ءبىر بەلگىلىسى, «بايكەنوۆ» كاسىپكەرلىگى بۇل جەر تەلىمىن زاتاەۆيچ كوشەسى, 33-ءۇي مەكەنجايىندا ورنالاسقان كوپپاتەرلى ءۇيدىڭ الدى دەپ ساتىپ العان. ءسويتىپ م.اۋەزوۆ داڭعىلى مەن پوبەدا كوشەسىنىڭ قيىلىسىن وزىنشە «رەتكە» كەلتىرە باستايدى. تۇرعىنداردىڭ ايتۋى بويىنشا, جەكە كاسىپكەر اۋكتسيون ارقىلى بۇل جەردى الدىم دەپ, وسىنداعى بالالار الاڭىن بۇزىپ, ءبىراز اعاشتى كەسىپ تاستاعان. حالىق داۋلاپ وتىرعان كوپپاتەرلى ءۇيدىڭ سىرت جاعى زاتاەۆيچ, 33-ءۇيدىڭ جانىندا ورنالاسسا, ءبىر بۇرىشى م.اۋەزوۆ داڭعىلى مەن پوبەدا كوشەلەرىنىڭ قيىلىسىنا كەلىپ تىرەلەدى ەكەن. تۇرعىنداردىڭ باسىم كوپشىلىگىنىڭ ايتۋلارىنشا, بۇل داۋ وسىدان تۋىنداپ وتىر.
جۋىردا قالا اكىمى ەرماك ءسالىموۆ وسى داۋعا قاتىستى جەرگىلىكتى تۇرعىندارمەن كەزدەسۋگە كەلدى. ونىڭ ايتۋىنشا, بۇل شەشىم وزىنە دەيىنگى اكىمدەردىڭ كەزىندە قابىلدانعان. قازىر اكىمدىك حالىقتىڭ جاعدايىنا, تالاپ-تىلەگىنە قاراي ارەكەت ەتۋگە دايىن, بىراق داۋلى ماسەلە زاڭ بويىنشا تەك سوت ارقىلى عانا شەشىلەدى.
– سەمەيگە باسقا اكىم باسشى بولعان كەزدە م.اۋەزوۆ داڭعىلى مەن پوبەدا كوشەسىنىڭ اراسىنداعى جەردى الۋعا كاسىپكەرگە تىيىم سالۋ كەرەك ەدى. وكىنىشكە قاراي, ولاي جاسالماعان, – دەيدى قالا باسشىسى. – وسىلايشا ماعان ۇنەمى وتكەن جىلدىڭ وسى تاقىلەتتەس داۋلى دۇنيەلەرىن شەشۋمەن اينالىسۋعا تۋرا كەلىپ تۇر. جىلىن قاراساڭىزدارشى, العاشقى اۋكتسيون 2014 جىلى وتكەن. مەن ول كەزدە اكىم بولعان جوقپىن. بىراق ءدال قازىرگى ۋاقىتتا حالىقتىڭ مۇڭ-مۇقتاجىن قاراستىرماي قويا المايمىن. سىزدەرگە كومەكتەسۋگە ءازىرمىن.
قالا اكىمى داۋلى جەردى مەملەكەت قازىناسىنا سوت ارقىلى قايتارعان ءجون دەپ سانايدى. بىراق «بايكەنوۆ» جك باسشىسى انار بايكەنوۆا «اتامەكەن» ۇلتتىق كاسىپكەرلەر پالاتاسى مەن وبلىس باسشىلىعىنا شىعىپ, جەر تەلىمىن قايتارۋدان ءۇزىلدى-كەسىلدى باس تارتىپتى.
– مەنىڭ ءسوزىمدى نەگە ەشكىم ەستىگىسى كەلمەي تۇر؟ – دەيدى انار امانگەلدىقىزى. – ءيا, «بايكەنوۆ» كاسىپكەرلىك نىسانى بۇل جەردى الدى. ەندى اباتتاندىرامىن دەسەم دە, ەشكىمنىڭ تىڭداعىسى جوق. سول سەبەپتەن ۇلتتىق كاسىپكەرلەر پالاتاسىنا شىعۋىما تۋرا كەلدى. العان جەرىمدى قورشاپ قويعانىم سول-اق ەدى, قارسىلاسقان توپقا تاپ بولدىم. قولىمداعى قۇجاتتارىم بارلىق تالاپقا ساي. اعاشتاردى كەسىپ تاستادى دەيدى, بىراق بۇل جەرگە وسىعان دەيىن ەشكىم نازار اۋدارماي, قوقىس بولىپ جاتىر ەدى. مەنىڭ تۇرعىن ءۇيدىڭ الدىنا ءزاۋلىم نىسان سالمايتىنىم تۇسىنىكتى عوي. بىرەۋلەر تۇرعىنداردى ادەيى شاتاستىرىپ وتىر.
