بۇل – رەسەي مەن شىعىس ەۋروپا تورىندەگى جانە قازاقستانعا ەڭ جاقىن جەردە وتەتىن تۇڭعىش جاھان بىرىنشىلىگى. الەمدىك دوپ دوداسىنداعى كەزدەسۋلەر 14 ماۋسىم مەن 15 شىلدە ارالىعىندا رەسەيدىڭ 11 قالاسىنداعى 12 ستاديوندا وتەدى. چەمپيوناتتىڭ شىمىلدىعى رەسەي مەن ساۋد ارابياسى اراسىنداعى ماتچپەن اشىلادى.
رەسەي فەدەراتسياسى 2009 جىلى حالىقارالىق فۋتبول فەدەراتسياسىنا (فيفا) 2018 جىلعى الەم چەمپيوناتىن وتكىزۋگە ءوتىنىش بەرىپ, 2010 جىلدىڭ 2 جەلتوقسانىندا تسيۋريحتە ۇيىمداستىرۋ كوميتەتى داۋىس بەرۋ ناتيجەسى بويىنشا جەڭىسكە جەتتى. داۋىس بەرۋدىڭ ەكى كەزەڭى بويىنشا رەسەي فەدەراتسياسى جەڭىمپاز دەپ تانىلىپ, 2018 جىلعى الەم چەمپيوناتىن وتكىزۋ قۇقىعىنا يە بولدى.
بيىلعى دوپ دوداسىن ۇيىمداستىرۋ ءۇشىن رەسەي 480 ملرد رۋبل جۇمساعان. بۇل تۋرالى جىل باسىندا «رەسەي – 2018» ۇيىمداستىرۋ كوميتەتىنىڭ وكىلى الەكسەي سوروكين مالىمدەدى. قارجىنىڭ ءبىراز بولىگى ءتورت ستاديوندى قايتا جوندەۋدەن وتكىزۋگە جانە بەس جاڭا ستاديون سالۋعا جۇمسالعان. 2014 جىلعى الەم چەمپيوناتىن ۇيىمداستىرۋعا برازيليا ۇكىمەتى 11,63 ملرد دوللار جۇمساعان-دى.
2018 جىلعى الەم چەمپيوناتىنىڭ رەسمي لوگوتيپى 2014 جىلى تانىستىرىلدى. ونىڭ تانىستىرۋ راسىمىنە فيفا-نىڭ سول كەزدەگى پرەزيدەنتى يوزەف بلاتتەر, رەسەي فەدەراتسياسىنىڭ سپورت ءمينيسترى ۆيتالي مۋتكو جانە 2006 جىلعى الەمنىڭ ۇزدىك فۋتبولشىسى يتاليالىق فابيو كانناۆارو قاتىستى. ال بىرىنشىلىكتىڭ تاليسمانى رەتىندە زابيۆاكا اتتى قوڭىر تۇكتى جانە كوگىلدىر كوزدى انتروپومورفتى قاسقىر تاڭدالعان. زابيۆاكانىڭ كيىمىندەگى اق, كوك جانە قىزىل تۇستەر رەسەي تۋىنىڭ ءتۇسىن بەينەلەيدى. چەمپيوناتتىڭ ءانۇرانىن اشىلۋ سالتاناتىندا امەريكالىق اكتەر, حيپ-حوپ ورىنداۋشى ۋيلل سميت پەن نيكي دجەم جانە البانيالىق ەرا يسترەفي شىرقايدى.
چەمپيوناتتىڭ اشىلۋ سالتاناتى بۇگىن ماسكەۋدەگى «لۋجنيكي» ستاديونىندا وتەدى. وعان فيفا پرەزيدەنتى دجانني ينفانتينو, رەسەي پرەزيدەنتى ۆلاديمير پۋتين مەن بىرنەشە مەملەكەتتىڭ باسشىلارى قاتىسادى. ولاردىڭ ىشىندە قازاقستان پرەزيدەنتى نۇرسۇلتان نازارباەۆ تا بار. ەلباسىن ۆ.ءپۋتيننىڭ ءوزى ارنايى شاقىرعان بولاتىن.
جاھاندىق جارىس باستالماس بۇرىن ماماندار مەن جانكۇيەرلەر بيىلعى چەمپيوناتتا كىم توپ جاراتىنىنا وزدەرىنشە بولجام جاساپ وتىر. شەتەلدىك Goldman Sachs ينۆەستيتسيالىق بانكىنىڭ ساۋالناماسى بويىنشا, بيىل برازيليا قۇراماسى الەمنىڭ التى دۇركىن چەمپيونى اتانۋى مۇمكىن. ەكىنشى ورىندا فرانتسيا بولسا, ۇزدىك ۇشتىكتى گەرمانيا قۇراماسى قورىتىندىلاپ تۇر. ال ينۆەستيتسيالىق بانكتىڭ بولجاۋىنشا, جارىس قوجايىندارى ءتىپتى توپتان دا شىعا الماۋى ىقتيمال. الايدا مۇنىڭ بارلىعى تەك بولجام ەكەنى بەلگىلى. جاعدايدىڭ قالاي ءوربيتىنىن الداعى ويىندار كورسەتەدى.
ايتا كەتەيىك, ساناۋلى ساعاتتاردان سوڭ باستالاتىن الەم چەمپيوناتىن ەلىمىز بويىنشا كورسەتۋ قۇقىعىن «قازاقستان» رترك» يلەنگەن. قازاقستاندىق فۋتبول جانكۇيەرلەرى رەسەي جەرىندە وتەتىن فۋتبول تويىن ءبىر اي بويى «Qazaqstan» جانە «Qazsport» تەلەارنالارىنان تاماشالاي الادى. سونىمەن قوش كەلدىڭ فۋتبول تويى!
ءالي بيتورە,
«ەگەمەن قازاقستان»
