اتالعان ءىس-شاراعا, سونداي-اق قاراعاندى وبلىسىنىڭ اكىمى ەرلان قوشانوۆ, پارلامەنت دەپۋتاتتارى, قازاقستان قارۋلى كۇشتەرىنىڭ ارداگەرلەرى, «جاس سارباز» اسكەري-پاتريوتتىق قوعامدىق قوزعالىسى رەسپۋبليكالىق شتابىنىڭ مۇشەلەرى, مەملەكەتتىك ورگاندار, قوعامدىق بىرلەستىكتەر وكىلدەرى, اسكەري-پاتريوتتىق كلۋبتاردىڭ, رەسپۋبليكالىق «جاس ۇلان» مەكتەبىنىڭ جانە وبلىستارداعى اسكەري مەكتەپ-ينتەرناتتاردىڭ 600-دەن استام تاربيەلەنۋشىسى قاتىستى.
مەملەكەتتىك حاتشى ءوزىنىڭ قۇتتىقتاۋ لەبىزىندە ەلباسى, قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ: «مەملەكەت ءاردايىم ءوز قاۋىپسىزدىگىن جانە شەكاراسىنىڭ بەرىكتىگىن ويلاۋعا ءتيىس» دەگەن سوزىنە نازار اۋداردى.
– سوندىقتان ءاربىر قازاقستاندىق ءاردايىم جاۋاپتى ءارى مارتەبەلى ميسسياعا – تۋعان ەلىن, قازاقستانىمىزدى قورعاۋعا دايىن بولۋى كەرەك دەپ سانايمىن. بۇل – كەز كەلگەن ازاماتتىڭ قاستەرلى بورىشى عانا ەمەس, ەڭ الدىمەن, وتان قورعاۋ جولىندا ماڭگىلىك داڭققا, حالىق سۇيىسپەنشىلىگىنە بولەنگەن بابالارعا, اكەلەرىمىز بەن اتالارىمىزعا دەگەن تاعزىم مەن قۇرمەتتىڭ بەلگىسى, – دەدى گۇلشارا ابدىقالىقوۆا.
ال قورعانىس ءمينيسترىنىڭ ورىنباسارى تالعات مۇحتاروۆ ەلىمىزدىڭ دامۋى مەن كەلەشەگى جاستارعا تىكەلەي بايلانىستى ەكەندىگىن اتاپ ءوتتى.
– جاستارعا تاربيە بەرۋ ىسىندە اسكەري-پاتريوتتىق جۇمىستىڭ ءمانى وتە زور. سوندىقتان جاستاردىڭ ۇلكەن جيىنىن وتكىزىپ كەلەمىز. بيىلعى جيىننىڭ ەرەكشەلىگى – قارۋلى كۇشتەردىڭ, سونداي-اق ۇلتتىق قاۋىپسىزدىك كوميتەتىنىڭ شەكارا قىزمەتىنە قاراستى اسكەري بولىمدەرى مەن مەكەمەلەرى جانىنان قۇرىلعان اسكەري-پاتريوتتىق جيىنداردىڭ تاربيەلەنۋشىلەرىنىڭ قاتىسۋى بولىپ وتىر, – دەدى ت.مۇحتاروۆ.
ونىڭ ايتۋىنشا, سوڭعى جىلدارى ەلىمىزدىڭ اۋماعىندا كادەت سىنىپتارى كوپتەپ اشىلا باستاعان. اتاپ ايتقاندا, مينيسترلىك جۋىردا عانا استانا اكىمدىگىمەن بىرلەسىپ ەلوردانىڭ 20 جىلدىعىنا بايلانىستى 30 كادەت سىنىبىن اشتى. مۇنداي توپقا قابىلدانعان جاستار باسقا پاندەرمەن بىرگە, اسكەري ماماندىقتىڭ قىر-سىرىن, قويان-قولتىق ۇرىس تاسىلدەرىن, روبوت تەحنيكاسىنىڭ نەگىزدەرىن ۇيرەنۋدە.
