مۇنى ايتاسىز, كيەلى ساحناعا اشىق-شاشىق شىعاتىن كەيبىر انشىلەرىمىزدى كورگەندە كىرەرگە جەر تاپپاي قينالامىز. «31 كانال» اتالاتىن تەلەارنا ارتىستەردىڭ جاتقان-تۇرعانىنان باستاپ, نە ءىشىپ, نە جەيتىنىنە دەيىن تاپتىشتەپ, تەرمەلەپ كورسەتۋدەن جالىقپاي كەلەدى. بۇدان باسقا دا ارنالار قالىسپايدى. كەيدە ويلايمىن: ونەر يەلەرى وزدەرىن جان-جاقتى ناسيحاتتاۋ ءۇشىن ولارعا اقى تولەيدى مە ەكەن دەپ. ايتپەسە, انشىلەردىڭ وتباسى, وشاق قاسىنداعى ءومىرى كىمگە ءدارى بولىپتى؟ قانداي باسپانا العانى نەمەسە سالعانى, قانداي كولىكپەن جۇرەتىنى, قانداي كيىم كيەتىنى, ىسساپارلارعا قانداي كولىكتەرمەن باراتىنى, قانداي قوناقۇيلەرگە تۇسەتىنى, نە ىشەتىنى, كىمدەرمەن بايلانىس جاسايتىنى, قوناققا كىمدەردى شاقىراتىنى, بالاسىنىڭ بەسىك تويىن قالاي وتكىزگەنى, بالاسىنا كىمنىڭ ات قويىپ بەرگەنى, بالاسىن سۇندەتكە وتىرعىزعانى, پەرزەنتحاناداعى كەلىنشەگى مەن بالاسىن قانداي سالتاناتپەن الىپ شىققانى, ىڭعايسىزداۋ بولسا دا ايتايىق, ەستىگەندە بەت تۇگىلى بەزەۋ ۇيالادى. قۇدايىم-اي, تۇگىن قالدىرماي كورسەتكەندە, «مىناداي سىي-قۇرمەتتى پاتشالار مەن حاندار, امىرشىلەر, كورولدەر, پرەزيدەنتتەر, كانتسلەرلەر دە باستارىنان وتكەرمەگەن شىعار» دەپ ەرىكسىز ويلاناسىز. ولاردى الاقانعا سالىپ, باستارىنان قۇس ۇشىرماي ماپەلەگەنىمىز سونشالىق, تورەعالي ءتورالى دەگەنى تىزگىننەن شىعىپ كەتكەنى بىلاي تۇرسىن, ءوزىنىڭ كونتسەرتىنە كەلگەن داپ-دارداي ادامعا اۋىزىنا كەلگەنىن ايتىپ, شاتىپ-پۇتتى. ارادا شامالى ۋاقىت وتپەي-اق بۇل باتىر اتاسىنداي كىسىدەن كەشىرىم سۇراعان بولىپ, كيەلى ساحنانىڭ تورىنە قايتا شىقتى. بۇگىندە جەر-جەردى ارالاپ, كونتسەرتتەرىن بەرىپ ءجۇر. وعان ەشكىم ەشتەڭە دەمەيدى. وعان نە ىستەسە دە ءبارى جاراساتىن سياقتى.
وسىندايدا كەشەگى ءبىرجان سال, اقان سەرى, ەستاي, ءمادي, امىرە, بالۋان شولاق, كەنەن,تاعى باسقالارى ەرىكسىز ەسكە تۇسەدى. ودان بەرىدە كۇلاش, روزا, عاريفوللا, راشيت, ءمۇسىلىم, جانىبەك, قازىر ورتامىزدا جۇرگەن قايرات بايبوسىنوۆ, الىبەك دىنىشەۆ, روزا رىمباەۆا, ماقپال ءجۇنىسوۆا, ايگۇل قوسانوۆا, تاعى باسقالارى ءان الەمىندە بۇلبۇلداي سايراپ, قىرانداي قالىقتاعانىمەن, كەيبىر اي باتپاي جاتىپ جارقىرايتىن «جۇلدىزدارداي» وعاش قىلىق تانىتقاندارىن ەستىمەپپىز.
