ءىس-شاراعا ۇلتتىق رەسپۋبليكالىق كيوكۋشينكاي-كان كاراتە فەدەراتسياسىنىڭ پرەزيدەنتى, پارلامەنت ءماجىلىسىنىڭ دەپۋتاتى ومارحان وكسىكباەۆ, اتالعان فەدەراتسيانىڭ ۆيتسە-پرەزيدەنتى سايرانبەك ابىلقايىروۆ, باس باپكەرى ازامات تاكەنوۆ قاتىستى.
«2018 جىلعى 15-17 ماۋسىم كۇندەرى «داۋلەت» سپورت كەشەنىندە, استانا قالاسىنىڭ 20 جىلدىق مەرەيتويىنا وراي كيوكۋشينكاي-كان كاراتەدەن بالالار, جاسوسپىرىمدەر, كىشى جاستاعى قىزدار, ەرلەر جانە ايەلدەر اراسىندا اشىق ازيا چەمپيوناتى وتەدى. بۇل چەمپيوناتتا كۋميتە جانە كاتا ءتۇرى بويىنشا 12 جاستان جوعارى سپورتشىلار 37 سالماقتا سىنعا تۇسەدى. قۇرلىقتىق باسەكەگە 12 مەملەكەتتەن 250-گە جۋىق سپورتشى قاتىسادى دەپ جوسپارلانعان. قازىرگى تاڭدا چەمپيوناتقا قاتىسۋعا يران, يراك, ءۇندىستان, اۋعانستان, تاجىكستان, قىرعىزستان, رەسەي, جاپونيا, موڭعوليا, تۇرىكمەنستان مەملەكەتتەرىنەن وتىنىمدەر ءتۇستى», دەدى ومارحان وكسىكباەۆ.
جىلدىڭ بايراقتى باسەكەسىندە ەل نامىسىن ەرلەر اراسىنداعى الەم چەمپيو-
نى الىشەر كارمەنوۆ, 2015 جىلدىڭ ازيا چەمپيونى, الەم بىرىنشىلىگىنىڭ كۇمىس جۇلدەگەرى نيكيتا گاراس, ايەلدەر اراسىنداعى الەم چەمپيوناتىنىڭ كۇمىس جۇلدەگەرى الەمگۇل سابىرحان, جاستار اراسىنداعى الەم چەمپيوناتىنىڭ كۇمىس جۇلدەگەرى مادينا ساۋىتوۆا سىندى ەلىمىزدىڭ ۇزدىك جاس تاتامي شەبەرلەرى قورعايتىن بولادى.
راۋان قايدار,
«ەگەمەن قازاقستان»
