كەزدەسۋ اياسىندا قىزىلوردا وبلىسىنىڭ اكىمى قىرىمبەك كوشەرباەۆ ايماقتا جوعارى سۇرانىسقا يە ماماندىقتار بويىنشا ستۋدەنتتەردى وقىتىپ, جۇمىسپەن قامتۋ بويىنشا اتقارىلىپ جاتقان جۇمىستار تۋرالى ايتتى.
«ۇلتتىق بىرىڭعاي تەستىلەۋدىڭ ورتاشا باللى بويىنشا ءبىزدىڭ وبلىسىمىز قازىر ۇزدىك 5 ايماقتىڭ قاتارىندا, ال 5 جىل بۇرىن سوڭعى 16-شى ورىندا بولاتىن. رەسەيدىڭ جەتەكشى تەحنيكالىق ۋنيۆەرسيتەتتەرىمەن تىعىز بايلانىس ورناتۋدىڭ ارقاسىندا بۇگىنگى كۇنى 452 مەكتەپ ءبىتىرۋشىمىز ماسكەۋ جانە سانكت-پەتەربۋرگ قالالاردا ۇزىك جوعارى وقۋ ورىندارىندا ءبىلىم الۋدا. بيىل ستۋدەنتتەردىڭ العاشقى لەگى ديپلوم الادى, ولاردىڭ جۇمىسقا ورنالاسۋ ماسەلەسىن ءبىز الدىن-الا پىسىقتاپ جاتىرمىز», - دەدى وبلىس باسشىسى.
ەۋرازەو پارلامەنتارالىق اسسامبلەياسى جانىنداعى ۋنيۆەرسيتەت قۇرامىندا 3 ينستيتۋت, 4 فاكۋلتەت پەن 17 كافەدرا بار. مۇندا «بيزنەس-ينفورماتيكا», «يۋريسپرۋدەنتسيا», «سەرۆيس», «تۋريزم», «ەكونوميكا», «مەنەدجمەنت», «كەدەن ءىسى», «جارناما جانە جۇرتشىلىقپەن بايلانىس», «كونفليكتولوگيا», «ديزاين», «قولدانبالى كوركەمونەر جانە ۇلتتىق كاسىپشىلىك», «ساۋدا ءىسى», «پسيحولوگيا» سياقتى ماماندىقتار وقىتىلادى.
«قىزىلوردا وبلىسى العاشقىلاردىڭ ءبىرى بولىپ كادرلاردى دايىنداۋ سالاسىندا ارىپتەستىك ورناتۋ بويىنشا ۇسىنىسىمىزعا كەلىسكەنىنە وتە قۋانىشتىمىز. قازىرگى تاڭدا مامانداردى دايارلاۋ ماسەلەسىندە جەكە كوزقاراس ءتيىمدى. بيىل ۋنيۆەرسيتەتىمىزدە قوسىلعان جاڭا باعىتتارىنىڭ ءبىرى – بيزنەس-ينفورماتيكا. بۇل ماماندىق اياسىندا ستۋدەنتتەر تسيفرلىق ەكونوميكا دامىعان زاماندا وزەكتى سالالارىنىڭ ءبىرى – بلوكچەين مەن كريپتوۆاليۋتالاردى زەرتتەيتىن بولادى», - دەدى ۋنيۆەرسيتەت رەكتورى ەرلان ىسقاقوۆ.
باقتيار تايجان,
«ەگەمەن قازاقستان»
قىزىلوردا وبلىسى
