اينالاسىن قورشاعان مۇزداقتاردىڭ كوبەسى سوگىلگەلى بەرى يسلانديا جاھاندىق وركەنيەتتەن قالماي, دامۋعا بەت الدى. 2 مىڭىنشى جىلدارعا دەيىن يسلانديادا فۋتبول قۇراماسى بولعانىمەن, ونى ەشكىم قاتارعا قوسپايتىن. ەندى كەلىپ ويلانامىز, وسىنداي ايماقتان قالايشا الەم چەمپيوناتىندا ونەر كورسەتەتىن كوماندا شىقتى دەپ. كۇن رايى دا قولايلى, اۋماعى دا اۋقىمدى قازاقستاننان ولاردىڭ نەسى ارتىق؟ ءبىزدىڭ جانكۇيەر ارمانداپ كەلە جاتقان الەمدىك ارەناعا ولار قالايشا ەرتە شىعىپ كەتتى دەيسىز عوي.
سويتسەك, مۇنىڭ ءبارى 2000 جىلدارى باستالعان ەڭبەكتىڭ جەمىسى ەكەن. يسلانديا تابيعاتى جىلىنا تەك 5 ايدا عانا فۋتبول ويناۋعا مۇمكىندىك بەرەدى. 5 اي ەمەس, 12 ايدا الاڭدا دوپ تەبۋگە مۇمكىندىك تۋعىزۋ ءۇشىن, جاڭا عاسىردىڭ باسىندا تابيعات كەرى اسەرىن تيگىزە المايتىن كوپتەگەن سپورت كەشەندەرى سالىنا باستادى. جىلى جەردە جاتتىعاتىن بولعاندىقتان جاستار دا فۋتبول ۇيىرمەلەرىنە جاپپاي جازىلا باستادى. بۇگىندە ەلدەگى فۋتبولشىلاردىڭ سانى 22 مىڭدى, قۇراپ وتىر. شامامەن العاندا, حالىقتىڭ 7 پايىزى. ال سوڭعى ەكى جىلدا ۋەفا-نىڭ سىناعىنان وتكەن جاتتىقتىرۋشىلاردىڭ سانى 575-تەن 2000-عا دەيىن ءوسىپتى.
2011 جىلى تۇڭعىش رەت جاستار قۇراماسى ەۋروپانىڭ ۇزدىكتەرى ىرىكتەلىپ الىنعان فينالدىق كەزەڭگە جولداما الدى. توپتىق كەزەڭنەن شىعا الماسا دا, جارىس قوجايىندارى دانيانى تىزە بۇكتىرىپ, كىشىگىرىم سەنساتسيا جاساعان-تۇعىن. بۇگىندە سول كومانداداعى 12 فۋتبولشىنى ۇلتتىق قۇرامادان كەزىكتىرە الاسىز. 8-ءى نەگىزگى قۇرامنىڭ ويىنشىلارى. مىنە, ينفراقۇرىلىمنىڭ ءوز ناتيجەسىن بەرگەنى وسى. بۇكىل ارالعا سالىنعان كوپتەگەن قۇرىلىستار, ءۇستى جابىق جاسىل الاڭدار مۇز ارالىنىڭ بالالارىن ۇشپاققا شىعاردى.
2016 جىلى فرانتسيا جەرىندە وتكەن ەۋرودوداعا جولداما العان يسلانديا كۇللى الەمگە تانىلدى. بۇرىن-سوڭدى مۇنداي ءىرى جارىسقا قاتىسپاعان كىشىگىرىم ارال ويىنشىلارى وزدەرىن ۇلكەن قاھارمان سەزىندى. رەيكياۆيك كوشەلەرىن دۋ-دۋمانعا بولەگەن سول ءبىر ءتۇنى وسى سوزدەردىڭ اۆتورى دا شاعىن ارالدىڭ شاتتىعىن بىرگە ءبولىسىپ ەدى. يسلانديا يۋري كراسنوجان باپتاعان قازاقستان قۇراماسىمەن 0:0 تەڭ ءتۇسىپ, قورجىنعا سالعان 1 ۇپايدىڭ ارقاسىندا قۇرلىقتىق دوداعا باراتىن بيلەتتى جەڭىپ الدى. يسلانديا فۋتبولىنىڭ التىن تاريحىندا قازاقستان قۇراماسىنىڭ دا اتى قاتار جازىلعانىن ايتقىمىز كەلەدى.
