ۆەلوسپورتتا «استانا» اتاۋى اتالا قالعاندا وتاندىق جانە شەتەلدىك سپورت جانكۇيەرلەرىنىڭ ەسىنە بىردەن «Astana Pro Team» دەپ اتالاتىن ۆەلوسپورت كومانداسى تۇسەدى. «تۋر دە فرانس», «دجيرو د’يتاليا», «ۆۋەلتا» سەكىلدى جاھاندىق ءىرى دودالاردا الدىڭعى شەپتى بەرمەي ءجۇر. ەلوردانىڭ كومانداسى 2007 جىلى قۇرىلىپ, سول جىلى-اق بۇكىلالەمدىك UCI World Tour دارەجەسىن الدى. وسى مارتەبە ۆەلوكوماندانىڭ جوعارى دەڭگەيدەگى جارىستارعا قاتىسۋىنا مۇمكىندىك بەردى. كوماندانىڭ العاشقى كاپيتانى بولىپ الەكساندر ۆينوكۋروۆ سايلاندى.
«استانانىڭ» اتاعى 2008 جىلى كومانداعا «تۋر دە فرانس-2007» جەڭىمپازى يسپانيالىق البەرتو كونتادوردىڭ كەلۋىمەن كەڭگە قانات جايا باستادى. كونتادور باستاعان ۆەلوشاباندوزدار سول جىلى «تۋر دە فرانس» جارىسىنان كەيىنگى ەڭ ءىرى دودا سانالاتىن «دجيرو د’يتاليا», «ۆۋەلتا» كوپكۇندىگىندە توپ جاردى. ال 2009 جىلى كوماندا «تۋر دە فرانس» باسەكەسىنىڭ جەتى دۇركىن چەمپيونى امەريكالىق لەنس ارمسترونگپەن سەنساتسيالىق كەلىسىمشارت جاساپ, كلۋبتىڭ اتاعى ودان ءارى اسپاندادى. بۇكىل ەۋروپا جۇرتى 2005 جىلى سپورتپەن قوشتاسقان ۆەلوشاباندوزبەن كەلىسىمشارتقا وتىرعانىنا ءوز تاڭدانىستارىن ءبىلدىرىپ, «استانانىڭ» ەندىگى قارقىنىنا شىداس بەرۋ مۇمكىن ەمەس دەستى.
ايتقاندارى ايداي كەلدى. سول جىلى-اق ارمسترونگ پەن كونتادور جۇبى ۆەلوشاباندوزداردىڭ بەيرەسمي الەم چەمپيوناتى ىسپەتتەس «تۋر دە فرانس» دوداسىنا قاتىسىپ, قارسىلاستارىنا بەت قاراتقان جوق. جارىس قورىتىندىسى بويىنشا, كونتادور جالپى ەسەپتە ءبىرىنشى, ارمسترونگ ۇزدىك ۇشتىكتىڭ قاتارىنان تابىلدى.
الەكساندر ۆينوكۋروۆ وليمپ شىڭىن باعىندىرعان سوڭ 2013 جىلى كوماندانىڭ سپورتتىق ديرەكتورى بولىپ تاعايىندالدى. وليمپيادا چەمپيونى ءوز قىزمەتىنە كىرىسە سالىپ, كوماندانى كۇشەيتەتىن شاباندوزداردى ىزدەۋگە كىرىستى. قارجىلىق جاعدايىنا بايلانىستى ءبىراز توقىراۋعا ۇشىراعان كومانداعا ۆينچەنتسو ءنيباليدى اكەلىپ, «استانانى» بۇرىنعى بيىگىنە قايتا كوتەردى. 2014 جىلى نيبالي «تۋر دە فرانس» جارىسىندا توپ جاردى. ول 21 كەزەڭنىڭ 19-ىندا جەڭىمپاز ۆەلوسپورتشى كيەتىن سارى جەيدەنى ەشكىمگە بەرگەن جوق. سونىمەن قاتار ءتورت كەزەڭنىڭ جەڭىمپازى اتاندى. ال 2014 جىلعى «دجيرو د’يتاليا» تۋرنيرىندە كوماندانىڭ جاس ۆەلوشاباندوزى فابيو ارۋ جەڭىسكە جەتتى.
