2017 جىلى قازاقستان رەسپۋبليكاسى مادەنيەت جانە سپورت مينيسترلىگىنىڭ باستاماسىمەن تۇڭعىش پرەزيدەنت كۇنى قارساڭىندا جارىققا شىققان, قازاقستاندىق سۋرەتشىلەردىڭ ەڭبەكتەرىمەن بەزەندىرىلگەن «ۇشقوڭىر» اتتى قاناتتى سوزدەر جيناعىنا ەلباسىنىڭ جۇرەكجاردى تەبىرەنىستەرى مەن تۋعان جەرىنە دەگەن ىستىق ماحابباتى جايلى قاناتتى سوزدەرى توپتاستىرىلعان.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ ورىنباسارى مارال بالتىشەۆ: «بۇل كورمەدە ەلباسىنىڭ بالالىق شاعىنان باستاپ, مەملەكەت قايراتكەرىنە دەيىنگى قالىپتاسۋ جولىمەن قىلقالام شەبەرلەرىنىڭ تۋىندىلارى ارقىلى تانىسا الاسىزدار. ەلباسىمىزدىڭ بارلىق ءومىر جولى – ەگەمەن ەلىمىزدىڭ وركەندەپ وسۋىنە قىزمەت ەتۋدىڭ جارقىن ۇلگىسى بولىپ تابىلادى.
ءبىزدىڭ ەڭ باستى قۇندىلىعىمىز – وتانىمىز بەن تاۋەلسىز قازاقستان. مەملەكەت باسشىسى قازاقستان تاريحىنداعى شەشۋشى كەزەڭدە ەركىندىك پەن تاۋەلسىزدىكتى اڭساعان حالىقتىڭ اسىل ارمانىن ورىندادى. بۇگىنگى كورمە ەلباسىمىز نۇرسۇلتان نازارباەۆتىڭ ارمان-اڭسارىن, ماقسات-مۇددەسىن ايقىن كورسەتەدى دەپ ويلايمىن», دەدى.
«ۇشقوڭىر» كورمەسى قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ تۋعان ولكەسى ۇشقوڭىر ەلدى مەكەنىنە ارنالعان. ەلباسى ءوزىنىڭ ءاربىر جولداۋلارىندا, اڭگىمەلەرىندە, ۇشقوڭىر جايلى كىتاپتارىندا وتان جايلى سىر شەرتە كەلە, اتا-بابا جەرىنىڭ رۋحاني قولداۋشى رەتىندە قالاي جەلەپ-جەبەپ جۇرەتىندىگىن قايتالاۋدان جالىققان ەمەس.
«زولوتايا كنيگا» باسپا ءۇيىنىڭ باس رەداكتورى ۆياچەسلاۆ تيتەنەۆ: «ۇشقوڭىر» جيناعى رۋحاني جاڭعىرۋ باعدارلاماسى اياسىندا جۇزەگە اسىرىلعان جوبا. بۇل كىتاپ ارقىلى ەلباسىنىڭ تۋعان جەرىنە دەگەن ماحابباتىن كورسەتكىمىز كەلدى. ءار ادامنىڭ تۋعان جەرى – ونىڭ ىستىق مەكەنى. قاراپايىم وتباسىندا, قازاق اۋىلىندا تاربيەلەنگەن اۋىل بالاسىنان مەملەكەت باسشىسى قالاي قالىپتاسقانىن سۋرەتتەر ارقىلى ناسيحاتتاعىمىز كەلدى. ەلباسىنىڭ ەستەلىكتەرىن سۋرەتپەن بەينەلەپ بەردىك», دەپ «ۇشقوڭىر» كىتابى تۋرالى ايتىپ ءوتتى.
كورمەگە ب.ارمات, ا.چۋنچالينوۆ, ح.قيقيموۆ, ج.ابدرامان, ب.نۇرماعانبەتوۆ, ۆ.سلابوسپيتسكايا, ت.بايعاليەۆ, قازاقستان ۇلتتىق مۋزەيى قورىنان ءا.قاستەەۆ, س.ايتباەۆتىڭ جانە ت.ب. سۋرەتشىلەردىڭ تۋىندىلارى قويىلعان.
باعاشار تۇرسىنباي ۇلى,
«ەگەمەن قازاقستان»
