سەگىزىنشى سىنىپتان كەيىن ليتسەي تابالدىرىعىن اتتاپ, ءۇش جىل بويى تاربيە-تاعىلىم العان ۇلاندار ەندى بىلىمدەرىن قازاقستاننىڭ قارۋلى كۇشتەرى قاتارىندا جەتىلدىرىپ, وتان قورعايتىن بولادى.
مەرەكەلىك شارا ءداستۇر بويىنشا ليتسەي تۋىن سالتاناتتى تۇردە الىپ شىعۋمەن باستالدى.تۋ ۇستاۋشى توپ قۇرامىن زاپاستاعى كاپيتان ا.سادىقوۆ باستاپ, 11-سىنىپتىڭ ۇزدىكتەرى د.باحتياروۆ, ج. بەكەن, ا.رايىمبەكوۆ ليتسەي تۋىن وركەستردىڭ سالتاناتتى شەرۋىمەن بيىكتە جەلبىرەتتى.
تۇلەكتەردى قۇتتىقتاعان «ارىستان» مامانداندىرىلعان ليتسەيىنىڭ باستىعى, اسكەري عىلىمدار اكادەمياسىنىڭ تولىق مۇشەسى, زاپاستاعى گەنەرال-مايور س.س.تاۋلانوۆ «ەرجۇرەك, ۇلتجاندى ازامات بولۋ ءۇشىن تەرەڭ ءبىلىم مەن مىقتى تاربيە قاجەت. مەملەكەتتىڭ بولاشاقتا تىزگىنىن ۇستايتىن پاراساتتى ۇرپاق رەتىندە اسار اسۋلارىڭىز بيىك, ارماندارىڭ ايقىن, قادامدارىڭىز نىق, ومىرلىك جولدارىڭىز اق بولسىن!» دەگەن تىلەگىن ءبىلدىرىپ, ليتسەي شاكىرتتەرىنىڭ بىلىمدە جانە سپورتتاعى ۇزدىك جەتىستىكتەرى تۋرالى باياندادى.
ون ءبىرىنشى سىنىپ تۇلەكتەرىنىڭ ونىنشى سىنىپ وقۋشىلارىنا تۋ تاپسىرۋ ءراسىمى ليتسەيدەگى كەزەكتى ءداستۇرلى شارا. ليتسەي تۋى – ار, ابىروي, ەرلىكتىڭ نىشانى. ول ءاربىر ۇلاندى وتانىنا ادال قىزمەت ەتۋگە, ەرلىكپەن قورعاۋعا شاقىرىپ تۇرعانداي. ءداستۇرلى تۋ تاپسىرۋ سالتاناتىنان كەيىن «ارىستان» مامانداندىرىلعان ليتسەيى باستىعىنىڭ تاربيە ءىسى جونىندەگى ورىنباسارى, زاپاستاعى پولكوۆنيك ۆ.ا.رايحەل تۇلەكتەردى قۇتتىقتادى.
ەندىگى كەزەكتە ءبىتىرۋشى تۇلەكتەر ءۇشىن قۋانىشتى ءسات – اتتەست جانە توسبەلگى تاپسىرۋ ءراسىمى. ليتسەي تۇلەكتەرىنىڭ مەكتەپ ءبىتىرۋ كەشىنە قامقورشىلار كەڭەسىنىڭ توراعاسى ت.ا.ق ۇلىباەۆ ارنايى كەلىپ, تۇلەكتەرگە قۇتتىقتاۋ لەبىزىن ارنادى. «التىن بەلگى» يەگەرلەرى گ.گلامدۋن, د.سالاۋاتوۆ, س.وڭعارباەۆقا ورتا مەكتەپتى ءبىتىرۋ تۋرالى اتتەستاتتارىن سالتاناتتى تۇردە تابىس ەتتى.
مەرەكەلىك شاراعا قورعانىس ءمينيسترىنىڭ ورىنباسارى گەنەرال-لەيتەنانت ت.س.مۇحتاروۆ, اسكەري جوعارى وقۋ ورىندارىنىڭ باسشىلارى – قۇرلىق اسكەرلەرىنىڭ اسكەري ينستيتۋتىنىڭ باستىعى پولكوۆنيك س.د.اسانوۆ, راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باستىعى پولكوۆنيك ا.د.مۇستابەكوۆ, دەسانتتىق شابۋىلداۋ اسكەرلەرىنىڭ قولباسشىسى ك.س.قاراقۇلوۆ, اۋە شابۋىلىنا قارسى قورعانىس اسكەرلەرىنىڭ قولباسشىسى قارۋلى كۇشتەرى اۋە قورعانىسى كۇشتەرىنىڭ گەنەرال-مايورى س.ب.يسمايلوۆ جانە قر قارۋلى كۇشتەرىنىڭ ارداگەرلەرى, ت.ب. قاتىستى.
ليتسەي كەشىندە اتا-انالار دا قاتىسىپ, قۇتتىقتاۋ لەبىزدەرىن ءبىلدىردى. سالتاناتتى كەش تۇلەكتەر دايىنداعان كونتسەرتتىك قويىلىمدار مەن اسكەري-سپورتتىق وقۋ-جاتتىعۋلارمەن جالعاسىن تاپتى.
ا.ەسەنعوجاەۆا,
«ارىستان» ليتسەيىنىڭ وقىتۋشىسى
الماتى
