ءبىر قىزىعى, بالامەن جۇمىس ىستەيتىن ۇلكەندەردىڭ, مىسالى, تاربيەشى-مۇعالىمدەردىڭ دە بويلارىندا كىشكەنتايلارعا ءتان قاسيەتتەر اڭعارىلىپ قالادى. بالا دارىگەرى دە سولاي. الدىنا اۋىرىپ كەلگەن بالانى قۇشاقتاپ, ەركەلەتىپ, ايالاپ وتىرىپ قارايتىن اق حالاتتى ابزال جاننىڭ جۇزىنەن دە جىلىلىق ەسىپ تۇرادى. اتىراۋ وبلىسىنىڭ جىلىوي اۋدانىنداعى ورتالىق اۋداندىق اۋرۋحانانىڭ بالا دارىگەرى گۇلزيپا قاليەۆانى ەل وسىنداي جاقسى مىنەزى ءۇشىن قۇرمەتتەيدى.
ورتا مەكتەپتى ويداعىداي اياقتاعان بالاۋسا قىزدىڭ جالعىز ارمانى بار ەدى. ول دارىگەر بولسام دەيتىن. ون ءبىر بالالى وتباسىنان شىققان گۇلزيپا الديارقىزى باۋىرمال, مەيىرىمدى بولىپ ءوستى. م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە ءبىلىم الىپ, پەدياتر ماماندىعىن تاڭدادى. بيىل مىنە, وتىز ءۇشىنشى جىل, ماماندىعىنا ادالدىقپەن قىزمەت ەتىپ كەلەدى. مۇعالىمدەر مەن دارىگەرلەر جاپپاي بازار جاعالاپ كەتكەن توقسانىنشى جىلدارداعى توقىراۋدا دا ول سۇيىكتى ىسىنەن قول ۇزگەن جوق.
دۇنيەدە باۋىر ەتىڭ – بالاڭنىڭ اۋىرعانىنان اۋىر نە بار؟ وسى جىلدار ىشىندە گۇلزيپا الديارقىزى سان ءتۇرلى تاعدىرمەن كەزىكتى. ءسابيىن اجالدان اراشالاي الماي زار جىلاپ قالعان انانى كوردى, ءتۋابىتتى دەرتكە شالدىققان بالانى كوردى, سولارمەن بىرگە قامىقتى, قايعىردى. بىراق ءبىر ءسابي دۇنيەگە كەلسە, ءبىر نارەستەنىڭ اۋرۋىنان ايىققانىن كورسە, ريزا بولعان اتا-انانىڭ العىسىن ەستىسە, قيىندىقتىڭ ءبارىن ۇمىتىپ, سولارمەن بىرگە قۋاندى. ءوزى قارايتىن ۋچاسكەدەگى بارلىق بالانى ول جاتقا بىلەدى. دەنساۋلىقتارىندا دىمكاستىك بار بالالار ءۇشىن الاڭداپ وتىرادى. جازىپ بەرگەن ءدارىسىن ۋاقىتىندا قابىلداپ جۇرگەن-جۇرمەگەنىن دە تەكسەرۋ كۇندەلىكتى ادەتىنە اينالىپ كەتكەن.
«مەن 25 جىل بويى گۇلزيپا الديارقىزىمەن بىرگە ءبىر كابينەتتە جۇمىس ىستەدىم», – دەيدى مەدبيكە ماسكۋرا ەلەمەسوۆا. – وسىنداي جايلى, جۇرەگى جىلى اداممەن قىزمەتتەس ەكەنىمدى ماقتانىشپەن ايتىپ جۇرەمىن. ناعىز بالا دارىگەرى وسىنداي بولۋى كەرەك شىعار, ول قولىنا العان ءسابي جىلاعانىن قويادى. بالانى ەركەلەتىپ, الديلەپ, ويناتىپ وتىرىپ دەنساۋلىعىن تەكسەرەدى».
«بالا دارىگەرى بولۋدىڭ باقىتى بولەك», – دەيدى گۇلزيپا قاليەۆا. – 31 جىل پەدياتر بولدىم, قازىر مەديتسيناعا ەنگىزىلگەن وزگەرىستەر بويىنشا وتباسىلىق دارىگەرمىن. پەدياتريا فاكۋلتەتتەرى جابىلدى دەگەندى ەستىگەندە كوڭىل-كۇيىم ءتۇستى. بولاشاعىن ويلاعان ەل بالاعا جاعداي جاسايدى, وسى رەتتە انا مەن بالا دەنساۋلىعىن قورعاۋعا باعىتتالعان مەملەكەتتىك باعدارلامالاردان ەل ۇلكەن ءۇمىت كۇتەدى, مەن دە كۇتەمىن».
تاجىريبەلى, جاستارعا ۇيرەتەر تاعىلىمى مول دارىگەردىڭ العان ماقتاۋ قاعازدارى دا, العىس حاتتارى دا كوپ. بىراق ول الدىنا اۋىرىپ كەلگەن جاننىڭ, مەيلى جاس بولسىن, مەيلى كارى بولسىن, قۇلان تازا ايىعىپ كەتكەنىن كورگەننەن ارتىق قۋانىش بار دەپ ويلامايدى. جۇمىسىندا سەنىمدى سەرىكتەس, بىلىكتى دارىگەر بولسا, ۇيىندە ەكى بالانىڭ اناسى, اسىل جار, ونەگەلى كەلىن.
قاراپايىم ادامي باقىت دەگەن دە وسى بولسا كەرەك.
باقىتگۇل باباش,
«ەگەمەن قازاقستان»
اتىراۋ وبلىسى,
جىلىوي اۋدانى
