سۋرەتتەردى تۇسىرگەن اۆتور
ەرتىس جاعالاۋىندا اباي اتىنداعى كىتاپحانا مەن ورتالىقتاندىرىلعان كىتاپحانا جۇيەسى بىرىگىپ, «كيەلى دومبىرا ءۇنى» اتتى كورمە ۇيىمداستىردى. كۇيشىلەر اراسىندا «دومبىرا-party» سايىسى ۇيىمداستىرىلدى. سونداي-اق, قالاداعى ءا. قاشاۋباەۆ اتىنداعى فيلارمونيا, اباي تەاترى مەن داريعا-اي جاستار تەاترىنىڭ ۇجىمدارى, م. تولەباەۆ اتىنداعى مۋزىكالىق كوللەدج ستۋدەنتتەرى بىرىگىپ, كۇي شەرتتى.
- ەلباسى جولداۋىندا ۇلتتىق دومبىرا كۇنىن بەلگىلەۋ تۋرالى ايتىلعان بولاتىن,-دەدى قالا اكىمى ەرماك ءسالىموۆ,-مىنە, سەمەيدە قايناعان تىرلىك, ەل وسىناۋ مەرەكەدە ەرەكشە قۋانىپ, تويلاپ جاتىر. ناعىز قازاق قازاق ەمەس, ناعىز قازاق دومبىرا دەپ اقىندار جىرلاعانداي بۇل دومبىرانىڭ ۇنىندە ەلىمىز اڭساعان بوستاندىق, قازىرگى بەيبىت تىرلىك, بارلىعى ۇندەسىپ جاتىر. مەرەكەلەرىڭىز قۇتتى بولسىن! - دەدى قالا اكىمى.
بۇدان كەيىن قالا اكىمى ەرماك ءسالىموۆ قالاداعى №1 پەرزەنتحانادا بولىپ, وسىناۋ مەرەيلى كۇنى بوسانىپ, ومىرگە ۇل اكەلگەن گۇلجانات نۇرتازيناعا دومبىرا سىيعا تارتتى. مەيىربيكەلەردىڭ ايتۋىنا قاراعاندا ۇل بالانىڭ سالماعى 3600, بويى 54 سم. اناسىنىڭ دا, ءسابيىنىڭ دە قال-جاعدايلارى جاقسى.قالا اكىمىنىڭ ءوزى قۇتتىقتاعانىنا گۇلجانات نۇرتازينا قاتتى ريزا بولدى.«قازاق ءتىلى» حالىقارالىق قوعامىنىڭ سولتۇستىك-شىعىس ءوڭىرى بويىنشا ۆيتسە-پرەزيدەنتى ورال شارىپباەۆ: « ۇلى دالانىڭ ۇلىق مەرەكەسىندە تۋعان ۇل بالامىزدىڭ باعى وزسىن!» دەپ باتا بەردى.
ءدال وسىنداي شارا قالانىڭ تاعى پەرزەنتحاناسىندا دا بولدى. قالالىق دوستىق ءۇيىنىڭ ديرەكتورى بەرىك كوپباەۆ جاڭادان دۇنيە ەسىگىن اشقان تاعى ءبىر ۇلعا دومبىرا تارتۋ ەتتى. 22 جاستاعى ەركەجان گيرەەۆانىڭ ۇلى ۇكىلى دومبىراعا يە بولدى. قالالىق دوستىق ۇيىندەگى انالار كەڭەسىنىڭ ءتورايىمى ناعيما مويىنباەۆا جاس ءسابيدىڭ اناسىنا اق ورامال سىيعا تارتتى. ءۇش ساعات قانا بۇرىن بوسانعان انا وسىلايشا ۇلتتىق دومبىرا كۇنىندە قۋانىشقا كەنەلدى. بولمەسى گۇلگە تولىپ, تورىندە دومبىرا تۇردى. قۇشاعىنا ءسابيىن قىسقان ەركەجان ەرەكشە ريزا بولدى.
راۋشان نۇعمانبەكوۆا,
سەمەي.
