بۇگىندە قوعامدىق كولىكتەردىڭ قورشاعان ورتاعا تيگىزەتىن زياندى اسەرلەرىن ازايتۋ, قىزمەت ساپاسىن جاقسارتۋ باستى ماسەلەلەردىڭ ءبىرى سانالادى. قالالىق اكىمدىكتىڭ وتىرىسىندا بىرىككەن ۇلتتار ۇيىمى دامۋ باعدارلاماسى ساراپشىلارىنىڭ ءبىر جىل بويى جەرگىلىكتى قوعامدىق كولىك جاعدايىن زەرتتەپ, جۇمىس جۇيەسىن جاقسارتۋعا باعىتتالعان مونيتورينگتىڭ قورىتىندىلارى شىعارىلدى. ونداعى ماقسات–ەكولوگياعا تارالاتىن زياندى قالدىقتار مولشەرىن انىقتاۋ, الدىن الۋ, بولدىرماۋ شارالارىن ۇسىنۋ.
«بۇۇ-نىڭ دامۋ باعدارلاماسىنىڭ وكىلدەرى قازاقستاننىڭ بىرقاتار قالالارىندا ەكولوگيانىڭ جاقسارۋىنا, «جاسىل ەكونوميكانىڭ» تۇزىلۋىنە ءوز ۇلەسىن قوسىپ كەلەدى. وسى جولعى زەرتتەۋ جۇمىستارى جولاۋشىلار تاسىمالىن جەتىلدىرۋ سالاسىندا ەلەۋلى پروبلەمالاردىڭ ورىن الىپ وتىرعانىن بايقاتتى», دەدى دامۋ باعدارلاماسىنىڭ ساراپشىسى, امستەردام قالاسى جولاۋشىلار كولىگى بويىنشا اعا كەڭەسشى گۋيدو برۋگگەمان.
ونىڭ ايتۋىنشا اقپاراتتاندىرۋ جۇيەسىن جاقسارتۋ, اۆتوبۋستاردىڭ ءجۇرۋ كەستەسىن وڭتايلاندىرۋ, ۋاقىتتى كورسەتەتىن ەلەكتروندىق تابلو ورناتۋ جۇرگىزۋشىلەر جانە جۇرگىنشىلەر ءۇشىن كوپتەگەن قولايلى مۇمكىندىكتەر تۋعىزادى. ەكىنشىدەن, ەسكى كولىكتەردى ەكولوگيالىق جاعىنان ءتيىمدى جاڭالارىمەن الماستىرۋ, ۇشىنشىدەن JPS باقىلاۋىن ورناتۋ, تورتىنشىدەن بىرىڭعاي بيلەتتى ەنگىزۋ ماڭىزدى. جولاۋشى باراتىن جەرگە جەتۋ ءۇشىن ەكى نەمەسە ءۇش اۆتوبۋستى الماستىرعاننىڭ وزىندە بىرىڭعاي بيلەت جۇيەسىن قاراستىرعان ءجون.
پەتروپاۆل قالالىق تۇرعىن ءۇي كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ سەكتور مەڭگەرۋشىسى ەرجان اقاپوۆ تاسىمالداۋشى كومپانيالار ءوز قاراجاتىنا 6 جاڭا اۆتوبۋس ساتىپ العانىن, جىل سوڭىنا دەيىن ەۋرو-5 ستاندارتىنا جاتاتىن تاعى 20 اۆتوبۋس كولىك ساتىپ الاتىنىن جەتكىزدى.
ازىرگە جاڭا وزگەرىستەر جولاقىنىڭ باعاسىنا قانشالىقتى اسەر ەتەتىنى بەلگىسىز.
ءومىر ەسقالي,
"ەگەمەن قازاقستان"
پەتروپاۆل
