حالىق باتىرلارى ەسكەرتكىشى قىتايدىڭ ۇلتتىق مونۋمەنتى سانالادى. ەسكەرتكىش ءحىح-حح عاسىرلاردا ءومىرىن قىتاي حالقىنىڭ رەۆوليۋتسيالىق كۇرەسىنە ارناعان باتىرلاردى ماڭگى ەستە ساقتاۋ ماقساتىندا 1949 جىلى 30 قاراشادا قىتاي حالىقتىق ساياسي-كونسۋلتاتيۆتىك كەڭەسىنىڭ ءبىرىنشى جالپى وتىرىسىندا قابىلدانعان قارار نەگىزىندە سالىنعان. جوبا اۆتورى - ليان سىچەن. دەگەنمەن ەسكەرتكىشتىڭ كەيبىر ەلەمەنتتەرىن ونىڭ جۇبايى لين حۋەين قوسقان.
قۇرىلىس جۇمىستارى 1952 جىلدىڭ تامىزىنان 1958 جىلدىڭ مامىرىنا دەيىن جۇرگىزىلگەن. مونۋمەنتتىڭ بيىكتىگى كەيبىر باعالاۋلارعا قاراعاندا شامامەن 37,94 مەتردى قۇرايدى. ال اۋماعى 3 مىڭ شارشى مەتردى الىپ جاتىر. 17 مىڭ ءمارمار جانە گرانيت بلوكتاردان تۇرعىزىلعان ەسكەرتكىشتىڭ سالماعى 10 مىڭ توننا.
