بۇل باسقارمادا ماگيسترالدىق مۇناي قۇبىرلارى جۇيەسى بويىنشا مۇناي اعىنىن باسقارۋ ورتالىقتاندىرىلعان جانە تسيفرلاندىرىلعان.
باس ديسپەتچەرلىك باسقارماسى «قازترانسويل» اق-عا مۇنايدى قابىلداۋدى جانە تاپسىرۋدى, «اقتاۋ» پورتى مەن كومپانيانىڭ تەمىرجول ەستاكادالارىندا مۇناي قۇيۋدى ونلاين رەجيمدە قاداعالاۋعا مۇمكىندىك بەرەدى. وسى ارقىلى «قازترانسويل» اعىندى ديسپەتچەرلىك باقىلاۋ جانە باسقارۋ SCADA جۇيەسىن ەنگىزۋ بويىنشا جوبانى تولىق جۇزەگە اسىرادى. باسقارۋدىڭ بۇل ءادىسى ماگيسترالدى مۇناي قۇبىرلارىن الىس قاشىقتىقتان سەنىمدى تۇردە باسقارۋعا جانە باقىلاۋعا مۇمكىندىك بەرەتىن ۇزدىك الەمدىك تاجىريبەلەر نەگىزىندە جۇزەگە اسىرىلىپ وتىر.
«قازترانسويل» كومپانياسىنداعى تسيفرلىق تەحنولوگيالار ەلىمىزدەگى مۇنايدى مۇناي وندەۋ زاۋىتتارىنا جەتكىزۋدى, قارا جانە بالتىق تەڭىزدەرىنىڭ پورتتارى ارقىلى قىتايعا جانە وزبەكستانعا ەكسپورتتاۋدى باسقارۋعا, سونداي-اق رەسەيلىك مۇنايدى قحر مەن وزبەكستانعا ترانزيتتەۋگە جاڭا مۇمكىندىكتەر بەرەدى.
بۇرىن «قازترانسويل» اق-داعى ديسپەتچەرلىك باسقارما قۇرىلىمى جەرگىلىكتى ديسپەتچەرلىك پۋنكتەر (جدپ), اۋداندىق ديسپەتچەرلىك پۋنكتەر, ورتالىق ديسپەتچەرلىك پۋنكتەر جانە استاناداعى باس ديسپەتچەرلىك باسقارما (بدب) دەپ اتالاتىن ءتورت دەڭگەيلى ساتىدان تۇرعان. الايدا جاڭا تسيفرلىق تەحنولوگيالار قازىرگى ۋاقىتتا باسقارۋدىڭ ەكى ءتاسىلىن قىسقارتىپ, قۇرىلىمدى تەك جدپ مەن بدب ارقىلى باسقارۋعا مۇمكىندىك بەردى.
سونىمەن قاتار, «سامۇرىق-قازىنا» ۇلتتىق ءال-اۋقات قورى» اق باسقارما توراعاسى احمەتجان ەسىموۆ قايتا قالپىنا كەلتىرۋ جۇمىستارى جۇرگىزىلگەن اقتوبە وبلىسىنداعى «كەڭقياق» باس مۇناي ايداۋ ستانساسىن تسيفرلى تەحنولوگيالار ارقىلى باس ديسپەتچەرلىك باسقارمادان ىسكە قوستى. «بۇل - ۇلكەن شارا. وسى جوبانىڭ ءساتتى جۇزەگە اسۋىمەن بارلىعىڭىزدى قۇتتىقتايمىن. بۇل تەك «قازترانسويل» ءۇشىن عانا ەمەس, ەلىمىز ءۇشىن دە وتە ماڭىزدى ءارى كەلەشەگى زور جوبا», دەدى ا. ەسىموۆ.
ال «قازترانسويل» اق باس ديرەكتورى ديماش دوسانوۆ بۇل مۇناي ايداۋ ستانتسياسى قازاقستاننىڭ قىتايعا مۇناي تاسىمالىن 20 ملن تونناعا دەيىن ارتتىرۋعا مۇمكىندىك بەرەتىنىن ايتىپ ءوتتى. «كەڭقياق» باس مۇناي ايداۋ ستانساسىنىڭ ىسكە قوسىلۋى قازاقستاندىق مۇنايدى قحر-عا ەكسپورتتاۋ كولەمىن ۇلعايتۋعا, باتىس قازاقستان مۇنايىن وتاندىق ءموز-دەرگە تاسىمالداۋدى قامتاماسىز ەتۋگە مۇمكىندىك بەرەدى. جاقىن ارادا باتىس قازاقستاننىڭ كەن ورىندارىنداعى مۇناي پاۆلودار, شىمكەنت مۇناي وڭدەۋ زاۋىتتارىنا جانە قحر-عا ەكسپورتقا جونەلتىلەتىن بولادى. وسىلايشا قازاقستاننىڭ ەكسپورتتىق الەۋەتى ۇلعايتىلماق», دەدى ول.
ديسپەتچەرلىك ورتالىقتا ءبىر اۋىسىمدا 9 ديسپەتچەر تاۋلىك بويى جۇمىس ىستەيدى. جالپى مۇناي ايداۋ ستانساسىنىڭ پروتسەسىنە ۇزدىكسىز مونيتورينگ جاساۋ ءۇشىن بۇل ورتالىقتا بارلىعى 47 ادام قىزمەت ەتەدى. مەنەدجەرلەر دياگراممالار كومەگىمەن نەگىزگى جانە قوسالقى جابدىقتىڭ, مۇناي قۇبىرلارىنىڭ پارامەترلەرىن باقىلايدى. سونىمەن قاتار, بۇل ديسپەتچەرلىك ورتالىق مۇناي قۇبىرىنىڭ ماڭىندا اتقارىلىپ جاتقان بارلىق جۇمىستاردى جانە قۇبىر بويىنداعى اقاۋلاردىڭ بارلىعىن تەكسەرىپ وتىرۋعا مۇمكىندىك بەرەدى.
ءمادينا جالەلقىزى,
«ەگەمەن قازاقستان»
