ماڭىزدى شاراعا مەملەكەتتىك حاتشى گۇلشارا ابدىقالىقوۆا قاتىستى. سونداي-اق فورۋم جۇمىسىنا ۇلتتىق جانە الەمدىك ساراپشىلار, عىلىمي قىزمەتكەرلەر, مەملەكەتتىك ورگانداردىڭ, جۇمىس بەرۋشىلەردىڭ, ءبىلىم سالاسىنداعى قوعامدىق بىرلەستىكتەردىڭ وكىلدەرى, سونداي-اق الەمنىڭ 15 ەلىنەن, اتاپ ايتقاندا, اقش, رەسەي, قىتاي, ۇلىبريتانيا, كورەيا رەسپۋبليكاسى, اۋستراليا سىندى ەلدەردەن 150-دەن استام دەلەگات قاتىستى.
گ.ابدىقالىقوۆا قۇتتىقتاۋ سوزىندە بيىلعى فورۋمنىڭ قازاقستاننىڭ سيمۆولى – استانانىڭ 20 جىلدىق مەرەيتويى قارساڭىندا وتكىزىلىپ وتىرعانىن ايتتى. ەلباسىنىڭ ءبىلىم بەرۋ جۇيەسىنىڭ جان-جاقتى دامۋىنا ايرىقشا كوڭىل بولەتىنىن اتاپ وتكەن ول, نۇرسۇلتان نازارباەۆتىڭ «مەن ءاردايىم سىزدەردىڭ ءبىلىم الۋلارىڭىز بەن دامۋلارىڭىز ءۇشىن قاجەتتى بارلىق جاعدايدى جاساۋعا تىرىسىپ كەلەمىن. الەمدىك دەڭگەيدەگى ۋنيۆەرسيتەت, زياتكەرلىك مەكتەپتەرىن اشتىم, «بولاشاق» باعدارلاماسىن بەكىتتىم», دەگەن سوزىنە توقتالدى.
«نازارباەۆ ۋنيۆەرسيتەتى – ەلىمىزدىڭ ماڭىزدى ۇلتتىق جوباسى. وسى وقۋ ورنى اشىلعاننان بەرى ونىڭ قابىرعاسىنان 2 مىڭعا جۋىق مامان تۇلەپ ۇشتى. ۋنيۆەرسيتەت بيوحيميالىق جانە يادرولىق ينجەنەريا, روبوت-تەحنيكا, مەحاترونيكا جانە باسقا دا سيرەك باعىتتار بويىنشا كادرلار دايارلايدى. مۇندا الەمنىڭ تۇكپىر-تۇكپىرىنەن كەلگەن ۇزدىك وقىتۋشىلار جۇمىس ىستەيدى جانە ەڭ زاماناۋي ماتەريالدىق-تەحنيكالىق قۇرالدارمەن, زەرتحانالارمەن جابدىقتالعان. ازياداعى باسقا دا ەلدەردىڭ 14 جەتەكشى ۋنيۆەرسيتەتتەرىنىڭ قاتارىنا قوسىلدى. جوعارى وقۋ ورىندارى كەلەشەكتە ەڭبەك نارىعىنداعى باسەكەگە توتەپ بەرۋ ءۇشىن, ءبىلىمنىڭ ۇزدىك باعدارلامالارى بويىنشا وقىتىلعان جاڭا فورماتتاعى مامانداردى دايارلاۋعا ءتيىس», دەدى مەملەكەتتىك حاتشى.
گ.ابدىقالىقوۆا جيىنعا قاتىسۋشىلاردىڭ سىندارلى سۇحبات قۇرىپ, تابىستى جۇمىس ىستەۋىنە تىلەكتەستىگىن ءبىلدىردى. نەگىزگى پلەنارلىق وتىرىس اكادەميالىق ورتانىڭ ءارتۇرلى اسپەكتىلەرىن, سولاردىڭ ىشىندە زاماناۋي ءبىلىم بەرۋ جۇيەسىنىڭ ارتىقشىلىقتارى مەن كەمشىلىكتەرىن, زەرتتەۋلەردىڭ شەكتەرىن كەڭەيتۋدىڭ وڭتايلى تاسىلدەرىن, ستۋدەنتتەرمەن ءوزارا قاتىناسۋعا باعىتتالعان جاڭا امالداردى قامتىدى.