فرانتسياعا بارا سالىسىمەن يسلانديا فۋتبولشىلارى جەڭىستى جولدى جالعاي ءتۇستى. قارسىلاستى ءبىرىنىڭ ارتىنان ءبىرىن جەڭىپ, ءوز توبىنان پلەي-وففقا شىقتى. ازۋلى قارسىلاس انگليانى 2:1 ەسەبىمەن ۇتىپ, شيرەك فينالعا ءوتتى. وسى تۇستا جارىستى ۇيىمداستىرىپ جاتقان, توي يەلەرى فرانتسياعا قارسىلاس اتانىپ, جەڭىلىپ قالدى. دەگەنمەن ەش قارسىلىقسىز بەرىلە سالدى دەپ تە ايتپايمىز. فرانتسيا قاقپاسىنا يسلانديالىقتار 2 گول سوعىپ, جارىستى ابىرويمەن اياقتادى. قۇراما كوماندانى بۇكىل يسلانديا جۇرتى تىك تۇرىپ قارسى الدى. ودان كەيىنگى وقيعالار ارالداعى فۋتبول بۋمىنا ۇلاستى. ەندىگى ماقسات – الەم چەمپيوناتىنا قاتىسۋ ەدى.
جازارمان جۋرناليستەرگە تۇراقتى تۇردە سەنساتسيا جاساۋشى رەتىندە قالىپتاسقان يسلانديا قۇراماسى بۇل جولى دا عايىپتان تايمادى. ۋكراينا, حورۆاتيا, تۇركيا سەكىلدى ازۋلى ۇجىمدارمەن ءبىر توپتا بولعان ارالدىڭ جىگىتتەرى «لاۋگاردالسۆەلليۋر» ستاديونىندا ەش قارسىلاسقا ەسە جىبەرمەدى. قارسىلاس قۇرامالار سۋىق اۋا رايى مەن كليماتقا بەيىمدەلە الماي, يسلانديادان جەڭىلىپ جاتتى دەسەڭىزدەر, وندا يسلانديا فۋتبولشىلارى اتالعان قۇرامالاردى سىرت الاڭدا دا تۇقىرتتى ەمەس پە؟ وسىلايشا, حورۆاتيانى ارتقا تاستاپ, توپتاعى ءبىرىنشى ورىندى يەمدەنىپ, حەيمير حادلگريمسسون شاكىرتتەرى رەسەيدە وتەتىن الەم چەمپيوناتىنا سەنىمدى تۇردە جولداما الدى.
يسلانديا قۇراماسىنىڭ ءتىزىمى:
• قاقپاشىلار: حاننەس حاللدوۋرسسون (راندەرس, دانيا), رۋنار رۋنارسسون (نورشەللانن, دانيا), فرەدەريك شرام (روسكيللە, دانيا);
• قورعاۋشىلار: اري سكۋلاسون (لوكەرەن, بەلگيا), حەرديۋر ماگنۋسسون (بريستول سيتي, انگليا), راگنار سيگۋردسسون (روستوۆ, رەسەي), كاري ارناسون (ابەردين, شوتلانديا), حولمار ەيولفسسون (لەۆسكي, بولگاريا), سۆەررير ينگاسون (روستوۆ, رەسەي), بيركير سەۆارسسون (ۆاليۋر, يسلانديا), سامۋەل فريدوۋنسسون (ۆولەرەنگا, نورۆەگيا);
• جارتىلاي قورعاۋشىلار: گيۋلفي سيگۋردسسون (ەۆەرتون, انگليا), ارون گۋننارسسون (كارديفف سيتي, ۋەلس), ەميل حادلۆرەدسسون (ۋدينەزە, يتاليا), بيركير بيارناسون (استون ۆيللا, انگليا), يوحانن گۋدمۋندسسون (بەرنلي, ان-
گليا), ولافۋر سكۋلاسون (كارابيۋكسپور, تۇركيا), ارنور تراۋستاسون (مالمە, شۆەتسيا), ريۋريك گيسلاسون (زاندحاۋزەن, گەرمانيا);
• شابۋىلشىلار: الۆرەد فيننبوگاسون (اۋگسبۋرگ, گەرمانيا), بورن سيگۋردارسون (روستوۆ, رەسەي), يون بەدۆارسسون (رەدينگ, انگليا), البەرت گۋدمۋندسسون (پسۆ, گوللانديا).
ەرمۇحامەد ماۋلەن,
«ەگەمەن قازاقستان»
