بالالار ومىرىنەن تۇسىرىلگەن ءفيلمنىڭ رەجيسسەرلەرى – سەرىك ابىشەۆ پەن رۋسلان ماگومادوۆ, ال ستسەناريىن يراكلي كۆيريكادزە مەن سەرگەي ءازىموۆ جازعان. اتالعان ءفيلمدى حالىقارالىق كينوفەستيۆالدەردە كورسەتىپ, ناسيحاتتاۋدى ش.ايمانوۆ اتىنداعى «قازاقفيلم» اق جۇزەگە اسىرىپ وتىر.
– ءبىزدىڭ فيلمىمىزگە جوعارى باعا بەرگەن «سۆەت ميرۋ» فەستيۆالىنە جانە ونىڭ قازىلار القاسىنا العىسىم شەكسىز. ءفيلمنىڭ تەڭ رەجيسسەرى رۋس- لان ماگومادوۆپەن, سونداي-اق, كارتينانىڭ ءتۇسىرۋ توبىمەن بىرلەسىپ ادامداردىڭ جۇرەكتەرىنە جىلۋ ۇيالاتىپ, كوڭىلىن نۇرلاندىراتىن مەيىرىمگە تولى فيلم تۇسىرۋگە تىرىستىق, – دەدى رەجيسسەر سەرىك ابىشەۆ.
فيلمگە ارقاۋ بولعان وقيعانى قىسقاشا تاراتىپ ايتساق, بىلايشا ءوربيدى. تۇتقىنعا الىنعان قىلمىسكەر ءبىر توپ اسكەريلەردىڭ باقىلاۋىمەن كورەيادان ەۋروپاعا ۇشىپ بارا جاتقان ساتىندە تەحنيكالىق اقاۋعا بايلانىستى ۇشاق قازاقستاننىڭ بەيتانىس قالاشىعىنا قونۋعا ءماجبۇر بولادى. وسىلايشا تەمىر توردان تالاي مارتە قاشىپ كەتپەك بولعان باستى كەيىپكەر, تاعدىردىڭ بۇيرىعىمەن بالالىق شاعىن وتكىزگەن بالالار ۇيىنە قايتا ورالادى.
ءتۇرلى ۇلت وكىلدەرىنەن قۇرالعان فيلم كەيىپكەرلەرى ورتاق ءتىل تابىسا الماسا دا, ومىردەن شۋاق تابۋعا, ءبىر-ءبىرىنىڭ جۇرەكتەرىنە مەيىرىم شاپاعاتىن توگۋگە تىرىسادى. ءسويتىپ يدەيا اۆتورلارى ادامدار اراسىنداعى ىزگىلىك پەن مەيىرىمدى دارىپتەي وتىرىپ, كورەرمەندى ماحاببات پەن دوستىق سەزىمدەرىن باعالاي بىلۋگە شاقىرادى.
ءفيلمنىڭ باستى رولدەرىندە الماتى جانە الماتى وبلىسى بالالار ءۇيىنىڭ تاربيەلەنۋشىلەرى, سونىمەن قاتار وڭتۇستىك كورەيانىڭ بالالارى ويناعان. سونداي-اق نۇرجۇمان ىقتىمباەۆ, ۆويتەك سولارز انتوني (پولشا), جانەل ماقاجانوۆا, باقىتجان الپەيىسوۆ, ەۆا بەحەر, اسحات كچينچيرەكوۆ, كاترين مونتوندو (بەلگيا), ارۆيداس داپشيش (پولشا), حانبيۋل سەو (وڭت. كورەيا), ەنوك كيم (وڭت. كورەيا), سۋمين كيم (وڭت. كورەيا), چانا چوي (وڭت. كورەيا) سەكىلدى ءار ەلدەن ارنايى شاقىرىلعان اكتەرلەر توبى فيلم سالماعىن ارتتىرا تۇسكەن. كارتينا شىعىس قازاقستان وبلىسىندا تۇسىرىلگەن.
ءيلمنىڭ مۋزىكاسىن ەلىمىزگە تانىمال كومپوزيتور قۋات شىلدەباەۆ جازعان. ال فيلمگە مۋزىكا جازۋ بارىسىندا باتىرحان شۇكەنوۆتىڭ ساكسوفونمەن ورىنداعان يمپروۆيزاتسياسى نەگىز بولعان.
اتالعان فيلم ەڭ العاش گەرمانيادا وتكەن 64-مانگەيم-حايدەلبەرگ حالىقارالىق كينوفەستيۆالىنىڭ نەگىزگى بايقاۋىندا كورسەتىلگەن بولاتىن. ءفيلمنىڭ باستى رولىندە ويناعان جاس اكتەر امانگەلدى قۇسايىنوۆ 2016 جىلى حالىقارالىق «كينومالىشوك» كينوفەستيۆالىندە «ۇزدىك بالا ءرولى» جۇلدەسىمەن ماراپاتتالعانى دا ەسىمىزدە.
ايگۇل احانبايقىزى,
«ەگەمەن قازاقستان»
الماتى
