كەزدەسۋ بارىسىندا ارىستانبەك مۇحامەدي ۇلى مينيسترلىكتىڭ قىزمەتى تۋرالى بايانداپ, ۆەدومستۆوعا قاتىستى سالالاردا اتقارىلىپ جاتقان جۇمىستار مەن الداعى ۋاقىتقا جوسپارلانعان ءىس-شارالارمەن ءبولىستى.
ءوز بايانداماسىندا مينيستر «رۋحاني جاڭعىرۋ» باعدارلاماسىن جۇزەگە اسىرۋ استانا قالاسىنىڭ 20 جىلدىعىن مەرەكەلەۋگە دايىندىق, مادەنيەت, سپورت جانە تۋريزم سالالارىنىڭ دامۋى ماسەلەلەرىن قامتىدى.
ا.مۇحامەدي ۇلى وتكەن جىلى «رۋحاني جاڭعىرۋ» باعدارلاماسى اياسىندا مينيسترلىك تاۋەلسىز قازاقستاننىڭ تاريحىندا العاش رەت ەلىمىزدىڭ كيەلى جەرلەرىنىڭ بىرىڭعاي بەلدەۋىن – قازاقستاننىڭ كيەلى جەرلەرىنىڭ گەوگرافياسىن قۇرۋعا كىرىسكەنىن اتاپ ءوتتى.
«العاش رەت ۇلتتىق مۋزەي جانىنان «قاسيەتتى قازاقستان» ورتالىعى قۇرىلدى. بۇگىنگى كۇنى «قازاقستاننىڭ كيەلى جەرلەرىنىڭ گەوگرافياسى» ارنايى جوباسى بويىنشا 2 اۋقىمدى رەسپۋبليكالىق فورۋم, العاش رەت مادەنيەت جانە ونەر قىزمەتكەرلەرى كاسىبي مەرەكەسى اياسىندا «رۋحاني قازىنا» اتتى فەستيۆال ءوتتى. بۇگىنگى كۇنگە دەيىن قازاقستاننىڭ بارلىق رۋحاني قۇندىلىقتارىن, بىرەگەي تاريحي ورىندارى مەن تابيعي ەسكەرتكىشتەرىن تولىق ءبىر جۇيەگە كەلتىرۋ بويىنشا اۋقىمدى جۇمىستار جۇرگىزىلدى. «تۋعان جەر» عىلىمي قاۋىمداستىعىنا بىرىككەن جەتەكشى عالىمداردىڭ, ولكەتانۋشىلاردىڭ, ارحەولوگتاردىڭ ارقاسىندا جالپىۇلتتىق (185 وبەكت) جانە جەرگىلىكتى (456 وبەكت) ماندەگى وبەكتىلەردىڭ ءتىزىمى قالىپتاستىرىلدى. وڭىرلەردەگى تاريحي-مادەني مۇرا جانە نەگىزگى وبەكتىلەر تۋرالى بىرەگەي عىلىمي ماتەريالداردى جيناقتاعان «كيەلى قازاقستان» ەنتسيكلوپەدياسىنىڭ ءبىرىنشى تومى شىعارىلدى», دەدى مينيستر.
كەزدەسۋ بارىسىندا قازاقستاندىق كينو سالاسىنىڭ دامۋ ماسەلەلەرى دە كەڭىنەن تالقىلاندى. ۆەدومستۆو باسشىسىنىڭ بەرگەن اقپاراتى بويىنشا, ۇلتتىق كينەماتوگرافتار بۇگىندە ەلىمىزدىڭ بىرەگەي تاريحي-مادەني مۇراسىن, تاريحي وقيعالار جانە كورنەكتى قايراتكەرلەردى ناسيحاتتاۋعا بەت بۇرعان.
سونىمەن قاتار مينيستر ەلدەگى تۋريزم سالاسىنىڭ ءىجو-دەگى ۇلەسىن ارتتىرۋ تۋرالى ماڭىزدى ماقسات قويىلعانىن ايتىپ ءوتتى.
