«قازاقستاندى كوركەيتۋ جانە ەلىمىزدىڭ ستراتەگيالىق ماقساتىنا جەتۋ جولىندا اۋقىمدى جۇمىستار اتقارىلۋدا. ەكونوميكانى يندۋستريالاندىرۋ, ءارتاراپتاندىرۋ بەلسەندى جۇرگىزىلۋدە. مەملەكەتتىڭ ءۇشىنشى جاڭعىرۋ باستاماسى تسيفرلاندىرۋ باعدارلاماسىمەن جۇزەگە اسىرىلۋدا. وسى ورايدا «استانا» حالىقارالىق قارجى ورتالىعى - نەگىزگى رەفورمالار مەن وزگەرىستەردىڭ ماڭىزدى بۋىنى. ونىڭ قىزمەتىنە ساتتىلىك تىلەيمىن. باس قالامىز استانانىڭ 20 جىلدىق مەرەيتويى قۇتتى بولسىن! بارشالارىڭىزعا زور دەنساۋلىق, تابىس تىلەيمىن!», دەدى ەلباسى.
قارجى ورتالىعىنىڭ رەسمي اشىلۋى Astana Finance Days فورۋمىنىڭ نەگىزىندە ءوتىپ جاتىر. سالتاناتتى شاراعا ءابۋ ءدابيدىڭ مۇراگەر حانزاداسى شەيح مۇحاممەد بەن زايد ءال ناحايان, ءىرى حالىقارالىق كومپانيالاردىڭ باسشىلارى, عىلىمي ورتا مەن ساراپشىلىق ورتالىقتاردىڭ ساراپشىلارى كەلدى.
«استانا» حالىقارالىق قارجى ورتالىعىن قۇرۋ تۋرالى كونستيتۋتسيالىق زاڭعا قازاقستان پرەزيدەنتى نۇرسۇلتان نازارباەۆ 2015 جىلعى جەلتوقساندا قول قويعان بولاتىن.
