2018 جىل رەسپۋبليكامىز ءۇشىن ايرىقشا بولماق – قازاقستان حالقى ەلوردانىڭ 20 جىلدىعىن اتاپ وتەدى. استانا – بارشا الەم ءۇشىن ۇلتارالىق بىرلىك پەن كەلىسىمنىڭ نىشانىنا اينالدى.
11 جىل ىشىندە استانا تۇركى وركەنيەتىنىڭ ۇلت وكىلدەرى باس قوسقان اۋقىمدى جيىنعا باستاماشى بولۋدا. «استانا-ارقاۋ» فەستيۆالىن تۇراقتى تۇردە وتكىزۋ حالىقارالىق دەڭگەيدەگى ۇلتارالىق قارىم-قاتىناس ءداستۇرىن جاڭعىرتۋعا, قازاقستاننىڭ تۇركى مۋزىكالىق مادەنيەتىنىڭ بىرىكتىرۋشىسى رەتىندەگى ءرولىن نىعايتۋعا ىقپال ەتەدى.
«استانا-ارقاۋ» فەستيۆالىنىڭ كونتسەرتتەرىندە الىس-جاقىن شەتەلگە ەسىمى تانىمال ونەر شەبەرلەرىنىڭ ورىنداۋىندا بارلىق تۇركى حالىقتارىنىڭ مۋزىكاسى ۇسىنىلادى. باتىس پەن شىعىس تىڭدارماندارىن تامساندىراتىن جانرلار – باقسىلاردىڭ ءان-جىرى, حومۋسقا (شاڭقوبىز) ارنالعان كەرەمەت كومپوزيتسيالار, كومەيمەن ءان ايتۋ, ەپيكالىق جانە اسپاپتىق شىعارمالار, ورتا ازيا مەن قازاقستان, كۇنگەي كاۆكاز بەن اناتوليا, ۆولگا جاعاسى مەن ءسىبىر تۇركىلەرىنىڭ ءان ليريكاسى ورىندالادى.
تۇركى الەمىنىڭ مۋزىكالىق مۇراسىن باعالاۋشىلارعا تاماشا توسىنسىي ازىرلەگەن فەستيۆال ەلوردا تۇرعىندارى مەن قالا قوناقتارىنىڭ جادىندا ماڭگى ساقتالاتىن ەلەۋلى وقيعا بولماق.
