وسىلايشا, اقتوبەدە تاۋلىگىنە 50-دەن 70 تونناعا دەيىن ءتاتتى تاعامدار شىعاراتىن «ايس پليۋس» جشس بالمۇزداق ءوندىرۋ تسەحى اشىلادى. «اقتوبە» يندۋستريالدى ايماعى قۋاتتىلىعى جىلىنا 1 200 توننا ءونىم بولاتىن «پوليۆەست» جشس پوليەتيلەن پاكەتتەرىن ءوندىرۋ زاۋىتىمەن تولىعادى.
بۇدان باسقا, اقتوبەلىكتەردى تۇڭعىش پرەزيدەنت اتىنداعى ساياباقتا كوپتەن كۇتكەن اكۆاپاركتىڭ اشىلۋى دا قۋانتادى. ايتا كەتۋ كەرەك, «AKTOBE INVEST-2016» حالىقارالىق ينۆەستيتسيالىق فورۋمى كەزىندە وبلىس اكىمدىگى مەن «ۇلان كومپانياسى» جشس ونىڭ قۇرىلىسى تۋرالى كەلىسىمگە قول قويعان بولاتىن.
اقتوبەدەگى ويىن-ساۋىق يندۋسترياسى وبلىستاعى بالا جىلىنا وراي سالىنىپ جاتقان «Yurta Park» وتباسىلىق دەمالىس ساياباعىمەن دە تولىعاتىن بولادى. الايدا, مۇندا تەك بالالارعا عانا ەمەس, ەرەسەكتەرگە دە قىزىق بولادى دەپ كۇتىلۋدە. ساياباقتا ەندىگى مينيگولف وينايتىن الاڭقاي, اشىق اسپان استىنداعى كينوتەاتر, جاساندى جارتاس, ارقان باعى, كىتاپحانالار, ەتنواۋىل مەن بايلانىس زووباعى, اۋماعى 20*30 مەترلىك لابيرينت, بارلىق كەزەڭ بويى جۇمىس جاسايتىن مۇز ايدىنى, پلانەتاري, ساداق پەن اربالەتتەن اتاتىن ستەندتەر جانە ت.ب. ورنالاستىرىلعان.
وبلىس اۋداندارىندا 8 سپورتتىق جانە ويىن الاڭدارى, ايتەكە بي اۋدانىنىڭ ارالتوبە اۋىلىندا 150 ورىندىق ستاديون, كەڭقياق اۋىلىندا ءدارىحانا اشىلسا, حرومتاۋ اۋىلىنىڭ ءدوڭ اۋىلىندا 600 وقۋشىعا ارنالعان مەكتەپ پايدالانۋعا بەرىلەدى.
«تۋعان جەرگە تاعزىم» اكتسياسى اياسىندا ەلدى مەكەندەردى اباتتاندىرۋ جاعىنا ەرەكشە ۇلەس قوساتىن بولادى. ەلوردا كۇنىنە وراي اكتسيا قاتىسۋشىلارى مەن ەلىنە بەي-جاي قارامايتىن اقتوبە وبلىسىنىڭ تۋمالارى وزدەرى تۋىپ-وسكەن قالالارى مەن اۋىلدارىنا جامبىل جاباەۆتىڭ ەسكەرتكىشىن, ءۇش ستەلا ەسكەرتكىشىن, ەكى جاڭا گۇلزار باعىن, جىلىجاي, سۋبۇرقاق پەن تەننيس كورتىن تارتۋ ەتەدى. سونىمەن قاتار, ولاردىڭ قارجىسىنا قاراۋىلكەلدى اۋىلىندا شامامەن 500 مەترلىك جاياۋجول مەن بايعانين اۋدانىنىڭ جارقامىس اۋىلىندا قاتتى تۇرمىستىق قالدىقتار پوليگونى سالىندى.
مەرەكە كۇندەرى وبلىستاعى مەديتسينالىق مەكەمەلەر جەلىسى دە جاڭا نىساندارمەن تولىعادى. اتاپ ايتقاندا, قوبدا اۋدانىنىڭ تەرىساققان اۋىلىندا فەلدشەرلىك-اكۋشەرلىك پۋنكت, ال بەستاۋ اۋىلىندا مەديتسينالىق پۋنكت اشىلماق. اتالعان مەديتسينالىق مەكەمەلەر مەملەكەتتىك-جەكەمەنشىك سەرىكتەستىك اياسىندا تۇرعىزىلعان.
اقتوبە وبلىسىندا استانانىڭ 20 جىلدىعىنا وراي 430 مىڭعا جۋىق ادامدى قامتيتىن بارلىعى 1200 قوعامدىق-ساياسي, مادەني-بۇقارالىق ءىس شارالار وتكىزۋ جوسپارلانىپ وتىر.
تەمىر قۇسايىن
«ەگەمەن قازاقستان»
اقتوبە
