ۆيتسە-ءمينيستردىڭ ايتۋىنشا, بارلىق زەينەتاقى اۋدارىمدارى ازاماتتاردىڭ تىكەلەي تاپقان كىرىسىنەن تولەنەدى. مىسالى, كاسىپورىن قىزمەتكەرى ءۇشىن تاپقان تابىسى —ونىڭ جالاقىسى, جەكە كاسىپكەر ءۇشىن ول كاسىپكەرلىك قىزمەتتەن تىكەلەي تۇسكەن تابىس, جەكە نوتاريۋستار ءۇشىن — بۇل ولاردىڭ كورسەتكەن قىزمەتىنەن تۇسەتىن تابىس. ال وتەلەتىن شارتتار نەگىزىندە (ازاماتتىق-قۇقىقتىق سيپاتتاعى شارتتار) قانداي دا ءبىر جۇمىس نەمەسە قىزمەت تۇرلەرىن ورىندايتىن ازاماتتار ءۇشىن مىندەتتى زەينەتاقى جارنالارى وسى جۇمىستى نەمەسە قىزمەتتى ورىنداۋ ناتيجەسى بويىنشا تۇسكەن تابىستان تولەنەدى (جەكە مۇلكىن ساتۋدان ەمەس).
«ەڭبەك جانە حالىقتى الەۋمەتتىك قورعاۋ مينيسترلىگى ءاردايىم ديالوگ ورناتۋعا ءازىر. قوعامدا دۇرىس تۇسىنىك قالىپتاسقانىن قالايمىن. الەۋمەتتىك جەلىلەردە ادامدار پاتەر مەن كولىك ساتۋدان تۇسكەن اقشادان زەينەتاقى جارنالارى ۇستالىپ قالادى دەپ جاتىر. بۇل مۇلدەم جاڭساق. بۇل تابىستاردان زەينەتاقى جارنالارى ۇستالمايدى. زەينەتاقى جارنالارى ەگەر سىزگە قىزمەت كورسەتۋ نەمەسە جۇمىستى ورىنداۋ شارتى بويىنشا تابىس تۇسكەندە عانا ۇستالىپ قالادى», — دەپ ءتۇسىندىردى ول.
س. جاقىپوۆانىڭ ايتۋىنشا, كوپتەگەن جۇمىس بەرۋشىلەر جانە جەكە تۇلعالار مىندەتتى تولەمدەر مەن زەينەتاقى جارنالارىنان جالتارۋ ءۇشىن ازاماتتىق-قۇقىقتىق سيپاتتاعى شارتتار جاساسادى, بىراق زەينەتاقى جارنالارىن ادەيى تولەمەيدى.
«ەشكىم ءوزىنىڭ زەينەتكەرلىك قامسىزداندىرىلۋى تۋرالى ويلامايدى, قارتايعان شاعىندا مۇنداي ادامدار تەك ەڭ تومەنگى كۇنكورىس دەڭگەيىن قامتاماسىز ەتۋدىڭ 50% شەگىندەگى, بازالىق زەينەتاقىنى الاتىن بولادى. بۇل شەكتەلۋى نارسە ەمەس قوي. ادامنىڭ باسقا تابىستارى بولماسا دا, مەملەكەت كومەككە كەلىپ, سىزگە تۇسەتىن تابىستى ەسكەرە وتىرىپ, اتاۋلى الەۋمەتتىك كومەكتى كورسەتەتىن بولادى», — دەدى ول.
س. جاقىپوۆا وسىعان دەيىن ايتىپ كەتكەندەي, زاڭعا بيىلعى جىلدىڭ 14 شىلدەسىندە ەنگىزىلگەن تۇزەتۋلەرگە سايكەس, ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالار ادۆوكاتتار, جەكە سوت ورىنداۋشىلارى, جەكە نوتاريۋستار, كاسىبي مەدياتورلار, جەكە كاسىپكەرلەر ءتارىزدى ءوز پايداسىنا تولەنۋى ءتيىس تابىستان بىرىڭعاي جيناقتاۋشى زەينەتاقى قورىنا مىندەتتى زەينەتاقى جارنالارىن تولەيدى.
وسىعان بايلانىستى, قر ەڭبەك جانە حالىقتى الەۋمەتتىك قورعاۋ مينيسترلىگى «قازاقستان رەسپۋبليكاسى ۇكىمەتىنىڭ كەيبىر شەشىمدەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر ەنگىزۋ تۋرالى» قازاقستان رەسپۋبليكاسى ۇكىمەتى قاۋلىسىنىڭ جوباسى ازىرلەندى, وندا سونىمەن قاتار ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالاردىڭ مىندەتتى زەينەتاقى جارنالارىنىڭ بەلگىلى ءبىر ءتارتىبى مەن تولەۋ مەرزىمدەرىن قاراستىرادى.
«بۇگىن ءبىز تەك ازاماتتىق-قۇقىقتىق سيپاتتاعى شارتتاردى زاڭنامالىق تۇرعىدان سيپاتتادىق, ويتكەنى جۇمىستاردىڭ ورىندالۋى مەن قىزمەتتەردىڭ كورسەتىلۋى بويىنشا ولار بىرنەشەۋ. زاڭ بابىن جۇكتەمەلەي بەرمەۋ ءۇشىن سايكەسىنشە بۇل نورما ۇكىمەتتىڭ قاۋلىسىندا كورىنىس تاپتى. ۇكىمەتتىڭ قۇزىرەتى زاڭنىڭ وزىندە جازىلعان. اتالعان قاۋلىدا ءبىز ازاماتتىق-قۇقىقتىق سيپاتتاعى شارتتار بويىنشا قىزمەت كورسەتەتىن جەكە تۇلعالار ءۇشىن تابىس رەتىندە جۇمىستىڭ ورىندالۋى نەمەسە قىزمەتتىڭ كورسەتىلۋى بولىپ تابىلاتىنىن باياندايمىز. رەگلامەنتكە سايكەس ول 20 تامىزعا دەيىن قابىلدانادى. كەلىسۋ پروتسەدۋراسى قازىر ءجۇرىپ جاتىر, 7-10 تامىزدا ءبىز ونى ۇكىمەتتىڭ قاراۋىنا جىبەرەمىز», — دەدى ۆيتسە-مينيستر.
سوڭىندا س. جاقىپوۆا مەملەكەتتىڭ ءوزىنىڭ بارلىق ازاماتتارىنا بازالىق, ورتاق تۇرىندە زەينەتاقىمەن قامتاماسىز ەتۋگە كەپىلدىك بەرەتىنىن جانە ينفلياتسيا دەڭگەيىندە زەينەتاقى جارنالارىنىڭ ساقتالۋىنا مەملەكەتتىك كەپىلدىك بەرەتىنىن اتاپ ءوتتى.
«ينفلياتسيالىق كىرىس قانداي بولماسىن, ەگەر ول ينفلياتسيادان تومەن بولسا, بۇل ايىرماشىلىقتى مەملەكەت سىزدەرگە تولەيتىن بولادى. بۇل ساقتالۋ مەن كەپىلدىك بارلىق ءۇش دەڭگەيدە بەرىلەدى» — دەدى ول.
