ەلباسى قازاقستاننىڭ جوعارى وقۋ ورىندارى الدىنا الەمدەگى ەڭ ۇزدىك 200 جوو قاتارىنا كىرۋ مىندەتىن قويعانى ءمالىم. قازۇۋ الەمدىك كەڭىستىكتە مويىندالعان ەلىمىزدىڭ جەتەكشى ۋنيۆەرسيتەتى رەتىندە وسى ماڭىزدى مەملەكەتتىك تاپسىرمانى ىسكە اسىرۋدا ماقساتتى جۇمىس اتقارىپ كەلەدى. سوڭعى بەس جىلدا ۋنيۆەرسيتەت «QS WUR» رەيتينگىندە 400-دەن استام پوزيتسياعا كوتەرىلگەن. الەمدىك تاجىريبەدە بىردە-ءبىر ۋنيۆەرسيتەت وسىنداي ءوسۋ ديناميكاسىنا قول جەتكىزبەگەن كورىنەدى.
QS الەمدەگى بارشا مەملەكەتتەرمەن تانىلعان بەدەلدى جانە كوپتەگەن جىلدار بويى الەمدەگى ۇزدىك جوعارى وقۋ ورىندارىنىڭ جاھاندىق رەيتينگىن جۇرگىزىپ كەلە جاتقان ىقپالدى حالىقارالىق اگەنتتىكتەردىڭ ءبىرى.
قازۇۋ-ءدىڭ وسى رەيتينگتە تابىستى ىلگەرىلەۋىنىڭ ماڭىزدى فاكتورى كەڭ اۋقىمدى قۇرىلىمدىق جاڭعىرتۋ, ناتيجەگە باعىتتالعان باسقارۋدىڭ جوعارى تيىمدىلىگى, سونداي-اق سوڭعى بەس جىل ىشىندە 40 پايىزعا وسكەن بىرەگەي ينفراقۇرىلىمنىڭ قارقىندى دامۋى دەپ ايتۋعا بولادى. الەمدىك دەڭگەيدەگى زەرتتەۋ ۋنيۆەرسيتەتىنە اينالۋ باعىتىن ساقتاي وتىرىپ, قازۇۋ مەديتسينا-بيولوگيالىق جانە يننوۆاتسيالىق ءىت كلاستەرىن قالىپتاستىرۋ بويىنشا جۇمىس جاساۋدا. ونىڭ نەگىزىن جاڭا سۋپەركومپيۋتەر قۇرايتىن بولادى.
ۋنيۆەرسيتەتتىڭ الەمدىك دەڭگەيدە تانىلۋى تۇراقتى دامۋ بويىنشا بۇۇ-نىڭ «اكادەميالىق ىقپال» باعدارلاماسىنىڭ عالامدىق حابى رەتىندە بەلسەندى قىزمەتىمەن جانە ونىڭ حالىقارالىق جوبالارىمەن دە بايلانىستى. ولاردىڭ ىشىندە قازۇۋ ۇسىنعان يننوۆاتسيالىق-تەحنولوگيالىق جانە رۋحاني-ادامگەرشىلىك پلاتفورمالاردىڭ سيمبيوزىنا نەگىزدەلگەن «ۋنيۆەرسيتەت 4.0» جاڭا بۋىن ۋنيۆەرسيتەتىنىڭ مودەلى بار.
بۇگىندە اتالعان وقۋ ورنىنىڭ تاڭعالارلىق تاجىريبەسىن الەمنىڭ جەتەكشى ۋنيۆەرسيتەتتەرى زەرتتەۋ ۇستىندە, بۇل ۋنيۆەرسيتەتتىڭ جوعارى باسەكەگە قابىلەتتىلىگىنىڭ كورسەتكىشى بولىپ تابىلادى. جەتەكشى قازاقستاندىق جوعارى وقۋ ورنىنىڭ الەمدىك عىلىمي-ءبىلىم بەرۋ كەڭىستىگىندەگى ارتىپ كەلە جاتقان ءرولىن ەسكەرە وتىرىپ, «QS Worldwide» اتقارۋ كەڭەسى 2019 جىلدىڭ قىركۇيەگىندە ءال-فارابي اتىنداعى قازۇۋ نەگىزىندە بۇكىلالەمدىك فورۋم جانە جوعارى وقۋ ورىندارىنىڭ حالىقارالىق كورمەسىن وتكىزۋ تۋرالى شەشىم قابىلدادى. وسىنداي اۋقىمدى ءىس-شارانى وتكىزۋ قازاقستاننىڭ ءوسىپ كەلە جاتقان بەدەلىن ايعاقتايدى جانە ەلدىڭ جوعارى ءبىلىم بەرۋ جۇيەسىن العا جىلجىتۋعا ىقپال ەتەتىن بولادى.
ارمان وكتيابر,
«ەگەمەن قازاقستان»
