حالىقتى سۋمەن جابدىقتاۋ قىزمەتتەرىنىڭ ساپاسىن جوعارىلاتۋ مەن سۋ شارۋاشىلىعى كاسىپورنى شىعىنىن قىسقارتۋ ماقساتىندا سۋ بولەتىن مۇنارالاردىڭ سانىن ازايتۋ جانە ولاردى جويۋ جونىندەگى باعدارلاما بەكىتىلدى.
بۇگىنگى تاڭدا قالادا جۇمىس ىستەيتىن 210 سۋ بولەتىن مۇنارانىڭ 110-ىن 2020 جىلعا دەيىن ورتالىقتاندىرىلعان سۋمەن جابدىقتاۋ قىزمەتىنە قوسۋ جوسپارلانۋدا.
سۋمەن جابدىقتاۋ جەلىلەرىنىڭ ۇزىندىعى 1266 شاقىرىمدى, سۋ تارتۋ جەلىلەرىنىڭ ۇزىندىعى 735 شاقىرىمدى قۇرايدى. سۋمەن جابدىقتاۋ جەلىلەرىنىڭ توزۋ دەڭگەيى ورتا ەسەپپەن 44 %-عا, سۋ تارتۋ جەلىلەرىنىڭ توزۋ دەڭگەيى ورتا ەسەپپەن40 %-عا تەڭ.
بيىل استانادا قالاداعى جەلىلەردىڭ 48,1 شاقىرىمىن جوندەۋگە مۇمكىندىك بەرەتىن 10 جوبا ىسكە اسىرىلىپ, جەلىلەردىڭ 10 شاقىرىمى جاڭادان سالىنادى دەپ جوسپارلانۋدا.
بۇدان بولەك, قالا شەتتەرىن دامىتۋ تۇجىرىمداماسىنىڭ اياسىندا اكىمدىك استانانىڭ 20 تۇرعىن ءۇي الابىندا جولدار مەن ينجەنەرلىك جەلىلەردىڭ قۇرىلىسىن جۇرگىزىپ جاتىر. بۇل الاڭ 232, 38 شاقىرىمدىق جولدى, 522 شاقىرىمدىق ينجەنەرلىك جەلىلەردى قامتيدى.
2011 جىلدان بۇگىنگە دەيىن جولداردىڭ 125, 8 شاقىرىمى مەن ينجەنەرلىك جەلىلەردىڭ 295,7 شاقىرىمى سالىندى.
2018 جىلى كوكتال-2, كومسومول, وڭتۇستىك-شىعىس, يلينكا جانە باسقا تۇرعىن ءۇي الاپتارىندا ۇزىندىعى 3,2 شاقىرىمدى قۇرايتىن 8 كوشەنىڭ, 21,2 شاقىرىمدىق ينجەنەرلىك جەلىلەردىڭ قۇرىلىسى مەن جوندەۋ جۇمىستارى جۇرگىزىلەدى دەپ جوسپارلانعان. اتالمىش باعىتتاعى جۇمىستار 2022 جىلعا دەيىنگى استانا قالاسىن ىقشامدى ەتىپ قۇرۋ جونىندەگى كەشەندى جوسپارىنا سايكەس جۇرگىزىلەدى.
قولدانىستاعى اعىن سۋدى تازارتاتىن كاناليزاتسيالىق تازارتقىش عيماراتتاردىڭ قۋاتتىلىعى تاۋلىگىنە 254 مىڭ تەكشە مەتردى قۇرايدى. قۋاتتىلىقتىڭ مۇنداي دەڭگەيى قاۋىرت شاقتا جەتكىلىكسىز.
اتالمىش ماسەلەنى شەشۋ ءۇشىن قالا اكىمدىگىازيا دامۋ بانكىمەن بىرلەسىپ, ءمجا مەحانيزمى ارقىلى كتع-2 قۇرىلىسىن جۇرگىزبەك.
تۇجىرىمدامانىڭ اياقتالۋ مەرزىمى – وسى جىلدىڭ ماۋسىمى.
سونداي-اق, اكىمدىك ماقۇلدانعان تەحنيكالىق كومەكتىڭ اياسىندا ادب-مەن بىرلەسىپ, «استانا قالاسىنىڭ سۋ رەسۋرستارىن بىرىكتىرىپ باسقارۋدىڭ شەبەرلىك جوسپارى» جوباسىن ازىرلەۋ جۇمىستارى جۇرگىزىلۋدە.
جوبا ەسىل, اقبۇلاق, سارىبۇلاق وزەندەرىنىڭ, مايبالىق, ۇلكەن جانە كىشى تالدىكول كولدەرىنىڭ, استانا سۋ قويماسىنىڭ, كونتررەتتەۋشىنىڭ, نۇرا-ەسىل ارناسىنىڭ سۋ نىساندارى مەن گيدروتەحنيكالىق عيماراتتارىنداعى سۋ مەن جەر استى سۋىن رەتتەۋ مەن پايدالانۋ شارالارى كەشەنىن ىسكە اسىرۋدى قاراستىرادى.
شەبەرلىك جوسپارى 2019 جىلدىڭ ساۋىرىندە ازىرلەنبەك.
