بيىلعى بايراقتى باسەكەگە ەۋروپا, ازيا, افريكا قۇرلىعىندا ورنالاسقان 10 ەلدىڭ ەڭ ۇزدىك اتلەتتەرى قاتىستى. اتاپ ايتار بولساق, قازاقستان, گرۋزيا, يران, ازەربايجان, تاجىكستان, قىرعىزستان, وزبەكستان, سيريا, تۇرىكمەنستان مەن كەنيادان 300-گە جۋىق سپورتشى قاشىقتىققا جۇگىرۋ, سەكىرۋ, يادرو لاقتىرۋ, لاقتىرۋ (نايزا, ديسك, بالعا) سايىستارىنان باق سىنادى.
جارىستىڭ العاشقى كۇنىندەگى 100 مەترگە جۇگىرۋدەن قىزدار اراسىنداعى سايىستا ەلىمىزدىڭ قازىرگى تاڭداعى ۇزدىك سپرينتەرى ۆيكتوريا زيابكينا چەمپيون اتانسا, 400 مەترگە جۇگىرۋدەن شىعىس قازاقستان وبلىسىنىڭ سپورتشىسى ەلينا ميحينا جەڭىسكە جەتتى. ال 1500 مەتردەگى سايىستا Altay athletics كلۋبىنىڭ كەنيالىق اتلەتى كارولين كيپكيرۋي ەشكىمگە مۇمكىندىك قالدىرعان جوق. 100 مەترگە كەدەرگىلەر ارقىلى جۇگىرۋدەن ايگەرىم شىنازبەكوۆا توپ جارسا, ەرلەر اراسىنداعى باسەكەدە 2018 جىلعى ازيا چەمپيوناتىنىڭ قولا جۇلدەگەرى داۆيد ەفرەموۆ جەڭىسكە جەتتى.
400 مەترگە كەدەرگىلەر ارقىلى جۇگىرۋدەن ەرلەر اراسىندا دميتري كوبلوۆ, ايەلدەر اراسىندا سۆەتلانا كۋزنەتسوۆا التىن جۇلدەنى يەلەندى. يادرو لاقتىرۋدان ەرلەر اراسىندا يۆان يۆانوۆ (19.21 مەتر), قىزداردان گرۋزيالىق سوفيكو چاتيريشۆيلي توپ جاردى (14.84). سەكىرۋ سايىستارىندا دا قازاقستاندىق اتلەتتەر ەشكىمگە دەس بەرگەن جوق. الدىمەن بيىكتىككە سەكىرۋدەن نادەجدا دۋبوۆيتسكايا جارىس جەڭىمپازى اتانسا, سىرىقپەن سەكىرۋدە اناستاسيا ەرماكوۆا, ۇزىندىققا سەكىرۋدەن ەكاتەرينا ەكتوۆا باس جۇلدەنى ەنشىلەدى. ريم وليمپياداسىنىڭ كۇمىس جۇلدەسىن يەلەنگەن عۇسمان قوسانوۆتىڭ ءوزى جۇگىرگەن 100 مەتردىڭ التىن جۇلدەسى بۇل جولى شەتەلدىك سپورتشىنىڭ ەنشىسىندە كەتتى. يراننان كەلگەن رەزا حاسەيمي جەڭىپ الدى. ول سونداي-اق وسى سايىس تۇرىنە تىگىلگەن 1000 اقش دوللارىنا يە بولدى.
ەكىنشى جارىس كۇنىندە ەرلەر اراسىندا 400 مەترگە جۇگىرۋدەن ميحايل ليتۆين چەمپيون اتاندى. سولتۇستىك قازاقستان وبلىسىنىڭ سپورتشىسى جەڭىسكە جەتىپ قانا قويماي, قازاقستاننىڭ رەكوردىن جاڭارتتى. 22 جاستاعى اتلەت 400 مەتردى 45.50 سەكۋندتا جۇگىرىپ ءوتتى. 200 مەترگە جۇگىرۋدەن ەرلەر اراسىنداعى سايىستا ۆلاديسلاۆ گريگورەۆ پەن قىزدار اراسىنداعى باسەكەدە ۆيكتوريا زيابكينا قاتارىنان ەكىنشى جىل عۇسمان قوسانوۆ مەموريالى جارىسىندا جەڭىسكە جەتتى. 800 مەترگە جۇگىرۋدەن ەرلەر اراسىندا ۆلاديسلاۆ گريگورەۆ, ايەلدەر اراسىندا مارگاريتا مۇقاشەۆا توپ جاردى.
سونداي-اق 5000 مەترگە جۇگىرۋدەن دميتري يۆانچۋكوۆ, گۇلشانوي ساتاروۆا, ءۇش قارعىپ سەكىرۋدەن جاس سپورتشىلاردىڭ ءبىرى يرينا ەكتوۆا چەمپيون اتاندى. ديسك لاقتىرۋ باسەكەسىندە ماريا تەلۋشكينا مەن الەكساندر مامونتوۆ, بالعا لاقتىرۋ سايىسىندا ديانا نۇسىپبەكوۆا مەن مەرگەن ماممەدوۆ (تۇرىكمەنستان), نايزا لاقتىرۋ بويىنشا ساموبار ەركينوۆا (وزبەكستان) مەن اكيم دەمەنتەۆ (وزبەكستان) جارىس جەڭىمپازى اتاندى.
100 مەترگە جۇگىرۋ بويىنشا كوماندالىق ەستافەتادان قازاقستاننىڭ ەرلەر جانە قىزدار قۇراماسىنا لايىقتى قارسىلاس تابىلمادى.
ءالي بيتورە,
«ەگەمەن قازاقستان»