– ءبىزدى جاستار اراسىندا ءومىرىن اسكەري سالامەن بايلانىستىرعىسى كەلەتىن ورەندەردىڭ كوپتىگى قۋانتادى. ولاردىڭ قازىردىڭ وزىندە وتان قورعاۋشىلارمەن ءبىر ساپتا تۇرۋعا قۇلشىنىستارى جوعارى. وسى ءارى كۇردەلى, ءارى مارتەبەلى ماماندىقتى تاڭداۋعا اسكەري-پاتريوتتىق تاربيە بەرۋ ورتالىقتارىنىڭ اسەرى مول, – دەدى گەنەرال-لەيتەنانت.
سونىمەن قاتار قورعانىس مينيسترلىگىنىڭ دەرەكتەرىنە قاراعاندا, استانادا قازاقستاننىڭ تۇڭعىش پرەزيدەنتى, قازاقستان قارۋلى كۇشتەرىنىڭ جوعارعى باس قولباسشىسى اتىنداعى اسكەري-پاتريوتتىق باعىتتاعى دەمالىس جانە مادەنيەت ساياباعىن سالۋ جوسپارلانعان.
ءىس-شاراعا قاتىسۋشىلارعا قۇتتىقتاۋ ءسوزىن ارناعان قاراعاندى وبلىسىنىڭ اكىمى ەرلان قوشانوۆ تا «ايبىن» جيىنىنىڭ پاتريوتتار ۇستاحاناسىنا اينالعاندىعىن اتاپ ءوتتى. سونىمەن قاتار وبلىس اكىمى بارلىق قاتىسۋشىلارعا وسى ايتۋلى شارانىڭ ءتيىمدى ءارى پايدالى بولۋىنا تىلەكتەستىگىن ءبىلدىردى.
«ايبىن» جيىنىنا ەلىمىزدىڭ تۇپكىر-تۇپكىرىنەن جينالعان جاستاردىڭ بارلىعى دەرلىك ايماقتارداعى اسكەري-پاتريوتتىق جيىنداردىڭ جەڭىمپازدارى بولدى. ولارعا ءىس-شارانىڭ اشىلۋ راسىمىندە قازاقستان رەسپۋبليكاسى قارۋلى كۇشتەرىنىڭ بولىمشەلەرى تاراپىنان جاس پاتريوتتارعا اسكەري ونەردىڭ قيمىل-ارەكەتتەرى كورسەتىلدى. اسىرەسە, ىقتيمال قارسىلاستارعا اۋەدەن جانە جەردەن جاسالاتىن سوققىلاردىڭ, اسكەري قاس شەبەرلەردىڭ ونەرلەرىن تاماشالاعان جەتكىنشىكتەر ەرەكشە اسەرگە بولەندى. سولاردىڭ قاتارىنداعى اقتوبەلىك الىشەر قارتباي اكەسىنىڭ جولىن قۋىپ اسكەري سالاعا تاڭداۋ جاساعاندىعىن, ەندى جيىنداعى كورىنىستەردەن كەيىن كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىس كۇشتەرى اسكەري ينستيتۋتىنا وقۋعا ءتۇسىپ, اسكەري ۇشقىش اتانۋعا تۇپكىلىكتى شەشىم قابىلداعانىن جەتكىزدى.
– ايماقتاردا وسى جيىنعا كەلۋدىڭ ءوزى وڭايعا سوققان جوق. الايدا وبلىستىق جيىندا بيىك كەرمەگە 25 رەت تارتىلىپ, اۆتوماتتى قارۋدى 13 سەكۋندتا جارتىلاي بولشەكتەپ-قۇراستىرىپ جەڭىمپازداردىڭ قاتارىنان كورىندىم. ال «ايبىن» جيىنىنداعى كورىنىستەر مەنىڭ ارمانىما قانات ءبىتىردى, – دەيدى ءا.قارتباي. ال وسى الىشەردىڭ بويىنداعى سەزىم ۇشقىنى بارلىق قاتىسۋشىلاردىڭ جانارلارىنان بايقالىپ تۇرعاندىعىن دا ايتا كەتۋ كەرەك.
