بايقاۋعا رەسپۋبليكامىزدىڭ بارلىق وڭىرلەرىنەن جانە قىتاي, بەلارۋس, رەسەي, قىرعىزستان, وزبەكستان, ازەربايجان جانە تۇركيا سەكىلدى ەلدەردەن ەڭ دارىندى بالالار ۆوكال, حورەوگرافيا, مانەرلەپ وقۋ جانە اسپاپتا ورىنداۋ تۇرلەرى بويىنشا 400-دەن استام ونەرپاز قاتىستى.
جارىس قورىتىندىسىندا تومەندەگى جەڭىمپازدار انىقتالدى. «كوركەم وقۋ» اتالىمى – نۇرقوجا تىلەك (قىزىلوردا وبلىسى), «حالىق ءبيى» – راتمير دجۋماليەۆ (الماتى قالاسى), ء«داستۇرلى ونەر» (جەكە ورىنداۋشىلىق)» – سۇلتان الىمقۇل (جامبىل وبلىسى), «كلاسسيكالىق ونەر» – كاميلا ىدىرىسوۆا, ء«داستۇرلى ونەر» (انسامبل)» – «جەتىگەن» ءانسامبلى (تۇركىستان وبلىسى), ء«داستۇرلى ءان» – ايجان ءىلياسوۆا, «ەسترادالىق ءان» نوميناتسياسى – كارينا باسيتوۆا (الماتى قالاسى), «اكادەميالىق ءان» –اڭسار ءجۇسىپ (اقتوبە وبلىسى).
فەستيۆالدىڭ باس جۇلدەسىن مادەنيەت جانە سپورت ءمينيسترى ارىستانبەك مۇحامەدي ۇلى قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ اتىنان اق ءرويالدى اڭسار جۇسىپكە تابىستادى.
ايتا كەتەيىك, باس جۇلدە يەلەنگەن اڭسار ءجۇسىپ اقتوبە وبلىسىنىڭ تۋماسى. اڭسار «اكادەميالىق ءان» اتالىمى بويىنشا بايقاۋعا قاتىسىپ, مىقتىلاردىڭ قاتارىنان تابىلدى. ول اقتوبەدەگى №1 بالالار مۋزىكالىق مەكتەبىندە «ۆوكال» بولىمىنەن ءدارىس العان.
«ەگەمەن-اقپارات»
