جوعارىدا ەسىمدەرى اتالعان قوس ساڭلاقتىڭ رەكوردىن بۇزۋعا ليۋي ءبيننىڭ تاماشا مۇمكىندىگى بار. سول جوسپاردى جۇزەگە اسىرۋ ءۇشىن 23 جاستاعى قىتاي بوكسشىسى 15-شىلدەدە مالايزيادا وتەتىن جەكپە-جەكتە كارلوس كانيسالەستى ۇتۋعا ءتيىس. بىردەن ايتا كەتەيىك, بۇل وڭاي شارۋا ەمەس. سەبەبى, بۇگىنگى تاڭدا ۆەنەسۋەلا وكىلىنىڭ داڭقى دۇركىرەپ تۇر. وسى كۇنگە دەيىن 20 كەزدەسۋ وتكىزگەن ول 19 رەت جەڭىس تويىن تويلادى. 16 قارسىلاسىن نوكاۋتپەن جەڭدى. قازىرگى كەزدە 25 جاستاعى كارلوس WBA نۇسقاسى بويىنشا ءبىرىنشى اسا جەڭىل سالماقتىڭ التىن بەلبەۋىن يەلەنىپ وتىر.
ال ليۋي ءبيندى ءبىز اۋەسقوي رينگتە جۇرگەن كەزىنەن جاقسى بىلەمىز. 49 كيلو سالماقتا جۇدىرىقتاسقان ول قىتايدىڭ ەكى دۇركىن چەمپيونى جانە ەكى دۇركىن جۇلدەگەرى اتاندى. 2013 جىلى اممانداعى ازيا بىرىنشىلىگىندە ءۇشىنشى ورىنعا تابان تىرەدى. سول جىلى الماتىدا جالاۋى جەلبىرگەن الەم چەمپيوناتىندا كۇش سىناسىپ, ەكىنشى اينالىمدا جەڭىلىس تاپتى. سونداي-اق, بين 2014 جىلعى ازيا ويىندارى مەن 2016 جىلعى وليمپيا ويىندارىنا قاتىسقانىمەن, باستاپقى كەزەڭدەردە ءسۇرىندى. دۇنيەجۇزىلىك بوكس سەرياسى دوداسىنا قاتىسىپ, ەكى باسەكە وتكىزدى.
بىلتىرعى جىلدىڭ جازىندا ليۋي بين كاسىپقوي رينگتە جۇىدىرىقتاسۋدى كۇپ كوردى. ءوز ەلىندە وتكەن تۇساۋكەسەر كەزدەسۋىندە تايلاندتىق ۆانچاي نيانگحانسانى ءۇشىنشى راۋندتا تەحنيكالىق نوكاۋتپەن ۇتتى. مىنە, ەندى ول كارلوس كانيسالەسپەن ايقاسقالى وتىر. ەگەر كۋالا-لۋمپۋردەگى ايقاستا قىتاي جىگىتى ۇتاتىن بولسا, وندا سپورت سۇيەر قاۋىم كاسىپقوي بوكستاعى تاعى ءبىر رەكوردتىڭ كۋاسى بولماق.
عالىم سۇلەيمەن,
«ەگەمەن قازاقستان»