«استاناداعى» نيبالي ءداۋىرى 2016 جىلعا دەيىن جالعاستى. ول كلۋبتان كەتكەن سوڭ ماماندار كوماندانىڭ ەندىگى ۇزدىگى يتاليالىق ۆەلوشاباندوز فابيو ارۋ بولادى دەپ توپشىلاعان. ويتكەنى ارۋ 2017 جىلى كوماندانى «تۋر دە فرانس» جارىسىنا كاپيتان رەتىندە باستاپ باردى. فرانتسيا تاس جولدارىندا وتكەن جارىسقا تۇڭعىش رەت قاتىسىپ تۇرسا دا, ءتۋرنيردى 5-ءشى ورىنمەن اياقتادى. بىراق 2017 جىلدىڭ سوڭىندا ارۋ كۇتپەگەن جەردەن كوماندا اۋىستىرىپ, «استانادان» كەتتى. قازىرگى «استانانىڭ» بەتالىسى دا جامان ەمەس. جۋىردا عانا اياقتالعان «دجيرو د’يتاليا» كوپكۇندىگىندە كوماندانىڭ كولۋمبيالىق جاس ۆەلوشاباندوزى ميگەل انحەل لوپەس جالپى كەزەڭدە ءۇشىنشى ورىن يەلەنىپ, جارىستىڭ ەڭ جاس سپورتشىسى اتاندى.
«استانا» ۆەلوكلۋبى كارىقۇرلىقتا وتە تانىمال دەگەن ءسوزىمىزدى قۋاتتايتىن مىناداي ءبىر مالىمەتپەن بولىسكىمىز كەلەدى. ستاتيستيكا بويىنشا كوماندانىڭ قازاقستاننان كەيىنگى ەڭ كوپ جانكۇيەرى – يتاليا, فرانتسيا, كولۋمبيا جانە دانيا ەلىنىڭ ازاماتتارى. ماسەلەن, فرانتسيالىق ءبىر وتباسى جاقىندا دۇنيەگە كەلگەن قىزىنىڭ ەسىمىن Astana دەپ قويىپتى. بۇل ەلدە ءوزىمىزدىڭ وتانداسىمىز الەكسەي لۋتسەنكونىڭ دا جەكە فاناتتارى بار. ولار لۋتسەنكونىڭ ءار جارىسىنان قالماي, جالاۋلارىن كوتەرىپ, شاباندوزىمىزبەن بىرگە ەرىپ جۇرەدى ەكەن.
ۆەلوكلۋبتان بولەك, سوڭعى جىلدار «استانا» فۋتبول كومانداسى دا ەۋروپانى باعىندىرا باستادى. قۇرىلعانىنا بيىل نەبارى توعىز جىل بولسا دا, چەمپيوندار ليگاسىنىڭ توپتىق كەزەڭىندە ءبىر رەت, ەۋروپا ليگاسىنىڭ توپتىق باسەكەسىندە ەكى رەت وينادى. ال بيىل تۇڭعىش رەت پلەي-وفف كەزەڭىندە باق سىنادى. سونىمەن قاتار ءتورت دۇركىن قازاقستان چەمپيونى, ەكى مارتە كۇمىس جۇلدەگەر. قازاقستان كۋبوگى مەن سۋپەركۋبوگىن ءۇش رەتتەن جەڭىپ الدى.
