تورقالى توي الدىندا «اسا» باسپا ءۇيى» جشس شىعارعان «تاريحتىڭ ءوشپەس بەتتەرى» اتتى البوم تاۋەلسىزدىك جىلدارىندا تۇرعىزىلعان ەسكەرتكىشتەرىمىزدى بەينەلەۋگە ارنالعان. «قولدارىڭىزداعى باسىلىمدا ءتاۋەلسىزدىك العالى جيىرما جىل ىشىندە قازاقستاندا دۇنيەگە كەلگەن ءمۇسىن ونەرىنىڭ تاڭداۋلى ەسكەرتكىشتەرىنىڭ فوتوسۋرەتتەرى قامتىلعان. رەسپۋبليكا تاريحىنداعى ەلەۋلى وقيعالار مەن تراگەديالىق كەزەڭدەرگە, تاريحي تۇلعالار مەن مەملەكەت جانە قوعام قايراتكەرلەرىنە ارنالعان ەسكەرتكىشتەر جانىنا ولار تۋرالى قىسقاشا تۇجىرىمدى ماعلۇماتتار, ەل اۋزىنداعى قاناتتى سوزدەر جانە تاريحي تۇلعالاردىڭ وزدەرىنەن قالعان ۇلاعاتتى وي-پىكىرلەر, ايتۋلى سوزدەر قوسا بەرىلگەن. باسىلىم تاريحي قۇندىلىقتاردى باعالاۋشى قالىڭ وقىرمانعا ارنالعان», دەلىنگەن كىتاپ-البومنىڭ اننوتاتسياسىندا. البوم بەتتەرىنەن حالقىمىزدىڭ ارعى-بەرگى تاريحىنداعى ايتۋلى تۇلعالاردى دا, ەلىمىزدىڭ عىلىم مەن مادەنيەتىندە ەرەكشە ءىز قالدىرعان بەلگىلى قايراتكەرلەردى دە تابا الاسىز. ءار ءمۇسىننىڭ تۇسىندا قىسقا دا نۇسقا ماتىنمەن تۇلعانىڭ ءومىر سۇرگەن ۋاقىتى, اتقارعان يگىلىكتى ءىسى, جاساعان ەرلىگى تۋرالى ايتىلعانى وتە ورىندى شىققان. كىتاپ-البومنىڭ تاعى ءبىر قۇندى قىرى – ەلىمىزدەن تىس جەرلەردە ورناتىلعان ءمۇسىن ەسكەرتكىشتەرىن دە قامتيتىندىعى. مىسالى, ەلباسىمىز نۇرسۇلتان نازارباەۆقا قىرعىزستاننىڭ شولپاناتا قالاسىندا تۇرعىزىلعان ەسكەرتكىشتىڭ فوتوسىن كوپتەگەن وقىرمانداردىڭ العاش رەت وسى كىتاپتان كورەتىنى كۇمانسىز.
«تاريحتىڭ وشپەس بەتتەرى» كىتاپ-البومى تاۋەلسىزدىكتىڭ بىزگە بەرگەن سىيلارىنىڭ ءبىرى – ەلدىگىمىزدى ەڭسەلەندىرەتىن ەسكەرتكىشتەردى ءوز قالاۋىمىزشا تۇرعىزۋ مۇمكىندىگىن العانىمىز ەكەندىگىن تانىتادى. كىتاپتى وقي وتىرىپ, ءبىزدىڭ ەلدىك سانامىزدىڭ وسى جىلداردا ورنىعۋىنا ءمۇسىن ونەرىنىڭ دە وزىندىك ۇلەس قوسقانىن انىق كورەمىز.
«ەگەمەن-اقپارات».