كەلەلى كەڭەستى جۇرگىزىپ وتىرعان نازارباەۆ ۋنيۆەرسيتەتىنىڭ رەكتورى شيگەو كاتسۋ اتاپ وتكەندەي, ەكى كۇندىك ءماجىلىس كەزىندە جوعارى ءبىلىم سالاسىنىڭ سان الۋان وزەكتى ماسەلەلەرى تالقىلانادى. «جوعارى ءبىلىم بەرۋ سالاسىنىڭ دامۋىنا, ستۋدەنت جاستاردىڭ داعدىلارىن دامىتۋدىڭ تىڭ جولدارى جونىندەگى سۇراقتار وسى الاڭدا كەڭىنەن تالقىلانادى دەپ كۇتەمىز. ارينە وسى ورايدا نازارباەۆ ۋنيۆەرسيتەتىنىڭ تاجىريبەسى دە كەڭىنەن زەردەلەنەدى. قازىرگى زاماندا ءبىز بارلىق وزگەرىستەردى باقىلاپ وتىرۋىمىز قاجەت», دەدى ش.كاتسۋ.
سونىمەن قاتار ەنەLF بارىسىندا نازارباەۆ ۋنيۆەرسيتەتىنىڭ تەحنوپاركى بازاسىندا ىسكە اسىرىلعان يننوۆاتسيالىق ەكوجۇيەنى دامىتۋ سالاسىنداعى نازارباەۆ ۋنيۆەرسيتەتىنىڭ تاجىريبەسىمەن تانىستىراتىن كورمە ۇسىنىلدى.
فورۋمدا ءسوز العان حالىقارالىق ساراپشى دجاميل سالمي ءوز كەزەگىندە بولاشاقتا الەم بويىنشا جوعارى ءبىلىم بەرۋ سالاسىنىڭ قالايشا وزگەرەتىنىنە بولجام جاسادى. ساراپشىنىڭ ويىنشا, مەملەكەتتىك ۋنيۆەرسيتەتتەردى بيۋدجەت تاراپىنان قارجىلاندىرۋ كولەمى ازايۋى ابدەن مۇمكىن. الايدا وسى ساناتتاعى جوعارى وقۋ ورىندارى جەكەمەنشىك قاراجاتتى كوپتەپ تارتاتىن بولادى. سونىڭ ارقاسىندا رەكتورلار مەن عالىمداردىڭ جالاقىسى ءوسۋى مۇمكىن. «بولاشاقتا ءاربىر ءۇش جىل سايىن وقۋ باعدارلاماسىن قايتا قاراۋعا تۋرا كەلەدى. سەبەبى ساباقتاردىڭ ءبارى 10 مينۋتتان اسپايدى. بارلىعى ونلاين رەجىمدە وتەدى. ۋنيۆەرسيتەتتى قۇرۋ دا قيىنعا تۇسپەيدى. ويتكەنى وقۋلىقتار, كىتاپxانالار, ءتىپتى زەرتxانالار ەلەكتروندى فورماتتا جۇمىس ىستەيدى. ستۋدەنتتەرگە تسيفرلى جۇيەمەن باعا قويىلادى. كوپ نارسە بلوكچەينگە نەگىزدەلەدى. سوسىن كەلەشەكتە ۋنيۆەرسيتەتتى بىتىرگەن جاس مامان التى ايدىڭ ىشىندە جۇمىس تاپپاسا, جوعارى وقۋ ورنى ونىڭ وقۋعا جۇمساعان اقشاسىن قايتارۋعا ءماجبۇر بولادى», دەيدى د.سالمي.
ايتا كەتەيىك, ەنەLF اتالمىش ۋنيۆەرسيتەتتە جىل سايىن وتەتىن جانە بۇكىل الەمدە جوعارى ءبىلىم بەرۋ كوشباسشىلارىنىڭ الدىندا تۇرعان ماسەلەلەر بويىنشا پىكىر الماساتىن, ءبىلىم بەرۋ سالاسىنداعى مۇددەلى تۇلعالاردى بىرىكتىرەتىن الاڭ.
ميراس اسان,
«ەگەمەن قازاقستان»
