وتكەن اپتادا چۋۆاش ەتنو-مادەني بىرلەستىگى ساياباقتا كونتسەرتتىك باعدارلاما ۇيىمداستىردى. وبلىستىق چۋۆاش مادەني ورتالىعى مەن قاتار قۇرىلعان حالىق اندەرى مەن بيلەرىن ورىندادى. «سەسپەل» فولكلورلىق ءانسامبلى قۇرىلعان-دى. باياندا وينايتىن گاينۋتدين تاشيموۆ وسى ءانسامبلدىڭ كوركەمدىك جەتەكشىسى. ۇلتتىق فولكلورلىق انسامبل جاستاردىڭ ءوز حالقىنىڭ سالت-ءداستۇرىن, ءان, بيلەرىن, ءتىلىن ۇمىتپاي جالعاستىرۋلارى ءۇشىن قاجەت.
قالالىق ساياباققا جينالعان تۇرعىندار چۋۆاش حالقىنىڭ اندەرىن تىڭداپ, مادەنيەتىمەن, ۇلتتىق تاعامدارىمەن جانە سالت-داستۇرلەرىمەن تانىستى. تاعى ءبىر باستى ەرەكشەلىگى, چۋۆاشتار قازاق جانە ورىس تىلدەرىندە استاناعا ارنالعان اندەر شىرقادى.
مەرەكەگە جينالعان جۇرتشىلىق چۋۆاشتاردىڭ ىستىق تا, ءدامدى بالىشتەرىنەن اۋىز ءتيدى.
– جالپى, چۋۆاش حالقى جازعى ۋاقىتتا «اگاتۋي», «ششيمەك», «ۋياۆ» سياقتى كوپتەگەن مەرەكەلەرىن تويلايدى. ارقايسىسىنىڭ ءوز ەرەكشەلىگى بار. ءبىز وسى مەرەكەلەردىڭ ماڭىزىن, ەرەكشەلىگىن چۋۆاش جاستارى ۇمىتپاسىن دەيمىز. مىسالى, «اگاتۋي» كوكتەمگى ەگىستىڭ باستالۋىنا, ال, «ۋياۆ» اياقتالۋىنا ارنالادى. ال, ءبىز بۇگىنگى كۇندەرى ەلىمىزدەگى دوستىق پەن بىرلىكتىڭ, بەرەكەنىڭ ءتورى – استانامىزدىڭ مەرەيلى تويىن قارسى الۋدامىز. ويتكەنى, بارلىق جاقسىلىق پەن مەيىرىم ەلباسىنىڭ باتالى سوزىمەن جانە اسەم دە ارايلى استانادان تارايدى. قۇتتى بولسىن استانا تويى! بۇل ءبىزدىڭ جاستارىمىزعا قاجەت رۋحاني وي سالار مەرەكەلەر, – دەيدى بىرلەستىك ءتورايىمى ەلەنا سوفرونوۆا.
– بىزدەر دوستىق ۇيىندە چۋۆاش ءتىلىن ۇيرەنىپ, ءوزارا تۋعان تىلىمىزدە سويلەسەمىز. چۋۆاش ءتىلى جوعالىپ بارادى دەۋ دۇرىس ەمەس. ءتىلدى ساقتاۋعا ءبىزدىڭ وڭىردەگى «جاڭعىرۋ» مەكتەبىندە بارلىق جاعداي جاسالعان. بۇگىنگى مەرەكەدەگىدەي سالت-داستۇرلەرىمىزدى دارىپتەپ, ناسيحاتتاي الامىز,– دەيدى چۋۆاش جاستار بىرلەستىگىنىڭ جەتەكشىسى وكسانا كوپوتۋن.
بۇل كۇندەرى وڭىردە 700-گە جۋىق چۋۆاش ۇلتىنىڭ وكىلى تۇرادى. باۋىرلاس حالىق قازاق جەرىن وتاندارىنداي كورىپ, ۇلتتىق قۇندىلىقتارىن ساقتاپ, تۋعان تىلدەرىن جاڭعىرتىپ وزگەلەرگە ۇلگى.
فاريدا بىقاي,
«ەگەمەن قازاقستان»
پاۆلودار
