500 شاقىرىمدى ارتقا تاستاپ جەتكەن بالالار ەڭ اۋەلى ەكسكۋرسيانى ەسىل وزەنىنىڭ جاعاسىنان باستادى. بۇدان سوڭ شولۋ شەڭبەرى مەن وكەاناريۋم, ەكزوتاريۋم, استانا پاركىن ارالاپ, قالا ورتالىعىنداعى مەملەكەتتىك سيمۆولدار الاڭىن ارالادى.
اتالعان ەكسكۋرسيانىڭ باسى-قاسىندا جۇرگەن, استانا قالاسى بويىنشا تاجىريبەلى گيد ەركىن تۇرعاناليەۆ جوبانىڭ ماقساتى مەن ماڭىزىن ەگجەي-تەگجەي ءتۇسىندىرىپ بەردى. «استانا قالاسى اكىمدىگىنىڭ ۇيىمداستىرۋىمەن «استانا كونۆەنشن بيۋرو» جشس مەن SkyWay ۇيىمداستىرعان بۇل باعدارلاماعا ەلىمىزدىڭ 15 وبلىسىنان از قامتىلعان, مۇمكىندىگى شەكتەۋلى ءبىر توپ بالالار كەلەدى. وسىعان دەيىن الماتى مەن اقمولا وبلىسىنان 100-گە جۋىق بالا قاتىسقان بولاتىن. بۇگىنگى ەكسكۋرسياعا ەكىباستۇز, اقسۋ جانە پاۆلوداردان 34 بالا كەلدى», دەيدى ەركىن تۇرعاناليەۆ.
باعدارلامانىڭ ەكىنشى كۇنىندە قالاعا قىدىرىپ كەلگەن بالالار «بايتەرەك» مونۋمەنتى, «حان شاتىر» ساۋدا-ءۇيى, ۇلتتىق مۋزەي, «قازاق ەلى» مونۋمەنتى سىندى كومپوزيتسيالىق قۇرىلىسىمەن دارالاناتىن قالانىڭ ەڭ كورىكتى جەرلەرىمەن تانىسا الادى.
اتالعان تۋردىڭ ۇيىمداستىرۋشىسى, «استانا كونۆەنشن بيۋرو» جشس قىزمەتكەرى ولگا كادنيكوۆا: ء«بىز قالامىزدىڭ پانورامالىق كورىنىسىن كورسەتۋ ماقساتىندا بالالاردى ەكى قاباتتى ەكسكۋرسيالىق اۆتوبۋسپەن تاسىمالداۋدى ءجون دەپ سانادىق. بالالارعا جاقسى اسەر قالدىرۋ ءۇشىن استانامىزدىڭ ەڭ كورىكتى, اسەم جەرلەرىن, عيماراتتارىن كورسەتۋگە تىرىستىق», دەپ جوبا جايلى قىسقاشا تۇسىنىك بەردى.
4 ماۋسىمدا باستالعان «استانا – مەنىڭ وتانىمنىڭ ەلورداسى» الەۋمەتتىك جوباسى تامىز ايىنا دەيىن جالعاسادى. ەلىمىزدىڭ 15 وبلىسىنان كەلگەن بالالار ەلوردانىڭ تاريحي جانە مادەني ورىندارىن تاماشالادى, سونىمەن قاتار ولارعا كاسىبي گيدتەردىڭ قاتىسۋىمەن ەرەكشە ەكسكۋرسيا جانە مادەني-كوڭىل كوتەرۋ باعدارلاماسى ۇيىمداستىرىلدى.
باعدات ءاشىم,
ل.ن.گۋميلەۆ اتىنداعى ەۇۋ-دىڭ 1-كۋرس ستۋدەنتى
