مۇندايدا دۇرىسى قازاعىمىزدىڭ ءداستۇرلى سۋسىنى قىمىز, قىمىرانعا ەشتەڭە جەتپەيدى. ءشولىڭدى تەز قاندىراتىن تارى, بيداي, جۇگەرى كوجە بار. گازدالعان سۋسىنداردىڭ زيانىن ءبىلىپ قالعان جۇرت بۇگىندە وسى سۋسىندارعا ويىسۋدا.
قىمىز, قىمىران سۋپەرماركەتتەردە ساتىلىمعا ءتۇسىپ جاتىر. بىراق, اشىعان كوجە جوقتىڭ قاسى. ىسكەر ادامدار ونىڭ دا ويابىن تابادى ەكەن. جاڭاقورعان اۋدانى, كەيدەن اۋىلىنىڭ تۇرعىنى قاسىم ءابجاپپاروۆ جۇگەرىدەن سۋسىن دايىنداپ, دۇكەن جەلىسىنە شىعارىپ وتىر. اتى – «كاۋسار».
قاسەكەڭ اۋەلدە جۇگەرىنى ءتۇيىپ, ساۋدا ورتالىقتارىنا وتكىزىپ جۇرەدى. قالاعا ءبىر بارعانىندا جۇگەرىدەن پوپكورن جاسايتىن قوندىرعىنى كورىپ, سونى جاساماققا قىزىعادى. اۋەلدە جۇگەرىنى ساتىپ, ارتىنان پوپكورنعا وتكەن ازامات بيزنەسىن جانداندىرۋدىڭ باسقا دا امالدارىن ىزدەي باستايدى. گازدالعان سۋسىنداردان ەلدىڭ بەتى قايتقان كەزى. شىلىڭگىر شىلدەدە شولىركەگەن جۇرت اشىمالعا قۇمار. وسىنىڭ ءبارىن وي ەلەگىنەن وتكىزگەن جىگىت اعاسى جۇگەرىدەن سۋسىن دايىنداپ كورەدى. كوشە-كوشەنىڭ بويىندا ساتىلاتىن كۇندىك سۋسىن ەمەس, دۇكەندەر جەلىسىندە ساتۋعا قولايلى سۋسىن.
قازاقتىڭ تاعامتانۋ ينستيتۋتى ءابجاپپاروۆتار وتباسى دايىنداعان سۋسىن قۇرامىندا پايدالى دارۋمەندەردىڭ مولدىعىن ايتىپ, جاقسى قورىتىندى بەرەدى.
جاڭا جوبا قيالىن سامعاتقان قاسىم ءابجاپپاروۆ «بيزنەستىڭ جول كارتاسى-2020» باعدارلاماسىنا قاتىسىپ, گرانت جەڭىپ الادى. بۇل – جاڭا بيزنەستىك جوبانى قۋاتتايتىن, قايتارىلمايتىن قارجى. وسى قاراجاتقا كەرەكتى قوندىرعىلاردى, سىرتقى قورابىن دايىندايتىن اپپارات ساتىپ الادى.
تازا ونىمنەن دايىندالعان, قۇرامىندا پايدالى دارۋمەندەرى كوپ «كاۋسار» بۇگىندە ساۋدا جەلىلەرىندە ساتىلادى. اۋىلدا وتىرىپ-اق ۇلكەن نارىققا كىرگەن ازامات بولاشاقتا قاۋىن مەن قاربىز سۋسىندارىن شىعارماققا نيەتتەنىپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