2009 جىلى «الماتى» مەن «مەگاسپورت» كلۋبتارىنىڭ قوسىلۋىمەن «لوكوموتيۆ» اتتى جاڭا كوماندا قۇرىلدى. ال 2011 جىلدىڭ 1 ماۋسىمىنان باستاپ كوماندا «استانا» دەگەن جاڭا اتاۋعا يە بولدى. ىشكى بىرىنشىلىكتە الا-قۇلا ويناپ جۇرگەن كوماندانى 2014 جىلدىڭ جازىنان باستاپ بولگاريالىق مامان ستانيمير ستويلوۆ جاتتىقتىرا باستادى. بولگار مامانى كومانداعا كەلە سالا «استانامەن» ەۋروماۋسىمداعى جورىعىن باستاپ كەتتى. مۇنداي ءىرى دوداعا العاش رەت قاتىسىپ تۇرسا دا, كوماندامەن ەۋروپا ليگاسىنىڭ پلەي-وفف كەزەڭىنە دەيىن جەتتى. پلەي-وفف كەزەڭىندە يسپانيانىڭ ازۋلى «ۆيلياررەال» كومانداسىنا ەسە جىبەردى. كەلەسى 2015/16 جىلعى ماۋسىمدا چەمپيوندار ليگاسىنىڭ توپتىق كەزەڭىنە جولداما الىپ, ايدى اسپانعا ءبىر-اق شىعاردى. «س» توبىندا پورتۋگاليانىڭ «بەنفيكا», يسپانيانىڭ «اتلەتيكو مادريد» جانە تۇركيانىڭ «گالاتاساراي» سەكىلدى ەۋروپانىڭ الپاۋىت كوماندالارىمەن تەرەزەسى تەڭ ونەر كورسەتتى. توپتىق كەزەڭدەگى التى ويىننىڭ تەك ەكەۋىندە عانا جەڭىلدى. «استانا ارەنادا» وتكەن كەزدەسۋدىڭ بىردە-بىرەۋىندە جەڭىلگەن جوق. وسىنداي ناتيجەدەن سوڭ «استانانىڭ» اتاعى ەۋروپانى شارلاي باستادى.
«استانا» كەيىنگى ەكى ماۋسىم قاتارىنان ەۋروپا ليگاسىنىڭ توپتىق كەزەڭىندە سىنعا ءتۇستى. بىلتىر سەنساتسيالى تۇردە ەۋروپا ليگاسىنىڭ توپتىق كەزەڭىنەن ءوتىپ, قارت قۇرلىقتى تاعى دا ءدۇر سىلكىندىرگەندە بوركىمىزدى اسپانعا لاقتىرىپ قۋانعانىمىزدى نەسىنە جاسىرايىق. «استانانىڭ» وسى ءبىر ايتۋلى جەڭىسىنەن سوڭ كارىقۇرلىقتىڭ كوماندالارى ەلوردا ۇجىمىمەن ساناسۋعا كوشتى. «استانا» ەۋروكۋبوكتىق جارىستارعا قاتىسا باستاعان كلۋبتىق رەيتينگتە ۇزدىك 400 كوماندانىڭ ىشىندە بولاتىن. اينالدىرعان ءۇش جىلدىڭ ىشىندە كوماندا توپ-100 كلۋبتىڭ قاتارىنا قوسىلدى. ءتىپتى اعىلشىننىڭ «ەۆەرتون», يتاليانىڭ «ينتەر» جانە ماسكەۋدىڭ «لوكوموتيۆ» كوماندالارىن جانە باسقا دا ءىرى كوماندالاردى باسىپ وزدى.
استانا برەندىمەن الەمگە تانىلعان تاعى ءبىر كوماندا بار ول – «استانا ارلاندارى» جارتىلاي كاسىپقوي بوكس كلۋبى. بۇكىلالەمدىك بوكس سەرياسىندا سىنعا تۇسەتىن ەلوردانىڭ كومانداسى 2010 جىلى قازاقستان بوكس فەدەراتسياسىنىڭ قولداۋىمەن قۇرىلدى. «استانا ارلاندارى» كلۋبى 2010 جىلدان بەرى بۇكىلالەمدىك بوكس سەرياسىنا (WSB) سەگىز ماۋسىم بويى قاتىسىپ كەلە جاتقان الەمدەگى جالعىز كوماندا. قازىرگى تاڭدا «ارلاندار» جوبانىڭ ءۇش دۇركىن چەمپيونى. مۇنداي ناتيجەگە ءالى ەشبىر كوماندا جەتكەن جوق. سونىمەن قاتار ءبىر رەت فينالعا شىعىپ, ءۇش رەت ءۇشىنشى ورىن الدى.
