اتالعان شاراعا استانا قالاسىنان, تاراز قالاسىمەن قاتار وبلىس اۋداندارىنان قوناقتار قاتىستى. جيىنعا جينالعان كوپشىلىك اۋەلى اۋدان ورتالىعىنداعى «جاستار» ساياباعىن ارالاپ, «جۋالى اۋدانىنىڭ قۇرمەتتى ازاماتتارى» اللەياسىن قىزىعا تاماشالادى. سونىمەن قاتار بۇل كۇنى جۋالىلىقتار قۇرىلىس جۇمىستارى جۇرگىزىلىپ جاتقان «ماڭگىلىك ەل» ساياباعىنداعى تۇيەگە ارناپ تۇرعىزىلعان ەڭسەلى ەسكەرتكىشتىڭ اشىلۋ سالتاناتىنا كۋا بولدى.
بۇدان ءارى ءداستۇرلى قىمىزمۇرىندىق مەرەكەسى اقساي اۋىلدىق وكرۋگىندەگى باۋىرجان مومىش ۇلى ساياباعىندا جالعاسىن تاپتى. شارانى اۋدان اكىمى باقتيار كوپبوسىنوۆ ءسوز سويلەپ اشىپ, اتالعان ءداستۇرلى فەستيۆالدىڭ استانا قالاسىنىڭ 20 جانە جۋالى اۋدانىنىڭ 90 جىلدىعىمەن بايلانىس-
تىرىلا ءوتىپ وتىرعانىن جەتكىزدى. ءوز سوزىندە وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ جۋالى جەرىنىڭ جايساڭ تابيعاتىن, حالقىنىڭ دارحان پەيىلىن اتاپ ءوتتى. ال تالاس اۋدانىنىڭ قۇرمەتتى ازاماتى, اقكول اۋىلدىق ارداگەرلەر كەڭەسىنىڭ توراعاسى تۇرعىنبەك تاشىبەكوۆ كوپشىلىككە ارناپ باتا بەردى.
جۋالى جەرى داڭقتى باتىر باۋىرجان مومىش ۇلىن دۇنيەگە اكەلگەن توپىراق. سوندىقتان دا مەرەكەگە جينالعان كوپشىلىك باتىر ەسكەرتكىشىنە گۇل شوقتارىن قويىپ, رۋحىنا تاعزىم ەتتى. سونداي-اق مۇندا جينالعان كوپشىلىك قاز-قاتار تىگىلگەن كيىز ۇيلەرگە كىرىپ, بال قىمىزدان ءدام تاتتى. جالپى, قىمىزمۇرىندىق مەرەكەسىنە ارنايى ءبىر توننا قىمىز دايىندالعان ەكەن. ال قىمىز قۇيىلعان توستاعانداردى ۇستاعان قىرىق كەلىنشەك قاريالارعا ءيىلىپ سالەم سالىپ, قىمىز ۇسىندى. اق كيمەشەك كيگەن اجەلەر تاتتىدەن شاشۋ شاشتى. مەرەكە اياسىندا قازاقستاننىڭ قۇرمەتتى ءجۋرناليسى ماقۇلبەك رىسداۋلەت اۋدان تاريحىنا توقتالدى.
مەرەكە كەزىندە وبلىستىڭ اۋداندارىنان كەلگەن باتاگوي قاريالار بايگەگە ءتۇسىپ, جاستارعا ۇلگى كورسەتتى. سونىمەن قاتار تەرمەشىلەردىڭ, جازبا اقىنداردىڭ بايقاۋى دا تارتىستى ءوتىپ, كوپشىلىكتىڭ قىزىعۋشىلىعىن تۋدىردى. ال قىمىز باپتاۋشىلار مەن قىمىزقۇمارلاردىڭ جارىسى فەستيۆالدىڭ اجارىن اشا ءتۇستى. بۇدان كەيىن كوپشىلىك تەڭگە ءىلۋ, قىز قۋ سياقتى ۇلتتىق ويىنداردى تاماشالادى.
حاميت ەسامان,
«ەگەمەن قازاقستان»
جامبىل وبلىسى
