«قوستانايدىڭ ءبىز ءۇشىن تيىمدىلىگى ونىڭ رەسەيمەن جاقىن ورنالاسۋىندا بولىپ وتىر. ءونىمدى وتكىزۋدە ءبىزدىڭ جوسپارىمىز ۇلكەن. ءبىزدىڭ ماقسات الەمدىك نارىقا شىعۋ بولماق. گوللانديادا جىلىنا 2 ملن تەلەديدار وندىرەتىن زاۋىتىمىز بار. ال قوستانايداعى زاۋىت تاۋەلسىز دوستاستىق ەلدەرىندەگى تەلەديدار شىعاراتىن جالعىز كاسىپورىن بولماق» دەيدى قىتايلىق كومپانيانىڭ پرەزيدەنتى لي دجين.
قىتايلىق ينۆەستورلار زاۋىت قۇرىلىسىنا بۇگىن كىرىسەيىن دەپ وتىرعان جوق. ولار جوبانىڭ بۇگە-شىگەسىنە دەيىن زەرتتەپ, قاراپ الىعان سوڭ عانا ىسكە كىرىسەتىنىن ايتتى. جوبا بويىنشا 500 قوستانايلىق جۇمىس ورنىن تابادى. سونىمەن قاتار HKC Corporation Limited كومپانياسى جەرگىلىكتى كوللەدج ستۋدەنتتەرىن دۋالدىق باعدارلامامەن وقىتاتىن بولادى.
قوستاناي وبلىسىنىڭ اكىمى ارحيمەد مۇحامبەتوۆ قىتايلىق ينۆەستورلارىمەن بۇل وڭىردەگى العاشقى جۇمىس ەمەس ەكەنىن ايتتى. بۇدان بۇرىن ماشينا قۇراستىرۋ جانە اۋىل شارۋاشىلىعى تاۋارلارىن وڭدەۋ سالاسىندا دا قىتايلارمەن كەلىسىم بولعان.
«بۇگىن ءبىز قىتايلىق ينۆەستورلارعا يندۋستريالىق ايماقتان ورىن ۇسىنامىز. وسىعان دەيىن مۇندا 11 جوبانى جۇزەگە اسىردىق. ەڭ باستىسى رەسەيمەن سالىستىرعاندا بىزدە كورپوراتيۆتى سالىق بارلىعىنا – 20 پايىز, ال تابىس سالىعى بىزدە كورشىلەرگە قاراعاندا 6 پايىزعا تومەن. رەسەيدە 18 پايىز بولسا, بىزدە ول – 12 پايىز.قىتاي كومپانياسىمەن ىنتىماقتاستىققا ءبىز دايىنبىز. ءبىز مۇنداي تەحنيكانىڭ 90 پايىزىن سىرتقا شىعارامىز. زاۋىت ونىمىمەن تەك قازاقستاندى عانا ەمەس, رەسەيدى دە قامتاماسىز ەتۋگە بولادى» دەدى ارحيمەد بەگەجان ۇلى.
ەكى جاقتى كەلىسىم بويىنشا جوبانى جانە ونىڭ جول كارتاسىن جۇزەگە اسىراتىن جۇمىس توبى قۇرىلدى.
ءنازيرا جارىمبەت,
«ەگەمەن قازاقستان»
قوستاناي
سۋرەت kstnews.kz سايتىنان الىندى
