ونىڭ جۇرەك تولعانىسىنان, كوڭىل تولقىنىسىنان, سەزىم پەرنەسىنەن, شىعارماشىلىق شابىتىنان تۋعان اننەن وپەراعا, شاعىن ديۆەرتيسمەنتتەن سيمفونياعا دەيىن ءتۇرلى جانردى قامتيتىن تۋىندىلارى ءجيى ورىندالاتىنى سوندىقتان. قازاقتىڭ ۇلى تۇلعالارىنا ارنالعان «ەر جانىبەك», «بەكەت اتا», «تولە بي», «ۇلبيكە» سەكىلدى ءبىرتۋار دۇنيەلەرى اۆتوردىڭ وزىندىك قولتاڭباسىمەن, اۋەزدى ۇنىمەن ەرەكشەلەنەدى. ال «اۋىلىندا بار اعانىڭ قىزقاراعاي» ءانىن «تەرىسكەيدىڭ برەندى» دەسە دە بولادى.
سولتۇستىكقازاقستاندىق ونەرسۇيەر قاۋىمنىڭ جەرلەسىن قۇرمەت تۇتاتىنى سونشالىق, جاستار سارايىندا ينە شانشار ورىن بولمادى. «اينالايىن, قىزىلجار!» شىعارماشىلىق كەشىندە سويلەگەن سوزىندە ءوڭىر باسشىسىنىڭ ورىنباسارى مادييار قوجاحمەت وبلىس اكىمى قۇمار اقساقالوۆتىڭ جىلى سەزىمگە تولى قۇتتىقتاۋ لەبىزىن جەتكىزىپ, يىعىنا شاپان جاپتى. مادەنيەت جانە سپورت ءمينيسترى ارىستانبەك مۇحامەدي ۇلىنىڭ العىس حاتى تابىس ەتىلدى. قازاقستان كومپوزيتورلار وداعىنىڭ ءتورايىمى بالنۇر قىدىربەكتىڭ ءسوزى وتە اسەرلى شىقتى.
«سوڭىنان ەرىپ كەلە جاتقان ءبىز ءۇشىن – اسىل اعا, زامانداستارى ءۇشىن – كەمەڭگەر, ال قازاق ونەرى ءۇشىن قاتارداعى جاۋىنگەر. كەز كەلگەن مايدان جەڭىسكە قاتارداعى ءار جاۋىنگەردىڭ ارقاسىندا جەتەدى. قازاق ونەرى دە سولاي. سوڭعى جىلدارى ەكى نوتانىڭ باسىن قوسقانىنا ءماز بولىپ, ءوزىن كەرەمەت ساناپ, كەۋدەسىن سوققاندار كوبەيىپ كەتتى. بىراق ولار ەمەس, بۇگىندە قازاق ونەرىن دامىتىپ, بيىك شوقتىققا شىعاراتىن – كۇندەلىكتى ءىسىن ساپالى, كوركەم تۇردە اتقاراتىن كاسىبي مامان عانا. سول كاسىبي شەبەرلىگىمەن ءوز ۇلەسىن قوسىپ جۇرگەن تالانت يەلەرىنىڭ ءبىرى–بىزدىڭ جوكەڭ», دەي كەلىپ, پاتريوتتىق تاقىرىپقا جانە ليريكاعا تولى ەكى قىرىن ايرىقشا اتاپ ءوتتى.
ساحنا شىمىلدىعى سەگىز سەرى اتىنداعى قازاق حالىق اسپاپتار وركەسترى مەن «ادەمى-اۋ» حالىق بي ءانسامبلىنىڭ سۇيەمەلدەۋىندە «ەلىگاي» ءانىنىڭ ورىندالۋىمەن اشىلدى. رەسپۋبليكالىق بايقاۋلاردىڭ لاۋرەاتتارى دينارا تاۋىشەۆا, باقىت ءىلياسوۆ, دامەش قۇرمانكينا, اسحات تاۋىشەۆ كومپوزيتوردىڭ «ەسىلىم», «تۋعان جەر», «ۇلبيكەنىڭ سوڭعى ءانى», «بەكەت اتا – ءپىر اتا» اندەرىن ناقىشىنا كەلتىرە ورىنداپ بەردى. قازاقستاننىڭ ەڭبەك سىڭىرگەن قايراتكەرى, تۇڭعىش پرەزيدەنت قورىنىڭ لاۋرەاتى, قازاق ۇلتتىق ونەر ۋنيۆەرسيتەتىنىڭ پروفەسسورى ازامات جىلتىركوزوۆ «مەڭگەسەر», «اتىراۋىم – اتاجۇرتىم», «ايگ ۇلىم» اندەرىن سىيلاپ, جۇرتشىلىقتىڭ قۇلاق قۇرىشىن قاندىردى.
وسى كەشتە بىرقاتار جاڭا اندەردىڭ تۇساۋى كەسىلدى. سولاردىڭ ءبىرى بيىل 125 جىلدىق مەرەيتويى اتاپ وتىلەتىن ماعجان جۇماباەۆتىڭ «ايدىن شالقار كولىم-اي», «قازاق ءتىلى» ولەڭدەرىنە جازىلعان اندەر جينالعانداردى ەرەكشە تەبىرەنتىپ, نۇر شۋاعىن توگىلدىرگەندەي سەزىمگە بولەدى.
كەش سوڭىندا كومپوزيتوردىڭ تۋعان جەرى – ەسىل اۋدانى اكىمىنىڭ ورىنباسارى ەدىل تۇتقىشەۆ, اۋداندىق ارداگەرلەر كەڭەسىنىڭ توراعاسى تولەگەن مۇقاشەۆ, بەلگىلى جازۋشى-جۋرناليست جاقسىباي سامرات جۇرەكجاردى تىلەكتەرىن ارناپ, سىي-سياپاتتار جاسادى. ۇلت جاناشىرلارىنىڭ ءبىرى جومارت وماروۆ ءوڭىر كاسىپكەرلەرى اتىنان «تەمىر تۇلپاردىڭ» كىلتىن تارتۋ ەتتى.
– اينالايىن, قىزىلجارىم! ساعان باسىمدى يەمىن! الاقانعا سالىپ وسىردىڭدەر, ەركەلەتتىڭدەر! مەن ءۇشىن بۇدان اسقان باقىت جوق! – دەپ تەبىرەنە, تولعانا سويلەگەن ونەر يەسى شىعارماشىلىق كەشىن وتكىزۋگە ءبىر كىسىدەي اتسالىسقان كوپشىلىككە اق العىسىن ءبىلدىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
