شاراعا قاتىسۋشىلار الدىندا سويلەگەن سوزىندە پرەزيدەنت مەملەكەتتىك تۋدىڭ ءداستۇرلى تۇردە استانا كۇنى قارساڭىندا كوتەرىلۋى وسى جالپىۇلتتىق مەرەكەنىڭ مارتەبەسىن اسقاقتاتا تۇسەتىنىن جەتكىزدى.
«جەلبىرەگەن كوك تۋىمىزدىڭ استىندا ەلوردامىزدىڭ 20 جىلدىق مەرەيتويىنا ارنالعان شارالاردى باستاعالى وتىرمىز. بارشاڭىزدى استانانىڭ 20 جىلدىق مەرەكەسىمەن شىن جۇرەگىمنەن قۇتتىقتايمىن. بيىل ءداستۇرلى مەرەكەمىز استانامىزدىڭ 20 جىلدىعىنا تۋرا كەلىپ تۇر. 20 جىل دەگەن تاريح ءۇشىن قاس-قاعىم ءسات. ەكى عاسىر توعىسىندا ەن دالادا ەلوردا سالعان جالعىز ەل – قازاقستان. وسى ۋاقىت ارالىعىندا اتقارعان جۇمىستاردىڭ ءبارى جەلبىرەگەن كوك تۋىمىزدىڭ استىندا ءوتىپ جاتىر», دەدى ن.نازارباەۆ.
پرەزيدەنت قازاقستاننىڭ اسپان تۇستەس كوك تۋى استانانىڭ قالىپتاسۋى مەن بۇكىل ەلىمىزدىڭ دامۋ جولىن ايشىقتايتىنىن ايتىپ, 20 جىل ىشىندە ەلوردادا الەمدىك دەڭگەيدەگى جيىندار وتكىزىلىپ كەلە جاتقانىن اتاپ ءوتتى.
«باتىر بابالارىمىز ءبىزدىڭ زور جەڭىستەرگە جەتۋىمىزدى تىلەپ, ءاردايىم تۋدى تىك ۇستاۋدى وسيەت ەتتى. سودان بەرى ءبىز بارلىق جەتىستىككە كوك بايراقتىڭ استىندا قول جەتكىزىپ كەلەمىز. «قازاقستان, تاۋەلسىزدىك, استانا» دەگەن تۇسىنىكتەر ءبىزدىڭ مەملەكەتتىگىمىزبەن, بولاشاعىمىزبەن ءبىرتۇتاس ۇعىمعا اينالدى. قازاقستان – ءبىزدىڭ جالعىز وتانىمىز, تاۋەلسىزدىك – ورىندالعان ارمانىمىز. الەم ەلدەرى تۋلارىنىڭ ەشقايسىسىنا ۇقسامايتىن كوك تۋىمىزدى دۇنيەجۇزى مويىندادى», دەدى مەملەكەت باسشىسى.
سونداي-اق ەلباسى تۋدىڭ ماڭىزى تۋرالى اڭگىمەلەپ, اتا-بابالارىمىزدىڭ «تۋىڭ تۇسپەسىن» دەپ باتا بەرگەنىن ەسكە سالدى. «بۇل – كيەلى باتا. تۋ – ەلدىكپەن تەڭ!», دەدى ن.نازارباەۆ.
مەملەكەت باسشىسى ەلىمىزدىڭ سىرتقى ساياساتىنىڭ بەيبىتسۇيگىش سيپاتىن اتاپ ءوتىپ, قازاقستاننىڭ قارۋلى كۇشتەرى ءۇشىن اسكەري كادرلاردى ساپالى دايىنداۋدىڭ ماڭىزدىلىعىنا توقتالدى.
«سىزدەردىڭ اسكەري قىزمەتتەرىڭىز بەيبىت جاعدايدا ءوتسىن دەپ تىلەيمىن. بىراق مەملەكەت ءاردايىم ءوزىنىڭ قاۋىپسىزدىگى مەن شەكارا بۇتىندىگىن ويلاۋعا ءتيىس. سوندىقتان ءبىز وفيتسەرلەرىمىزدى تاۋەلسىز قازاقستاننىڭ جاڭا جاعدايىندا, جاڭا قارۋلى كۇشتەرىمىز ءۇشىن وقىتىپ, تاربيەلەيمىز. اسكەري قىزمەتتى لايىقتى اتقارۋدىڭ ۇلگىسىن كورسەتىڭىزدەر», دەدى پرەزيدەنت.
ن.نازارباەۆ جاس وفيتسەرلەرگە ارناعان سوزىندە مەملەكەتتىك تۋعا زور قۇرمەت كورسەتۋ وتاندى سۇيۋمەن پارا-پار ەكەنىن اتاپ ءوتتى. بۇل قازاقستاندىق پاتريوتيزم قۇندىلىقتارىن جانە ەلىمىزدەگى ۇلتتىق بىرەگەيلىكتى نىعايتا تۇسەدى.
«بۇگىن اسكەري وقۋ ورىندارىنىڭ ۇزدىك تۇلەكتەرى وفيتسەرلىك شەن الادى. سىزدەر ارقىلى وسى جىلى وقۋىن ءبىتىرىپ جاتقان جاس وفيتسەرلەردىڭ ءبارىن قۇتتىقتايمىن. وسى ساتتەن باستاپ سىزدەرگە وتان قورعاۋ, قازاقستان ازاماتتارىنىڭ بەيبىت ءومىرى مەن تىنىشتىعىن كۇزەتۋ ءۇشىن كۇردەلى دە مارتەبەلى ميسسيا جۇكتەلەدى. سىزدەر ۇلى بابالارىمىز امانات ەتكەن قاسيەتتى بورىشتى لايىقتى اتقارۋلارىڭىز كەرەك. بۇكىل ءومىر جولدارىڭىزدا وفيتسەرلىك اتاقتى ۇلكەن ابىرويمەن الىپ جۇرىڭىزدەر!» دەدى مەملەكەت باسشىسى.
سالتاناتتى ءراسىم بارىسىندا قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسىنىڭ قولىنان ەلىمىزدىڭ جوعارى اسكەري وقۋ ورىندارىنىڭ 12 ۇزدىك تۇلەگى قارۋلى كۇشتەردىڭ وفيتسەرلىك شەندەرىن الدى.
سوڭىندا نۇرسۇلتان نازارباەۆ بارشا جۇرتتى استانانىڭ 20 جىلدىعىمەن قۇتتىقتاپ, حالقىمىزعا باق-بەرەكە تىلەدى. وسىلايشا, ەلوردانىڭ مەرەيلى مەرەكەسى قارساڭىندا تاۋەلسىز قازاقستاننىڭ بايراعى سايىن سارىارقا توسىندە جەلبىرەدى. اسقاقتاي بەر, بەيبىتشىلىك پەن تۇتاستىقتىڭ سيمۆولى – قاستەرلى كوك تۋ!
اباي اسانكەلدى ۇلى,
«ەگەمەن قازاقستان»
