18 مامىردا ەلىمىزدە جيتس-تەن قايتىس بولعان ادامداردى ەسكە الۋدىڭ حالىقارالىق كۇنىنە وراي, «ۇمىتپايمىز! بىلەمىز! جەڭەمىز!» اتتى رەسپۋبليكالىق ناۋقان باستالدى. بۇل شارا الماتىداعى رەسپۋبليكالىق جيتس ورتالىعىنان باستاۋ الدى.
جيتس-تەن قايتىس بولعانداردى ەسكە الۋدا ايتۆ ىندەتىنە تاپ بولعان ادامدارعا نيەتتەستىگىن ءبىلدىرۋ ءۇشىن مەملەكەتتىك, حالىقارالىق, ءدىني جانە ۇكىمەتتىك ەمەس قوعامدىق ۇيىمداردىڭ وكىلدەرى, مەديتسينا قىزمەتكەرلەرى, ستۋدەنتتەر, مەديالىق تۇلعالار جينالدى. اتالمىش اكتسياعا جيتس-ءتىڭ الدىن الۋ جانە وعان قارسى كۇرەس جونىندەگى رەسپۋبليكالىق ورتالىعى, الماتى قالاسىنىڭ دەنساۋلىق ساقتاۋ باسقارماسى, «ايتۆ-مەن ءومىر سۇرەتىن ادامداردىڭ قازاقستاندىق وداعى» زاڭدى تۇلعالار بىرلەستىگى, يۋنەيدس, الماتى قالاسىنىڭ جيتس ورتالىعى, س.د.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى, PSI ۇيىتقى بولدى.
– بۇل ناۋقاننىڭ ماقساتى – ىندەت جالماعان ادامداردى ەسكە الۋمەن قاتار, حالىقتى ايتۆ-مەن ءومىر سۇرەتىن ادامدارعا ء(اوا) تۇسىنىستىكپەن قاراۋعا شاقىرۋ. اتالعان ساناتتاعى ادامداردىڭ دەنساۋلىعىن ساقتاۋ ءۇشىن بۇگىنگى تاڭدا مەملەكەت ولارعا تەگىن تۇردە انتيرەتروۆيرۋستىق تەراپيا ۇسىنۋدا. ەمدەۋ كەستەلەرى ۇنەمى جاقسارتىلىپ وتىرادى, جاڭا انتيرەتروۆيرۋستىق پرەپاراتتار ساتىپ الىنۋدا. جىلدان-جىلعا جيتس-تەن بولاتىن ءولىم-ءجىتىم ايتارلىقتاي تومەندەپ كەلەدى, – دەيدى جيتس-ءتىڭ الدىن الۋ جانە وعان قارسى كۇرەس جونىندەگى رەسپۋبليكالىق ورتالىقتىڭ باس ديرەكتورى باۋىرجان بايسەركين.
قازاقستاندا ايتۆ ىندەتىنىڭ باستالعان ساتىنەن باستاپ جيتس-تەن 9 مىڭنان استام ادام قايتىس بولعان. دەگەنمەن ىندەتتىڭ العاشقى جىلدارىندا ايتۆ-مەن ءومىر ءسۇرىپ جۇرگەن ادامداردا دارىلەردى تاڭداۋ مۇمكىندىگى بولماعاندىقتان, ءبىر جىلدا 280 ادام قايتىس بولعان. ال قازىر تۇبەگەيلى شارالاردى قابىلداۋ ناتيجەسىندە بۇل قارقىن ايتارلىقتاي تومەندەدى. ايتۆ جۇقتىرعان بالالار تەك تۇپنۇسقالىق پرەپاراتتاردى قابىلدايدى. ايتۆ-ءنىڭ انادان بالاعا بەرىلۋىن توقتاتۋ ءۇشىن بارلىق جۇكتى ايەلدەر ايتۆ-گە ەكى رەت تەكسەرىلە الادى. ال تەستىلەۋ جاساۋ ەلدە تەگىن, ەرىكتى, قالاۋى بويىنشا قۇپيا تۇردە جۇرگىزىلەدى. جىل سايىن ايتۆ-ينفەكتسياسىنا تەستىلەۋدەن ءوتىپ جۇرگەن قازاقستاندىقتاردىڭ سانى ارتۋدا. جاعداي باقىلاۋ ساتىسىندا تۇر.
اكتسيا كەزىندە قاجەت دەپ تاپقاندار ايتۆ-ينفەكتسياسىنا جەدەل-تەستىلەۋدەن وتۋگە مۇمكىندىك الدى. ۆيكتورينالىق ساۋالدارعا قاتىسىپ, ءوز دەرتىن جاريا ەتكەن سۇراقتار قويدى.
مۇنداي دەرتتىڭ بار ەكەنىن قاشاندا قاپەردە ۇستاۋ ءۇشىن ءارى قاراي ناۋقان ەلىمىزدىڭ بارلىق ايماعىندا وتكىزىلەتىن بولادى.
ايناش ەسالي,
«ەگەمەن قازاقستان»
الماتى