جالپى بەس كۇنگە سوزىلاتىن «ايبىن» رەسپۋبليكالىق اسكەري-پاتريوتتىق جاستار جيىنىنىڭ جوسپارىنا سايكەس قارۋلى كۇشتەر قۇرامىنا كىرەتىن اسكەر تۇرلەرى وكىلدەرىنىڭ جيىنعا قاتىسۋشىلارمەن « ۇلى دالا اسكەرى – «ماڭگىلىك ەل» تىرەگى!» اتتى تاقىرىپتاعى ينتەراكتيۆتى كەزدەسۋى, سونىمەن قاتار «ايبىن دارىنى» زياتكەرلىك ويىنى, روبوت تەحنيكاسى بويىنشا «مەنىڭ روبوتىم» كونكۋرسى, الاۋ تۇبىندە «ايبىن جالىنى» اتتى قىزىقتى كەش, سپورتتىڭ اسكەري-قولدانبالى تۇرلەرىنەن جانە جاۋىنگەرلىك دايىندىق پاندەرىنەن كوپتەگەن سايىستار ۇيىمداستىرىلدى.
تاربيەلەنۋشىلەر, سونداي-اق اسكەري-پاتريوتتىق جاستار جيىنى اياسىندا اسكەري دايىندىق مەكتەبىنەن ءوتىپ, اسكەري تەحنيكانىڭ جانە قازاقستان اسكەرىندەگى قارۋ-جاراقتىڭ زاماناۋي ۇلگىلەرىمەن تانىستى.
سونىمەن قاتار جيىن اياسىندا «ايبىن – جۇلدىزدىق مەكەنى» بەلگىسى مەن «تىلەك ءبىلدىرۋ اعاشىنىڭ» سالتاناتتى اشىلۋى دا ءوتتى.
سوڭىندا مەملەكەتتىك حاتشى جيىنعا قاتىسۋشىلارعا سايىستاردىڭ جاقسى وتۋىنە, ءاردايىم رۋح سەرگەكتىگى مەن ەرىك-جىگەرلەرىن كورسەتۋىنە, ەشقاشان جەڭىستەن ءۇمىت ۇزبەي, قازاقستاننىڭ ناعىز پاتريوتتارى بولۋىنا نيەتتەستىگىن ءبىلدىرىپ, تولاعاي تابىس تىلەدى.
اتاپ وتەرلىگى, ەلىمىزدىڭ اۋماعىندا «جاس سارباز» اتتى اسكەري-پاتريوتتىق قوعامدىق قوزعالىس قۇرىلىپ, ءاربىر وبلىستا بولىمشەلەرى اشىلىپ, بۇگىندە 73 مىڭنان اسا بالانىڭ باسىن بىرىكتىرىپ تابىستى جۇمىس ىستەۋدە.
قوعامدىق قوزعالىس ارقىلى بۇگىنگە دەيىن اسكەري-پاتريوتتىق تاربيە بەرۋ سالاسىندا بۇكىلرەسەيلىك «يۋنارميا» اسكەري-پاتريوتتىق قوزعالىسىمەن, قىزىلوردا وبلىسىنىڭ اكىمدىگىمەن ىنتىماقتاستىق تۋرالى مەموراندۋمعا قول قويىلعان. ءدال وسىنداي قۇجاتقا ءتورتىنشى جيىن اياسىندا قاراعاندى وبلىسىنىڭ اكىمدىگىمەن ارادا قول قويىلدى.
سەرىك ابدىبەك,
«ەگەمەن قازاقستان»
