70-جىلداردان بەرى قاراي دانيا فۋتبولىنىڭ دامۋى جاڭا دەڭگەيگە كوتەرىلدى. 1977 جىلى تۇڭعىش رەت دانيالىق اللان سيمونسەن الەمنىڭ ۇزدىك فۋتبولشىسىنا بەرىلەتىن «التىن دوپتى» يەلەندى. وسىدان باستاپ دانيا كلۋبتارى كاسىپقوي كوماندا دارەجەسىن الىپ, لەگيونەرلەردى تارتۋ جانە مىقتى فۋتبولشىلاردىڭ ەۋروپانىڭ ەڭ ۇزدىك چەمپيوناتتارىنا ترانسفەر جاساۋىنا جانە ءدال وسى جاعداي ەلدەگى فۋتبولدىڭ ودان ارى قاراي دامۋىنا مۇمكىندىك بەردى. ەۋروپانىڭ ۇزدىك كوماندالارىندا ويناي باستاعان ميكاەل لاۋدرۋپ, پرەبەن ەلكياەر, يەسپەر ولسەن, مورتەن ولسەن جانە سەرەن لەربيۋ سەكىلدى فۋتبولشىلار 80-جىلداردىڭ باسىندا بۇكىل الەمدى تامساندىرىپ, جانكۇيەرلەر سول كەزدەگى دانيا قۇراماسىنا «دات ءديناميتى» دەپ ايدار تاققانى بار.
دانيالىقتار 1958 جىلعى الەم چەمپيوناتىنا قاتىسۋعا تالپىنىپ كورگەن, الايدا ىرىكتەۋ كەزەڭىندە جولدارى بولمادى. وسىدان سوڭ بىرىنشىلىككە قاتىسۋ تالپىنىسى بىرنەشە جىل ناتيجەسىز اياقتالىپ, تۇڭعىش رەت 1986 جىلعى مەكسيكاداعى فۋتبول تويىنا قاتىسۋعا مۇمكىندىك الدى. سول بىرىنشىلىكتە «دات ءديناميتى» ءۇش ويىندا جەڭىسكە جەتىپ, ءبىر ويىندا جەڭىلىپ, 1/8 فينالعا دەيىن جەتتى. وسىدان سوڭ دانيا قۇراماسى الەم چەمپيوناتىنا تەك 1998 جىلى فرانتسيادا وتكەن بىرىنشىلىككە قاتىستى. ءوز توبىندا ەكىنشى ورىن العان دانيالىقتار 1/8 فينالدا نيگەريا قۇراماسىنان 4:1 ەسەبىمەن باسىم تۇسكەنىمەن, 1/8 كەزەڭىندە برازيليا قۇراماسىنان جەڭىلىپ قالدى. 2002 جىلى وڭتۇستىك كورەيا مەن جاپونيادا ۇيىمداستىرىلعان ءتورت جىلدىقتىڭ باستى دوداسىندا دانيا 1/8 فينالعا دەيىن جەتسە, 2010 جىلى وار-دا وتكەن بىرىنشىلىكتە توپتىق كەزەڭىنەن ءارى اسا المادى. ءبىر كەزدەسۋدە جەڭىسكە جەتىپ, ەكى ويىندا جەڭىلگەن دانيالىقتار چەمپيوناتپەن ەرتە قوشتاستى. جالپى ايتقاندا, دانيا قۇراماسى الەم چەمپيوناتىنىڭ فينالدىق كەزەڭىنە ءتورت رەت قاتىسىپ, ءۇش رەت پلەي-وفف كەزەڭىنە دەيىن جەتكەن.
ىرىكتەۋ كەزەڭىندەگى دانيا قۇراماسى قازاقستاندىق فۋتبول جانكۇيەرلەرىنە جاقسى تانىس. ويتكەنى سكانديناۆيا ەلىنىڭ وكىلدەرى ىرىكتەۋ كەزەڭىندە قازاقستان قۇراماسىمەن «ە» توبىندا سىنعا ءتۇستى. 2016 جىلعى ءوز الاڭىندا وتكەن كەزدەسۋدە دانيا قۇراماسى وتانداستارىمىزدان 4:1 ەسەبىمەن باسىم تۇسسە, ءبىر جىلدان كەيىن الماتىداعى قارىمتا كەزدەسۋدە دە دانيالىقتار 3:1 ناتيجەسىمەن جەڭىسكە جەتتى.
