«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى.
«ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى.
تومەندە ەلىمىزدەگى ءىرى دە ىرگەلى قالا الماتىداعى مەتروپوليتەن تۋرالى فوتورەپورتاج بەرىلىپ وتىر.
تاۋەلسىزدىگىمىز تۇعىرلى, ەلدىگىمىز باياندى, حالىقتىڭ ءال-اۋقاتى جاقسى, تۇرمىسىمىز سالتاناتتى بولۋ ءۇشىن مەملەكەتىمىز ءوزىنىڭ ستراتەگيالىق دامۋ جوسپارلارىن جالعاستىرا بەرەتىن بولادى. ال ەگەمەندىگىمىزدىڭ 20 جىلدىعىنا جاسالعان ەڭ ۇلكەن تارتۋدىڭ ءبىرى – مەترو. الماتى مەتروپوليتەنىن اشقان ەلباسى نۇرسۇلتان نازارباەۆ مۇنىڭ ەلىمىز ءۇشىن تاريحي وقيعا ەكەندىگىن اتاپ كورسەتتى. ال قالا تۇرعىندارى تاۋەلسىزدىكتىڭ 25, 30, 35 جىلدىقتارىندا ونىڭ جاڭا تارماقتارى تۇساۋىن كەسىپ, ستانسالار قۇلاشىن جايا بەرەتىن بولادى دەپ ويلايدى. ەسكە سالا كەتەلىك, الماتى مەتروپوليتەنىنىڭ قۇرىلىسى 1988 جىلى 7 قىركۇيەكتە باستالعان بولاتىن. ءبىرىنشى كەزەكتىڭ ەكى جولدى ۇزىندىعى – 8,56 شاقىرىم. ورتاشا تەرەڭدىگى – 40 مەتر. جەر استى ءۇڭگىلەۋ جۇمىستارىنىڭ ۇزىندىعى – 21,74 شاقىرىم. ءبىرىنشى جەلىنىڭ قۇرامىنا ەلەكترودەپو, ينجەنەرلىك كورپۋس, قىزمەتكەرلەر بولمەسى, «رايىمبەك باتىر», «جىبەك جولى», «المالى», «اباي», «بايقوڭىر», «م.اۋەزوۆ اتىنداعى دراما تەاترى», «الاتاۋ» اتتى 7 ستانسا ەنگەن. ءبىرىنشى جەلىنىڭ جالپى سمەتالىق قۇنى – 165,9 ميلليارد تەڭگەنى قۇرايدى.
مەملەكەت باسشىسى: «بۇل قازاقستان تاريحىنداعى ەرەكشە نىسان, بۇل كەشەن ەل تاريحىنا ءوشپەستەي بولىپ جازىلادى. قازىرگى ۋاقىت – قايتالانباس ءسات. تاۋەلسىز قازاقستان جاعدايىندا قانداي كەرەمەت وقيعالارعا قول جەتكىزىپ جاتىرمىز. ەستەرىڭىزدە بولار, ءتىپتى داعدارىس كەزىنىڭ وزىندە بۇل نىساندى قارجىلاندىرۋدى توقتاتقان جوقپىز. مەترو سالۋشىلار قوبالجۋلى بولدى, جۇمىس تۇرىپ قالدى, قيىن جاعدايلاردى باستان وتكەردىك. بىراق, مەن مەترو قۇرىلىسىن ءبىر مينۋتقا دا توقتاتقان جوقپىن. بۇل جۇرتشىلىق ءۇشىن وتە قولايلى. مەترو تاۋلىگىنە 300 مىڭ ادامدى, ال جىلىنا 110 ميلليون ادامدى تاسىمالدايتىن بولادى. بۇل ەكولوگيالىق تازا كولىك, ال ستانسالار بەينەبىر كوركەم شىعارما دەرسىڭ», – دەپ اتاپ وتكەن بولاتىن.
الماتى مەتروپوليتەنى ارحيتەكتۋراسى جاعىنان دا, ساپالىق تۇرعىدان دا تمد ەلدەرى ىشىندە ەڭ ۇزدىك, ال الەمدىك دەڭگەيدە ەڭ الدىڭعى ساپتاعى ءىرى كەشەن. اۆتوماتتى جەلىلەردىڭ جوعارى دەڭگەيدە جۇمىس جاساۋىن 29 كەشەن قامتاماسىز ەتەدى. ولار – مەتروپوليتەننىڭ اۆتوماتيكا, بەلگى بەرۋ, بايلانىس جانە قاۋىپسىزدىك جۇيەلەرى بوپ تابىلادى. جىلجىمالى پويىزداردى راديوارنانى قولدانۋ ارقىلى باسقارۋ ءادىسى دە وسى مەترودا تۇڭعىش رەت قولدانىلماق. پويىزدار مەن تەحنولوگيالاردى باسقارۋ مىقتى قورعالعان ساندىق جۇيەمەن ىسكە اسسا, پويىزدار اۆتونومدى تۇردە 4 ساعاتقا دەيىن كىدىرىسسىز قىزمەت ەتە الادى. كۇزەت, ءورتتىڭ الدىن الۋ, قاۋىپسىزدىك قىزمەتتەرى قاتاڭ باقىلاۋعا الىنعان. ديسپەتچەرلىك بەينەباقىلاۋ ورتالىعى مەترونىڭ ءون بويىن قالت جىبەرمەي قاداعالايدى.
ال 2011 جىلدىڭ ناۋرىز ايىندا ەكىنشى جەلىنىڭ قۇرىلىسى باستالدى. ونىڭ قۇرامىنا «سايران», «موسكۆا», «سارىارقا», «دوستىق», «قالقامان» اتتى 5 ستانسا ەنگەن. الدىن الا ەسەپتەۋلەر بويىنشا مەترو كۇنىنە 26 مىڭ ادامعا قىزمەت كورسەتەدى دەپ جوبالانعان ەدى. ەڭ سوڭعى اقپاراتتارعا سۇيەنسەك, كۇن سايىن الماتى مەتروسى 30 مىڭنان استام جولاۋشى تاسىمالداۋدا. بۇل الدىن الا جاسالعان ەسەپتى اقتادى دەگەن ءسوز.
سونداي-اق, ءار سەنبى «جەتون كۇنى» دەپ اتالادى. بۇل كۇندەرى جولاۋشىلار پايدالانىپ ۇلگەرمەگەن جەتوندارىمەن ساپار شەگۋىنە بولادى. مەترودا پوليتسيا قىزمەتكەرلەرى قانداي دا ءبىر كەلەڭسىزدىكتەر مەن تارتىپسىزدىكتەردىڭ الدىن الىپ, جولاۋشىلار قاۋىپسىزدىگىن قامتاماسىز ەتەدى.
ايناش ەسالي,
الماتى.
سۋرەتتەردى تۇسىرگەن نۇرعيسا ەلەۋبەكوۆ.
