سالتاناتتى راسىمنەن كەيىن بولعان ەكىجاقتى كەزدەسۋدە ساياسي ديالوگ, ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ, IT-يندۋستريا, تسيفرلاندىرۋ, جاسىل تەحنولوگيالار جانە تۋريزم سالاسىنداعى ىنتىماقتاستىقتى جانداندىرۋ ماسەلەلەرى تالقىلاندى.
ەلشى پورتۋگاليا باسشىسىن ەلىمىزدەگى جاڭعىرتۋ باعدارلامالارى اياسىندا بولىپ جاتقان اۋقىمدى ەكونوميكالىق جانە ساياسي رەفورمالارمەن جانە مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىنىڭ باستى باعىتتارىمەن تانىستىردى.
ءوز كەزەگىندە پرەزيدەنت مارسەلۋ رەبەلۋ دي سوزا قازاقستان پرەزيدەنتى نۇرسۇلتان نازارباەۆتىڭ جەتەكشىلىك ەتۋىمەن ەلدىڭ قارقىندى دامۋىنا جوعارى باعا بەرىپ, الداعى استانا قالاسىنىڭ 20 جىلدىعىمەن قۇتتىقتادى. سونداي-اق, پورتۋگاليا باسشىسى ەلدەگى مەملەكەتتىك باعدارلامالاردى جۇزەگە اسىرۋدا تابىستار تىلەدى جانە پورتۋگاليانىڭ قازاقستانمەن ەكى جاقتى ىنتىماقتاستىقتى جانداندىرۋعا تالپىنىسىن اتاپ ءوتتى. وسىعان بايلانىستى ول الداعى ۋاقىتتا ليسسابوندا قازاقستان-پورتۋگال ينۆەستيتسيالىق فورۋمىن وتكىزۋگە قىزىعۋشىلىق تانىتتى.
ساپار اياسىندا ج. عاليەۆ پورتۋگاليا سىرتقى ىستەر مينيسترلىگىندە باس حاتشى الۆارو مەندونسو ي مورامەن, باس ساياسي ديرەكتور پەدرو كوستا پەرەيرامەن, پروتوكول جەتەكشىسى كلارا نۋنەس دۋش سانتۋشپەن, ەۋروپا ىستەرى دەپارتامەنتىنىڭ ديرەكتورى انتونيو سابيدو كوستا جانە حالىقارالىق ۇيىمدار دەپارتامەنتى ديرەكتورى ۆەرا اۆيلامەن بولەك كەزدەسۋلەر وتكىزدى.
تاراپتار 29 ناۋرىزدا استانا قالاسىندا وتكىزىلگەن سىرتقى ىستەر مينيسترلىكتەرى اراسىنداعى ساياسي كونسۋلتاتسيالاردىڭ ءساتتى ءوتۋىن اتاپ ءوتىپ, ەكى جاقتى ىنتىماقتاستىقتى ودان ءارى نىعايتۋ جانە ناقتى جوبالارعا كوشۋ جونىندەگى الداعى مىندەتتەمەلەردى راستادى.
كەزدەسۋلەردە ەكى ەل اراسىنداعى قارىم-قاتىناستىڭ قۇقىقتىق بازاسىن قۇرايتىن نەگىزگى قۇجاتتاردى قاراستىرۋ بارىسى مەن قول قويۋ مۇمكىندىگى تالقىعا سالىندى, ولاردىڭ اراسىندا ەكونوميكالىق, ساۋدا جانە تەحنيكالىق ىنتىماقتاستىق جونىندە, ەكىجاقتى سالىق سالۋدى الدىن-الۋ, قۇقىقتىق قولداۋ جانە تۋريزم جونىندەگى كەلىسىمدەر بار.
سونىمەن قاتار, حالىقارالىق ۇيىمدار اياسىنداعى ىنتىماقتاستىق ماسەلەلەرى قارالدى. پورتۋگاليا تاراپى استانانىڭ ەۋروپالىق وداقپەن جانە ەۋروپا كەڭەسىمەن ىنتىماقتاسۋ جونىندەگى كۇش-جىگەرىن, ەقىۇ مەن بۇۇ اياسىنداعى بەلسەندى جۇمىسىن اتاپ ءوتتى. قازاقستاندىق ديپلومات 2017-2018 جج. بۇۇ قاۋىپسىزدىك كەڭەسىندە قازاقستاننىڭ كانديداتۋراسىن قولداعانى ءۇشىن پورتۋگالياعا العىسىن ءبىلدىردى.
كەلىسسوزدەر تاقىرىپتارىنىڭ ءبىرى قر ازاماتتارىنا ۆيزالىق رەجيمدى جەڭىلدەتۋ ماسەلەسى بولدى. ەلشى وسى ماسەلە بويىنشا پورتۋگالدىق تاراپتى شەنگەن اۋماعى ەلدەرىمەن كوپجاقتى جانە ەكىجاقتى كەلىسسوزدەر بارىسىندا قولعابىس كورسەتۋگە شاقىردى.
پورتۋگالياعا ساپار اياسىندا قازاقستان ەلشىسى پورتۋگاليا اسسامبلەياسىنىڭ دەپۋتاتى, ەقىۇ پارلامەنتتىك اسسامبلەياسىنىڭ بۇرىنعى پرەزيدەنتى جوزە سوارەشپەن كەزدەستى. تاراپتار قازاقستان-پورتۋگال قاتىناسىن نىعايتۋداعى پارلامەنتتىك ديپلوماتيانىڭ جانە ەكى مەملەكەتتىڭ زاڭنامالىق ورگاندارى اراسىنداعى ىنتىماقتاستىقتىڭ ماڭىزدى ءرولىن اتاپ ءوتتى. ج. سوارەش استانانىڭ حالىقارالىق بەيبىتشىلىك باستامالارىنا قولداۋ ءبىلدىرىپ, قازاقستانداعى الەۋمەتتىك-ەكونوميكالىق جانە دەموكراتيالىق رەفورمالارىنا وڭ باعاسىن بەردى.