«ەكسپو ناتيجەسىندە وڭ تاجىريبەمىز بار, قازاقستانعا 7 ميلليوننان استام ادام كەلدى, بۇل الدىڭعى جىلدارعا قاراعاندا 18 پايىزعا ارتىق. ىشكى تۋريزم اعىمى 20 پايىزعا ارتتى. تيىمدىلىكتى قولداۋ ماقساتىندا جىلدىڭ باسىنان باستاپ ەلەكتروندى ۆيزالاردى ەنگىزۋ بويىنشا جۇمىس جۇرگىزىلۋدە – 67 ەلدىڭ ازاماتتارى تۋريستىك ماقسات ءۇشىن قازاقستانعا ۆيزاسىز كىرۋگە قۇقىلى. بۇگىندە تۋريزم سالاسى وتىن-ەنەرگەتيكا, اگروونەركاسىپ كەشەنى, كولىك, ساۋدا سياقتى ەكونوميكانىڭ ماڭىزدى سالالارىنىڭ قاتارىندا. قازاقستانداعى ءتۋريزمدى دامىتۋدىڭ قازىرگى جانە ىقتيمال درايۆەرلەرىن انىقتاۋ ءۇشىن وڭىرلەرمەن جانە «اتامەكەن» پالاتاسىمەن بىرگە 60 تۋريستىك پۋنكت بەلگىلەندى. ولاردى شارتتى تۇردە ەكىگە ءبولىپ قاراستىرۋعا بولادى. ءبىرىنشىسى, مەدەۋ, شىمبۇلاق, احمەت ياساۋي كەسەنەسى جانە باسقا دا تانىمال تۋريستىك نىساندار بولسا, ەكىنشىسى, الاكول, بالقاش, تۇرگەن جانە ت.ب. وسىلاردىڭ نەگىزىندە قازاقستاننىڭ رەسپۋبليكالىق تۋريزم كارتاسى قۇرىلدى. ءبىز بۇل جوبا تۋريستەر سانىن جىلىنا 13 ميلليونعا دەيىن ۇلعايتىپ, 5,8 ملرد دوللار تىكەلەي ينۆەستيتسيا تارتۋعا, 64 مىڭ تۇراقتى جۇمىس ورنىن قۇرۋعا مۇمكىندىك بەرەدى دەپ بولجاپ وتىرمىز», دەدى ا.مۇحامەدي ۇلى.
مادەنيەت جانە سپورت ءمينيسترىنىڭ پىكىرىنشە, سالاماتتى ءومىر سالتىن بەلسەندى ناسيحاتتاۋدىڭ جانە سپورت سالاسىن جۇيەلى تۇردە قولداۋدىڭ ارقاسىندا بۇگىنگى تاڭدا 5 ملن ادام – ەلىمىزدىڭ ءاربىر ءۇشىنشى تۇرعىنى (ونىڭ جارتى ميلليونىنان استامى – بالالار مەن جاسوسپىرىمدەر) ەلىمىزدە جۇيەلى تۇردە سپورتپەن شۇعىلدانادى.
سپورتشىلارىمىز 2017 جىلى 206 التىن, 242 كۇمىس, 312 قولا مەدال جەڭىپ الدى. رەسپۋبليكا بويىنشا 11 مىڭنان استام سپورتتىق عيمارات جۇمىس ىستەيدى, جىل سايىن دەمەۋشىلەر قاراجاتى ەسەبىنەن بارلىق وڭىرلەردە دەنە شىنىقتىرۋ-ساۋىقتىرۋ كەشەندەرى قالپىنا كەلتىرىلۋدە, ءتۇرلى سپورت تۇرلەرى بويىنشا 700 مىڭنان استام وقۋشى شۇعىلداناتىن 35 مىڭ سپورت سەكتسياسى قىزمەت ەتەدى. قازىرگى تاڭدا قازاقستان رەسپۋبليكاسى تۇڭعىش پرەزيدەنتىنىڭ جىل سايىنعى جازعى جانە قىسقى سپورت تۇرلەرى بويىنشا تەستەرىن تاپسىرۋ بارشا قازاقستاندىقتار ءۇشىن ايقىن بىرىكتىرۋشى فاكتورعا اينالىپ وتىر», دەدى مادەنيەت جانە سپورت ءمينيسترى.
راۋان قايدار,
«ەگەمەن قازاقستان»
