كەڭەس بارىسىندا جاڭا ەكونوميكا تالاپتارىنا سايكەس ەڭبەك نارىعىن دامىتۋ, دەنساۋلىق ساقتاۋ, ءونىمدى جۇمىسپەن قامتۋ بويىنشا ءى جارتى جىلدىقتىڭ الدىن الا ەسەبى مەن 2018 جىلعى جوسپارلار تىڭدالدى.
دەنساۋلىق ساقتاۋ ءمينيسترى ە. ءبىرتانوۆ باسەكەلەستىكتى جانە جەكە مەديتسينانى دامىتۋ, ءدارى-دارمەك نارىعىن, مەديتسينالىق ءتۋريزمدى جانە يمپورتتى الماستىرۋدى ارتتىرۋ, نەگىزگى اۋرۋلاردىڭ اۋىرتپالىعىن تومەندەتۋ جانە دەنساۋلىق ساقتاۋ جۇيەسىنىڭ بىرىڭعاي اقپاراتتىق كەڭىستىگىن قۇرۋ تۋرالى باياندادى.
دەنساۋلىق ساقتاۋ سالاسىندا وسى جىلدىڭ ءى جارتى جىلدىعىنىڭ قورىتىندىسى بويىنشا 73 نىسان قۇرىلىسى, 46 نىساندا كۇردەلى جوندەۋ جۇمىستارى, 4 نىساندا رەكونسترۋكتسيالاۋ, سونداي-اق جابدىقتاردى جاڭارتۋ جانە ساتىپ الۋ جۇمىستارى باستالدى. تەكسەرتۋلەردى قىسقارتۋعا, سۋبەكتىلەردىڭ قىزمەتىنە لاۋازىمدى تۇلعالاردىڭ ارالاسۋىنا جاعداي جاساۋ ارقىلى بيزنەسكە كورسەتىلەتىن قىسىمدى تومەندەتۋ ءۇشىن 13 باقىلاۋ جانە قاداعالاۋ فۋنكتسيالارى شەكتەلدى. حالىقتىڭ تسيفرلىق ساۋاتتىلىعىن ارتتىرۋ ءۇشىن ەمحانالاردا 209 تسيفرلىق پوست قۇرىلدى, رەسپۋبليكانىڭ بارلىق وڭىرلەرىندە العاشقى مەديتسينالىق-سانيتارلىق كومەكتىڭ وزىق تاجىريبەلەرىنىڭ ورتالىقتارى اشىلدى جانە 118 مەديتسينالىق ۇيىمدا اۋرۋلاردى ەمدەۋ باعدارلاماسى ەنگىزىلدى.
ناتيجەلى جۇمىسپەن قامتۋ ماسەلەلەرى بويىنشا ەڭبەك جانە حالىقتى الەۋمەتتىك قورعاۋ ءمينيسترى م. ابىلقاسىموۆا ەڭبەك رەسۋرستارىنىڭ اعىنىن جوسپارلاۋ, بولجاۋ جانە باسقارۋ, كادرلاردى دايىنداۋ جانە قايتا دايارلاۋ, حالىقتى ءونىمدى جۇمىسپەن قامتۋعا تارتۋ جانە ەڭبەك نارىعىنىڭ ينفراقۇرىلىمىن جاڭعىرتۋ تۋرالى ايتىپ بەردى.
ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا مەملەكەتتىك قولداۋ شارالارىمەن 290 مىڭ جۇمىسسىز جانە ناتيجەسىز ءوزىن-ءوزى جۇمىسپەن قامتىعان ازاماتتار قامتىلدى, ولاردىڭ ىشىندە 243 مىڭ ادام جۇمىسقا ورنالاستىرىلدى, ونىڭ 158 مىڭى تۇراقتى جۇمىس ورىندارىنا ورنالاستى. ەلەكتروندىق ەڭبەك بيرجاسى ەلىمىزدىڭ بارلىق وڭىرلەرىندە ىسكە قوسىلدى, سونىڭ ارقاسىندا 160 مىڭ ادام جۇمىسقا ورنالاستى, 45 جەكە جۇمىسپەن قامتۋ اگەنتتىگى قوسىلدى.
