى العالى وتىر. بۇل ءوزى قۇرىلىسى 2016 جىلى باستالىپ, جوبالاۋشىلاردىڭ قاتەلىگىنەن پايدالانىلۋعا بەرىلۋى كەشەۋىلدەپ كەتكەن مەكتەپ بولاتىن. باستاپقىدا جىلۋ قازاندىعىنىڭ جوباسى دۇرىس جاسالماي, بۇل تۇتاس عيماراتتىڭ تالاپقا ساي قولدانىسقا ەنۋىنە كەدەرگى بولىپ كەلگەن ەكەن. بيىل مەردىگەرلەر كەمشىلىكتى تۇزەپ, مەكتەپ قۇرىلىسىن تولىق اياقتاپ وتىر. بۇيىرسا, 600 بالا جارىق, جاڭا عيماراتتا وقيتىن بولادى.
وسى ىلە اۋدانىنىڭ تولە بي اۋىلىندا دا جاڭا مەكتەپ قۇرىلىسى اياقتالىپ, قولدانىسقا بەرىلمەك. 300 ورىندىق ورتا مەكتەپتىڭ قۇرىلىسىنا 886 ملن تەڭگەگە جۋىق قارجى ۇلتتىق قوردان, ال 89 ملن تەڭگە شاماسىنداعى قاراجات جەرگىلىكتى بيۋدجەتتەن بولىنگەن.
مەملەكەت قارجىسىنا سالىنىپ جاتقان مەكتەپ قۇرىلىسى قاداعالاۋشىلاردىڭ دا قاتارى كوپ بولىپ تۇر. مىسالعا, بيۋدجەت قارجىسىنىڭ ماقساتتى جۇمسالۋىنا باقىلاۋ جاساۋ ماقساتىندا «نۇر وتان» پارتياسى الماتى وبلىستىق فيليالىنىڭ پارتيالىق باقىلاۋ جونىندەگى ينسپەكتورى الماس مۇقاەۆ باستاعان كوميسسيا قۇرىلىس باسىنا ءجيى كەلەدى. ناتيجەسىندە قۇرىلىستان ءبىرشاما كەلەڭسىزدىك انىقتالدى. مەردىگەر كومپانيامەن اراداعى اشىق اڭگىمەدەن كەيىن, بۇل كەمشىلىكتەر جوندەلگەن.
تولە بي اۋىلىنداعى مەكتەپتىڭ سپورت زالىنا قاتىستى قۇرىلىس تالابىن بۇزۋشىلىقتى انىقتادىق. قازىر مەردىگەر سپورت زالدىڭ شاتىرىن قايتا جاۋىپ جاتىر. بۇل كەيىن بولۋى مۇمكىن اپات پەن تالاپقا ساي كەلمەۋدىڭ جولىن كەسەدى, – دەيدى پارتيا وكىلى الماس مۇقاەۆ.
«نۇروتاندىقتاردىڭ» ارالاسۋىمەن بىرنەشە مەكتەپتەگى پاندۋستار قايتادان جاسالدى. جالپى, مەكتەپ, اۋرۋحانا سياقتى الەۋمەتتىك ماڭىزى بار عيماراتتار سالۋدا قۇرىلىس كومپانيالارى تاراپىنان جىبەرىلەتىن كەمشىلىكتەردىڭ دەنى وسىنداي مۇمكىندىگى شەكتەۋلى جاندارعا ارنالعان باسپالداقتار مەن پاندۋستارعا قاتىستى ورىن الادى ەكەن. سوندا اۋەلگىدەگى جوبالاۋدان قاتە كەتە مە, الدە اقشا ۇنەمدەۋدىڭ وڭاي جولى وسى جەردەن تابىلا كەتە مە دەگەن قىزىق ساۋال تۋادى.
ايتپاقشى, وبلىس بويىنشا اۋماعى اتشاپتىرىم بولاتىن مەكتەپ عيماراتى تالدىقورعان قالاسىنداعى سولتۇستىك-باتىس تۇرعىن اۋماعىندا سالىنىپ جاتىر. سوڭعى ۇلگىدە جوبالانعان, كەلەشەككە وزگەرگەن كەلبەتىمەن قادام باساتىن مەكتەپتە 1200 بالا ءبىلىم الماق. قازىر بۇل عيماراتقا وڭىردەگى ەڭ ۇزدىك مەكتەپتىڭ ءبىرى بولىپ وتىرعان مۇحتار ارىن اتىنداعى №24 ليتسەي قونىستانۋدا.
تۇيىندەي ايتقاندا, بيىل وبلىس بويىنشا جاڭادان اشىلاتىن 9 مەكتەپتەن بولەك, 30 نىسانعا كۇردەلى جوندەۋ جۇمىسىن جۇرگىزۋ جوسپارلانعان. وعان بيۋدجەتتەن 6 ملرد 372 ملن تەڭگە بولىنگەن. وتكەن مامىر-شىلدە ايلارىندا باستالعان جوندەۋ جۇمىستارى 25 تامىزعا دەيىن اياقتالۋى ءتيىس.
قالماحانبەت مۇقامەتقالي,
«ەگەمەن قازاقستان»