ايتپاعىمىز بۇل ەمەس ەدى. جالپى, قازاقتىڭ كيەلى ساحناسىن ۇياتسىزداردان قالاي قورعاۋعا بولادى؟ تەلەارنالارداعى ماسقارالىققا قاشان تىيىم جاسالادى؟ بۇگىندە قازاق قوعامى الدىنداعى كۇرمەۋى قيىن سۇراقتاردىڭ ءبىرى وسى سياقتى. سالالىق مينيسترلىكتەر باسشىلارىنىڭ بۇل ورايدا نە ويلاعاندارى بار؟
ۇلى دالانىڭ زاڭدارى بويىنشا ۇلاعاتتى ۇلاندارعا, قىلىقتى قىزدارعا سالىنعان تىيىمدار مەن توقتامدار بار. سونىڭ ىشىندە «قىزعا قىرىق ۇيدەن تىيىم, قالا بەرسە قارا كۇڭنەن تىيىم» دەگەن ءتامسىلدىڭ ءمانى تەرەڭدە. ال ەندى ء«بىز قىزداۋرەننەن وتكەنبىز, نە ىستەسەك تە جاراسا بەرەدى» دەپ ويلايتىندار مىقتاپ قاتەلەسەدى. «ايەل بۇزىلسا, الەم بۇزىلادى» دەگەندى دانالار تەككە ايتپاعان. ەسەر ەركەكتەرگە دە ەسكەرتۋ جاسايتىن كەز جەتتى. ءتۇبى مۇنىڭ سوڭى جاقسىلىققا اكەلىپ سوقتىرماسى انىق.
ساحنا – كيەلى ورىن. ال كيەلى اتاۋلىمەن ويناۋعا بولمايتىنىن ەسى دۇرىس ادام جاقسى بىلەدى. جۇرت الدىنا جارتىلاي جالاڭاش شىعىپ, ءوزىڭنىڭ قادىرىڭدى كەتىرىپ قانا قويماي, ساحنانىڭ قۇتىن قاشىراسىڭ. ونەر ادامدارى قانشا دەگەنمەن ەلدىڭ كوز الدىندا جۇرەدى. جاستار, كيەلى ونەردى سۇيەتىندەر سولارعا ەلىكتەپ وسەدى. ونەر ادامدارىنىڭ بارلىعى جۋرنالدىڭ ءبىرىنشى بەتىنە جالاڭاش سۋرەتى شىققانىن ماقتانىش كورەتىن رەسەيدەگى «تنت» تەلەارناسىنىڭ جۇرگىزۋشىسى انفيسا چەحوۆا ەمەس. قازاقتىڭ مەنتاليتەتى بولەك ءداستۇرى باسقا. ەندەشە تىم ەركىنسىپ, ويىما كەلگەنىن ىستەيتىن ونەر يەلەرىنە ءبىر توقتاۋ بولۋى ءتيىس!
قازاق – ەڭ الدىمەن ار مەن نامىستى ءبىرىنشى كەزەككە قويعان حالىق. ەندەشە, ءوز ارىمىزدى ءوزىمىز اياققا تاپتامايىق. ار مەن نامىس ولگەن كۇنى قازاق ولەدى. ولاي بولسا, ونەر ادامدارىنىڭ اشىق-شاشىق قالاي بولسا سولاي كيىنىپ جۇرۋىنە تىيىم سالاتىن ءبىر زاڭ كەرەك-اق!
سابىربەك ولجاباي,
قازاقستان جازۋشىلار جانە جۋرناليستەر وداقتارىنىڭ مۇشەسى
شىمكەنت
