دارىگەرلەر قۋانىشقا بولەندى

قوستاناي وبلىسىنداعى دەنساۋلىق ساقتاۋ سالاسىنىڭ قىزمەتى دە, ماتەريالدىق جاعدايى دا وسىدان 20 جىل بۇرىنعى ۋاقىتپەن سالىستىرۋعا كەلمەيدى. ايىر­ما­شىلىعى جەر مەن كوكتەي. بۇگىنگە دەيىن وبلىس وڭىرىندەگى بارلىق ەمدەۋ ورىندارى ينە-جىپتەن جاڭا شىققانداي, جوندەۋدەن ءوتتى. قوستاناي, رۋدنىي قالالارىندا جاڭا مەديتسينالىق نىساندار سالىنىپ, حالىق يگىلىگىنە جاراپ وتىر. اۋرۋحانالار شەتەلدىك ۇزدىك مەديتسينا­لىق قۇرالدارمەن جابدىق­تال­دى. ءبىر مىسال. باسقاسىن ايتپا­عاندا, اۋداندارداعى ءدارى­گەرلەر جۇزدەگەن شا­قى­رىمعا ات سابىلتپاي-اق ۆيدەوقۇرال ارقىلى وبلىستىق اۋرۋحاناداعى ءارىپ­تەس­تەرىنەن قاجەت كەڭەس الا بەرەدى. كۇردەلى وپەراتسيا قاجەتسىنەتىن, اۋىر ناۋ­قاس­تاردى جىلدام وبلىس ورتالىعىنا جەتكىزۋگە دە مۇمكىندىك مول. مۇنىڭ ءوزى انا مەن بالا جانە جالپى ادام شىعىنىنا جول بەرمەيدى. مىنە, جاقىندا اۋداندار مەن قالالارداعى «جەدەل جاردەم» ستانسالارى مەن ەمحانالار «رەانوموبيل» دەپ اتالاتىن جىلجىمالى مەديتسينالىق كەشەنگە يە بولدى. وبلىس اكىمى سەرگەي كۋلاگين قوستاناي, ارقالىق, رۋدنىي قالا­لارىن­داعى «جەدەل جاردەم» ستانسالارى مەن جىتىقارا اۋداندىق اۋرۋحاناسىنا, ليساكوۆ قالالىق ەمحا­نا­سىنا وسىنداي جىلجىمالى مەديتسينالىق «جەدەل جاردەم» كەشەنىنىڭ كىلتىن تاپ­سىردى. ولاردىڭ باعاسى 70 ميلليون تەڭگە بولسا, ال وبلىستىق بالالار اۋرۋ­حا­نا­سىنا تاپسىرىلعان وسىنداي كەشەننىڭ ءوزى وبلىس بيۋد­جەتىنە 5 ميلليون تەڭگەگە ءتۇستى. قازان ايىنىڭ باسىندا وبلىستىق جانە وبلىستىق بالالار, ارقالىق قالالىق اۋرۋحانالارىنا ءبىر ءوزى ءبىر ەمحانانىڭ جۇگىن ارقالايتىن جىلجىمالى مە­دي­تسينالىق كەشەن تارتۋ ەتىلگەن بولاتىن. بۇل زاماناۋي جابدىقتار ءۇشىن 256 ميلليون تەڭگە جۇمسالدى. ونىڭ قايتارىمى قازىردىڭ وزىندە ءبىلىنىپ وتىر. ەكى ايعا تول­مايتىن ۋاقىتتىڭ ىشىندە وسى جىلجىمالى مەديتسينالىق كەشەن اۋداندار مەن اۋىلداردى ارالاپ, 6 مىڭ ادامنىڭ دەنساۋلىعىن تەكسەردى. – تاۋەلسىزدىك العان جىلداردان بەرى جەتكەن جەتىستىكتەردىڭ بارلىعى دا كوز ال­دى­مىزدا. ەشتەڭەنى دابىرايتىپ, ويدان قوسۋدىڭ قاجەتى جوق. وبلىسىمىزدىڭ دەنساۋلىق ساقتاۋ سالا­سى, اسىرەسە سوڭعى ون جىلدىڭ ىشىندە ادام تانىماستاي وزگەرىپ, دامىدى. مەديتسينا سالاسىنا كوپ قارجى قۇيىلدى, دارىگەرلەردىڭ الەۋمەتتىك جاعدايى دا جاقسارىپ كەلەدى, جالاقىسى ءوستى. سىزدەر ەندى ادامدى ەمدەپ قانا قويماي, اۋرۋدىڭ الدىن الۋ جۇمىستارىن كۇشەيتۋلەرىڭىز كەرەك. جان-جاقتى دامىپ كەلە جاتقان تاۋەلسىز ەلىمىزدەگى تالاپ وسىنداي, –دەدى وبلىس اكىمى سەرگەي كۋلاگين ۇزدىك مەديتسينالىق كەشەندەردىڭ كىلتىپ تاپسىرىپ تۇرىپ. بۇل دارىگەرلەر ءۇشىن دە, جالپى جۇرتشىلىق ءۇشىن دە مەرەكە الدىنداعى شىن مانىندەگى قۋانىش بولدى. ءنازيرا جارىمبەتوۆا. قوستاناي.