ارلانداردىڭ» اۋىز تولتىرىپ ايتاتىن جەتىستىگى 2015 جانە 2017 جىلدارعا تۋرا كەلدى. ويتكەنى الەمدىك بوكس دەرجاۆاسى سانالاتىن كۋبالىق كوماندامەن ەكى رەت فينالدىق سايىستا جولىعىپ, بوستاندىق ارالىنان كەلگەن قابىلاندارعا بوكستا قازاق ەلىنىڭ وعلاندارى دا وسال ەمەستىگىن دالەلدەپ بەردى.
WSB جوباسىنىڭ العاشقى ماۋسىمىندا «استانا ارلاندارى» ساپىندا ەسىمى جاھانعا ءمالىم سپورتشى, بەيجىڭ وليمپياداسىنىڭ چەمپيونى باقىت سارسەكباەۆ پەن قولا جۇلدەگەرى قانات يسلام, سونداي-اق مەرەي اقشالوۆ, رۋسلان مىرساتاەۆ سەكىلدى بوكسشىلار جۇدىرىقتاستى.
كەيىننەن كوماندا قۇرامىندا ريو وليمپياداسىنىڭ چەمپيونى دانيار ەلەۋسىنوۆ, وليمپيادانىڭ كۇمىس جۇلدەگەرلەرى ۆاسيلي لەۆيت, ادىلبەك نيازىمبەتوۆ سىنعا ءتۇستى. سونىمەن قاتار قازىرگى تاڭدا ءوز باقتارىن كاسىپقوي بوكستا سىناپ جۇرگەن ماديار اشكەەۆ, مەيىرىم نۇرسۇلتانوۆ, اسحات ءۋاليحانوۆ سەكىلدى بوكسشىلار دا «ارلاندار» نامىسىن ابىرويمەن قورعادى.
بۇدان بولەك «استانا» اتتى باسكەتبول كلۋبى دا بار. كوماندانىڭ قۇرىلعانىنا كوپ بولا قويماسا دا, قازاقستاننىڭ التى دۇركىن چەمپيونى اتانىپ, ەكى رەت كۇمىس جۇلدە يەلەنىپ ۇلگەردى. سونداي-اق قازاقستان كۋبوگىنىڭ التى دۇركىن يەگەرى. ازيا چەمپيوناتىنىڭ ءۇشىنشى ورنىن يەلەنگەن. 2011 جىلدان بەرى ۆتب بىرىڭعاي ليگاسىندا سىنعا تۇسەتىن «استانا» باسكەتبول كومانداسى ءۇش رەت شيرەك فينالعا دەيىن جەتتى. بۇل كوماندانىڭ قازىرشە ەڭ ۇزدىك جەتىستىگى وسى.
قاراپ وتىرساق, ءبىزدىڭ كوماندالار جەتكەن جەتىستىككە, اتاق-دارەجەگە جەتۋ ءۇشىن كەيبىر كوماندالارعا 20-30 جىل قاجەت بولادى ەكەن. ال «استانا» اتاۋى بار كوماندالار نەبارى 10 جىلدىڭ كولەمىندە ەۋروپاعا تانىلىپ ۇلگەردى. بۇل 10 جىلداعى جەتىستىك, ەندىگى 10 جىلداعى جەتىستىگىمىز قالاي بولاتىنىن ءوزىڭىز باعامداي بەرىڭىز. «استانا» اتاۋىمەن الاشتىڭ ەلورداسىن الەمگە تانىتىپ جۇرگەن كوماندالاردىڭ قاي-قايسىسىنىڭ دا ابىرويى اسقاق, بەدەلى بيىك. جاھاندىق الاماندا ولجا سالىپ ءجۇر. ەندەشە, «استانا» باس قالانىڭ عانا ەمەس, بۇكىل قازاقستاننىڭ برەندى دەپ ايتۋعا حاقىمىز بار.
ءالي بيتورە,
«ەگەمەن قازاقستان»
