مەكسيكالىق بوكسشىنىڭ پروموۋتەرى وسكار دە لا حويا بوكس كەشى 15 قىركۇيەك كۇنى, ياعني مەكسيكا ەلىنىڭ ەگەمەندىك العان كۇنى وتەتىنىن مالىمدەدى.
«جەكپە-جەك 15 قىركۇيەكتە وتەتىنىن قۋانا حابارلايمىن», دەپ جازدى وسكار دە لا حويا Twitter پاراقشاسىندا.
ايتا كەتەرلىگى گولوۆكين مەن الۆارەس اراسىنداعى رەۆانش وتكىزۋ تۋرالى كەلىسسوز نەبارى ءبىر جارىم ساعاتقا سوزىلدى. باستاپقىدا مەكسيكالىق تاراپتىڭ پروموۋتەرى ESPN باسىلىمىنا بەرگەن سۇحباتىندا «ەكىنشى كەزدەسۋ وتپەيدى, 100 پايىز», دەگەن. بىراق بەس مينۋتتان كەيىن قوس تاراپ كەلىسسوز وتكىزۋ ءۇشىن ۇستەل باسىنا وتىردى.
وسىعان دەيىن دە لا حويا بوكس كەشىنەن تۇسكەن قارجىنىڭ 57,5 پايىزى ساۋل الۆارەسكە, ال قالعان 42,5 پايىزى گولوۆكيننىڭ ەنشىسىنە تۇسەتىنى تۋرالى ۇسىنىس جاساعان. كەرى جاعدايدا جەكپە-جەكتەن باس تارتىپ, دەنيەل دجەيكوبستىڭ تاراپىمەن كەلىسسوز وتكىزەتىنىن جەتكىزدى.
گولوۆكين-الۆارەس كەزدەسۋى قاي جەردە وتەتىنى ازىرگە بەلگىسىز. بىراق مەكسيكالىق تاراپتىڭ وكىلدەرى لاس ۆەگاستاعى T-Mobile ارەناسىن 15 قىركۇيەككە برونداپ قويعانى بەلگىلى بولدى.
ايتا كەتەيىك, ەكى بوكسشىنىڭ اراسىنداعى ايقاس العاش رەت وتكەن جىلى 16 قىركۇيەكتە ءدال وسى T-Mobile ارەناسىندا ءوتىپ, تەڭ اياقتالعان. ال رەۆانش 5 مامىرعا جوسپارلانعان ەدى, الايدا مەكسيكالىق بوكسشىنىڭ دوپينگ سىناماسى وڭ ناتيجە بەرۋىنە بايلانىستى جەكپە-جەك وتپەدى. ارتىنشا الۆارەس جارتى جىلعا سپورتتان شەتتەتىلدى. جازا تامىز ايىندا اياقتالادى.
ال گەننادي گولوۆكين 5 مامىر كۇنى امەريكالىق ۆانەس مارتيروسيانمەن جۇدىرىقتاسىپ, ەكىنشى راۋندتا نوكاۋتپەن جەڭدى. وسى كەزدەسۋ ءۇشىن قازاقستاندىق بوكسشى IBF جەلىسى بويىنشا وتەتىن مىندەتتى كەزدەسۋىن كەيىنگە شەگەردى. ال جاقىندا ۋكراينالىق سەرگەي دەرەۆيانچەنكومەن مىندەتتەلگەن ايقاسىن وتكىزۋ ءۇشىن قاعاز تۇرىندە كەلىسىم بەرۋدەن باس تارتىپ, IBF تيتۋلىنان ايىرىلدى.
IBF-شەشىمىنەن كەيىن گولوۆكين مەكسيكالىق ارىپتەسىمەن كەلىسسوزگە قايتا ورالدى. قازاقستاندىق بوكسشى باستاپقىدا الۆارەستىڭ دوپينگ داۋىنا بايلانىستى تابىستى 50-50 پايىزعا ءبولۋ تۋرالى تالابىنان باس تارتتى.
