الەم چەمپيوناتىنىڭ باستالۋىنا ءبىر كۇن قالعاندا باپكەردىڭ قىزمەتىنەن بوساتىلۋى رۋبيالەستىڭ باستاماسى بولىپ وتىر. لوپەتەگيدىڭ ۇلتتىق قۇرامامەن 2020 جىلعا دەيىن جاڭا كەلىسىمشارتقا وتىرعانىنا ءبىر اي دا بولا قويعان جوق. وسىنداي مىندەتى بولا تۇرا «رەالمەن» كەلىسىمشارت جاساۋىن يسپانيا فۋتبول فەدەراتسياسىنىڭ پرەزيدەنتى ساتقىندىققا بالاپ, ونى جۇمىسىنان قۋدى كەشە تالاپ ەتكەن.
ء«بىز باس باپكەردىڭ قىزمەتىنەن باس تارتۋىمىزعا تۋرا كەلدى. وعان الداعى ۋاقىتتا تەك ساتتىلىك تىلەيمىز. ءوزىمدى ساتقىن رەتىندە سەزىنبەيمىن. ماسەلە «رەالدىڭ» بۇكىل جۇمىستى يسپانيا فەدەراتسياسىنىڭ تۋ سىرتىنان ىستەگەنىندە بولىپ تۇر. ءبىز بۇنى نازاردان تىس قالدىرا المايمىز. يسپانيا قۇراماسىنىڭ بارلىق قىزمەتكەرى ارنايى قابىلدانعان ەرەجە بارىن ۇمىتپاۋى ءتيىس. لوپەتەگيدىڭ كاسىبيلىگىنە داۋ جوق. بىراق كەز كەلگەن ىس ەرەجە بويىنشا جۇزەگە اسىرىلۋى كەرەكتىگىن ەستە ساقتاعان ءجون», دەدى رۋبيالەس.
يسپانيا فۋتبول فەدەراتسياسىنىڭ شەنەۋنىكتەرى لوپەتەگيدىڭ قىزمەتىنەن بوساتىلۋىن قولداسا, اندرەس ينەستا, سەريحيو راموس, داۆيد سيلۆا باستاعان ويىنشىلار بۇل ىسكە قارسىلىق ءبىلدىردى. ءبىر قىزىعى Marca باسىلىمى بىرەر ساعات بۇرىن فۋتبولشىلاردىڭ باس باپكەردى ورنىندا قالدىرۋىن كوندىرگەنىن حابارلاعان.
«رەال» بىلىكتى باپكەر ىزدەپ, ۇزدىكتەردىڭ بىرىنە توقتالعانىنا كۇمانىم جوق. بىراق ۇلتتىق قۇراما ەلدەگى بۇكىل كلۋبتىڭ كومانداسى ەكەنى ۇمىتپايىق. ءبارى ءوز ورنىمەن بولۋى ءتيىس. رەسمي اقپاراتتىڭ شىعۋىنا بەس مينۋت قالعاندا فەدەراتسيانى قۇلاعدار ەتۋ دۇرىس ەمەس», دەدى لۋيس رۋبيالەس.
ەندى يسپانيا قۇراماسىن الەم چەمپيوناتىندا فەرناندو يەررو (يسپانيا فۋتبول فەدەراتسياسىنىڭ سپورت ديرەكتورى) نەمەسە البەرت سەلادەس (يسپانيا U-21) جاتتىقتىرادى دەپ كۇتىلىپ وتىر. ەكەۋى دە دەلەگاتسيا قۇرامىندا رەسەيگە كەلگەن.
ايتا كەتەيىك, كەشە «رەال» باسشىلىعى الەم چەمپيوناتى اياقتالعاننان كەيىن كوماندانى حۋلەن لوپوتەگي جاتتىقتىراتىنىن حابارلاعان. ال يسپانيا قۇراماسى مەن باپكەر اراسىنداعى جاڭا كەلىسىمشارتتى ۋاقىتىنان بۇرىن بۇزۋ ۇشىن «رەال» ەكى ملن ەۋرو تولەگەن.