جالپى, دانيا فۋتبولشىلارى توپتىق كەزەڭدە پولشا قۇراماسىنان بەس ۇپاي از جيناپ, ەكىنشى ورىندى يەلەندى. ىرىكتەۋ كەزەڭىندە سەگىز گول سوققان كريستيان ەريكسەن دانيا قۇراماسىنىڭ ۇزدىك سۇرمەرگەنى بولدى. توپتا ەكىنشى ورىن يەلەنگەن دانيا جولداماعا بىردەن يە بولعان جوق. قوسىمشا جولدامانى يرلانديا قۇراماسىمەن بىرگە ساراپقا سالىپ, ەكى ويىن قورىتىندىسى بويىنشا 5:1 ەسەبىمەن دانيا قۇراماسى جەڭىسكە جەتىپ, سەگىز جىلدان سوڭ الەم چەمپيوناتىنا قايتا جولداما الدى.
دانيالىقتار رەسەيدە الەم چەمپيوناتىندا «س» توبىندا فرانتسيا, پەرۋ جانە اۋستراليا قۇرامالارىمەن بىرگە وينايدى. جالپى, فرانتسۋزدارمەن ءبىر توپتا سىنعا ءتۇسۋ كوبىنە دانياعا ساتتىلىك الىپ كەلەتىنىن ايتا كەتكەن ءجون. مىسالى, ەۋرو-92 تۋرنيرىندە دە, 1998, 2002 جىلدارداعى الەم چەمپيوناتىندا دا بۇل ەكى قۇراما ءبىر توپتا ويناعان جانە بارلىعىندا دانيا قۇراماسى توپتىق كەزەڭنەن ءساتتى وتكەن.
دانيانىڭ العاشقى ويىنى 16 ماۋسىم كۇنى ساران قالاسىندا پەرۋ قۇراماسىنا قارسى وتەدى. 21 ماۋسىمدا سامارادا اۋستراليا – دانيا ماتچى جوسپارلانعان. ال 26 ماۋسىمداعى توپتىق كەزەڭنىڭ سوڭعى ويىنىندا ەۋروپانىڭ اتالعان ەكى وكىلى جولىعادى. بالكىم, بۇل جولى فرانتسۋزدار دانيانى توپتان الىپ شىعا الماۋى مۇمكىن. جالپى, توپتان قاي قۇراما شىعىپ, قايسىسى ەلىنە قايتاتىنى وسى ويىندا شەشىلەتىن سياقتى.
دانيا
قۇراماسىنىڭ ءتىزىمى:
• قاقپاشىلار: فرەدەريك رەننوۆ («بروندبيۋ»), يوناس لەسسل («حاددەرسفيلد»), كاسپەر شمەيحەل («لەستەر»);
• قورعاۋشىلار: اندرەاس كريستەنسەن («چەلسي»), حەنريك دالسگور («برەنتفورد»), ياننيك ۆەستەرگور («بورۋسسيا ميونحەنگلادباح»), يەنس لارسەن («ۋدينەزە»), يوناس كنۋدسەن («يپسۆيچ تاۋن»), ماتياس يورگەنسەن («حاددەرسفيلد تاۋن»), سيمون كەر («سەۆيليا»);
• جارتىلاي قورعاۋشىلار: كريستيان ەريكسەن («توتتەنحەم حوتسپۋر»), لاسسە شەنە («اياكس»), لۋكاس لەراگەر («بوردو»), ميكاەل كرون-دەلي («دەپورتيۆو»), توماس ديلەيني («ۆەردەر»), ۆيلليام كۆيست («كوپەنگاگەن»);
• شابۋىلشىلار: اندرەاس كورنەليۋس («اتالانتا»), كاسپەر دولبەرگ («اياكس»), مارتين برەيتۋەيت («بوردو»), نيكولاي يورگەنسەن («فەيەنوورد»), پيونە سيستو («سەلتا»), ۆيكتور فيشەر («كوپەنگاگەن»), يۋسسۋف پوۋلسەن («رب لەيپتسيگ»).
ءالي بيتورە,
«ەگەمەن قازاقستان»
