وسى ورايدا ۇلتتىق بيۋرو كەڭەسشىسى كەنجەحان ماتىجانوۆ, كونسەرۆاتوريا رەكتورى ءجانيا اۋباكىروۆا جانە پروفەسسورلىق-وقىتۋشىلىق قۇرامىنىڭ قاتىسۋىمەن دوڭگەلەك ۇستەل ءوتتى. جيىن بارىسىندا كىتاپتاردىڭ, وقۋلىقتاردىڭ مازمۇنى مەن ماڭىزدىلىعى تالقىلانىپ, ستۋدەنتتەردىڭ عىلىمي-زەرتتەۋ جۇمىستارى بويىنشا جاڭا جوبالار مەن پىكىرلەر تالقىلاندى.
كونسەرۆاتوريا رەكتورى ج.اۋباكىروۆا كىتاپحانا قورىنا تاپسىرىلعان كىتاپتاردىڭ ساپاسىنا, مازمۇنىنا قاتىستى پىكىرىن ءبىلدىرىپ, كورنەكتى عالىمداردىڭ زاماناۋي دەرەكتەرمەن, ادىستەمەلەرمەن تولىقتىرىلعان وقۋلىقتار ستۋدەنتتەر ءۇشىن ەرەكشە تارتۋ بولدى, دەپ اتاپ ءوتتى. الداعى ۋاقىتتا جوباعا مۋزىكا ونەرىنە قاتىستى دا وقۋلىقتاردى ەنگىزۋ تۋرالى ۇسىنىسىن ءبىلدىردى. ۇلتتىق بيۋرو كەڭەسشىسى كەنجەحان ماتىجانوۆ اۋدارمالار بيۋروسى ۇسىنىستاردى قابىلداۋعا دايىن ەكەنىن ءارى جوبا مۋزىكالىق ادەبيەتتەرمەن تولىقتىرىلاتىندىعىن جەتكىزدى. «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» باعدارلاماسىنىڭ شەڭبەرىندە شىعارىلعان كىتاپتار بارلىق تالاپتارعا ساي ءارى الەمدىك ۋنيۆەرسيتەتتەردىڭ سۇرانىسىندا يە بولۋى قاجەت. ەگەر وسى تالاپتار ورىندالىپ جاتسا, وندا قازاق تىلىندەگى وقۋلىقتار مىندەتتى تۇردە شىعاتىن بولادى.
كونسەرۆاتوريانىڭ وقىتۋشىلار قۇرامى پسيحولوگيا, فيلوسوفيا, ەكونوميكا, دىنتانۋعا قاتىستى جاڭا وقۋلىقتارمەن تانىسىپ, ءوز پىكىرلەرىن ءبىلدىردى. قۇرمانعازى اتىنداعى قۇك پروفەسسورى تامارا ساتىبالدينا «ورتا عاسىر فيلوسوفياسى» وقۋلىعىن قاراپ شىعىپ, قازاق تىلىندە وقيتىن ستۋدەنتتەرگە قىزىعىپ وتىرمىن. ءتىلى اۋىرلاۋ بولعانىمەن, بىزدە عىلىمي جۇمىستارمەن اينالىسىپ, فيلوسوفيانى تەرەڭنەن زەرتتەپ جۇرگەن ستۋدەنتتەر بار» دەگەن پىكىرمەن ءبولىستى.
ەسكەرە كەتەتىن جايت, مەملەكەتتىك تىلدەگى 17 جاڭا وقۋلىق قىركۇيەك ايىنان وقۋ ۇردىسىنە ەنگىزىلەتىن بولادى.
ەلۆيرا سەرىكقىزى,
«ەگەمەن قازاقستان»
الماتى