قالا اكىمى ەرماك سالىموۆپەن كەزدەسكەن تۇرعىنداردىڭ انار بايكەنوۆاعا قارسى ءۋاجى بار. ولاردىڭ ايتۋلارىنشا, بۇل جەردە ءوسىپ تۇرعان اعاشتاردى كەسىپ تاستاپ, ورنىن كوگالداندىرامىن دەۋدىڭ قاجەتى جوق. وسى ۇيدە 38 جىلدان بەرى تۇراتىن يرينا بەزرودنايا بۇل تۇستا شاعىن باق بولعانىن, وعان ءوزى كوشەت ەككەنىن ايتادى. ساتىپ الۋشى اعاشتاردى قالاي كەسكەنىن كوزىمەن كورىپ, جىلاپ تۇرىپ بەينەجازباعا ءتۇسىرىپ الىپتى.
– مەن زاتاەۆيچ كوشەسى, 35-ءۇيدىڭ تۇرعىنىمىن, – دەدى ءسابيىن كوتەرىپ كەلگەن جاس انا اينۇر جامبولاتوۆا. – بۇل جەرگە قالاي عيمارات سالماقشى؟ بۇرىنعى اكىمدەر بۇعان قالاي رۇقسات ەتكەن؟ جاز بويى قۇرىلىس جۇمىستارىن جۇرگىزسە, ماڭايدىڭ بارىنە شاڭ كوتەرىلىپ, توڭىرەك استاڭ-كەستەڭ بولماق. ول ءوز الدىنا, ەگەر قانداي دا ءبىر عيمارات سالسا, مىنا ماڭايدا ءارلى-بەرلى ءجۇرۋدىڭ ءوزى قيىنداپ قالادى. كورىپ تۇرسىزدار, اياداي عانا جەر. ەرتەڭ توتەنشە جاعداي بولا قالسا, ءورت سوندىرۋشىلەر مەن قۇتقارۋشىلاردىڭ كولىكتەرى قالاي وتەدى؟! سونى نەگە ويلامايدى؟! اينالانىڭ ءبارى قاپتاعان دۇكەن, ءتۇرلى كاسىپكەرلىك نىساندار. دەمالاتىن جەر قالمادى, اعاشتاردى كەسىپ تاستادى.
ءتيىستى زاڭ تالاپتارى بويىنشا, قالا ىشىندەگى جەر تەلىمدەرى جالپى ورتاق قولدانىستان الىنعان جاعدايدا عانا جەكە مەنشىككە بەرىلۋى مۇمكىن. ءبىز ايتىپ وتىرعان ماسەلەدە بۇل جايت ەسكەرىلمەگەن سىڭايلى. اۋكتسيونعا تۇسكەن جەردىڭ مەكەنجايى: زاتاەۆيچ, 35 «ا» دەپ كورسەتىلگەن. بىراق جەر م.اۋەزوۆ داڭعىلى مەن پوبەدا كوشەسىنىڭ قيىلىسىندا تۇر. ءبىر قىزىعى, بۇل جەر تەلىمىنىڭ ساتىلاتىندىعى تۋرالى قالانىڭ قوعامدىق كەڭەسى دە, قالا قۇرىلىسى ءبولىمى دە حابارسىز بولعان.
قالا اكىمدىگى جاعداي تولىق شەشىمىن تاپقانعا دەيىن كاسىپكەر انار بايكەنوۆاعا قۇرىلىسىن جۇرگىزۋگە تىيىم سالعان. تۇرعىنداردىڭ نارازىلىعىنا بايلانىستى جۇمىس توقتاپ قالعان كەزدە قۇرىلىس الاڭى قورشالعان كۇيى قالا بەرىپتى. تۇرعىنداردىڭ وتىنىشىنە قۇلاق تۇرسەك, بۇل جەردە بۇرىن بولعان شاعىن ساياباقتىڭ قالپىنا كەلتىرىلگەنىن قالايدى. قالا اكىمى ەرماك ءسالىموۆ بولسا ءتيىستى سوت شەشىمى شىققان سوڭ بۇل جەرگە جاڭادان اعاشتار وتىرعىزىلىپ, بالالار وينايتىن الاڭ اشىلادى دەپ وتىر.
راۋشان نۇعمانبەك,
جۋرناليست
سەمەي
